၃၁.၇.၂၀၂၃
Written by Peya
အခြေခံပညာဦးစီးဌာနကထုတ်ဝေသည့် Grade-11 English Textbook Unit 1 သင်ရိုးပါ ကြယ်လိပ်၏ပုံ မှားယွင်းနေသည့်အတွက် ပြင်ဆင်စေလိုကြောင်း လိပ်သုတေသနပညာရှင်တစ်ဦးက MT News သတင်းဌာနမှတစ်ဆင့် အပြုသဘောဖြင့် ထောက်ပြပြောကြားသည်။
Myanmar Star Tortoise အခန်းတွင် မျိုးစိတ်မတူသော အိန္ဒိယကြယ်လိပ်၏ပုံကို ထည့်သွင်းထားသည့်အတွက် ယခုကဲ့သို့ ၎င်းက ပြောကြားခဲ့ခြင်း ဖြစ်သည်။
“အရင်ဆုံး ID ခွဲတဲ့အခါ Genus (မျိုးစု) နဲ့ Species (မျိုးစိတ်) ဆိုတာ ရှိပါတယ်။ ဥပမာပြောရမယ်ဆို ကျားနဲ့ ကျားသစ်မှာဆို Genus တူတယ်။ အရှေ့က စကားလုံးလေ။ စာမေးပွဲဖြေပြီဆိုရင် မျဉ်းတွေတားရတဲ့ဟာလေ။ ပုံနှိပ်စာအုပ်မှာဆိုလည်း အစောင်းလေး ရေးရတယ်။ အရှေ့က စာလုံးအကြီးနဲ့ ရေးတာကို Genus ဆိုပြီး နောက်က အကုန်အသေးနဲ့ ရေးတာကို Species လို့ ခေါ်တယ်။ ဥပမာပေးရမယ်ဆိုရင် ကျားနဲ့ ကျားသစ်က Genus တူတယ်။ အကုန်လုံးက Panthera ပဲ။ နောက်ကမှ မျိုးစိတ်ကွဲသွားတာ။ ကျားဆိုလည်း ခန္ဓာကိုယ်က အစင်းတွေ မတူဘူး။ ကျားသစ်နဲ့ ကွဲတာ ဖြစ်လာတယ်” ဟု ၎င်းက ဥပမာပေးကာ ရှင်းပြသည်။
ယခု Grade-11 ပြဌာန်းစာတွင်လည်း စာက မြန်မာ့ကြယ်လိပ်အကြောင်းကို ရေးထားသော်လည်း ပုံက အိန္ဒိယကြယ်လိပ်ကို ဖော်ပြထားသောကြောင့် ကျားအကြောင်း ရေးသားပြီး ကျားသစ်ပုံ ထည့်ထားသကဲ့သို့ ဖြစ်နေကြောင်း၊ ကြယ်လိပ်၏ ခန္ဓာကိုယ်ပုံစံမှာ မြန်မာကြယ်လိပ်က မျဉ်းကြောင်း ၆ ကြောင်းပါပြီး အိန္ဒိယကြယ်လိပ်က အဆိုပါ အရေအတွက်ထက် ပိုပါကာ မြန်မာကြယ်လိပ်တွင် မျဉ်းကြောင်း ၆ ကြောင်းသာပါပြီး ပိုမပါကြောင်းလည်း ၎င်းက ဆိုသည်။
“ပြီးတော့ အိန္ဒိယကြယ်လိပ်က မြန်မာနိုင်ငံမှာ မရှိဘူး။ မြန်မာကြယ်လိပ်က အိန္ဒိယမှာ မရှိပါဘူး” ဟုလည်း ၎င်းက ရှင်းပြသည်။