◾️ လိမ်လည်သူများ အသုံးပြုနေသည်ဟု ယူဆရသော မြန်မာနိုင်ငံရှိ Starlink စက်ပေါင်း ၇,၀၀၀ ကျော်ကို လိုင်းဖြတ်တောက်ရန် အီလွန်မတ်စ်၏ Starlink ကုမ္ပဏီနှင့် FBI ပူးပေါင်းဆောင်ရွက်
သတိုး
၂၉. ၅. ၂၀၂၆
နိုင်ငံတကာရှိ နိုင်ငံဖြတ်ကျော် ငွေလိမ်ဂိုဏ်းများနှင့် DKBA(Democratic Karen Benevolent Army) ဟု လူသိများသည့် အဖွဲ့အစည်းအပါအဝင် ရာဇဝတ်ဂိုဏ်းများကို နိုင်ငံတကာပူးပေါင်း နှိမ်နင်းမှုတစ်ခုအတွင်း စံချိန်တင် ခရစ်ပ်တိုငွေကြေး ဒေါ်လာ ၈ ဘီလျံကို သိမ်းဆည်းရမိပြီး သံသယရှိသူ ရာပေါင်းများစွာကို ဖမ်းဆီးနိုင်ခဲ့ကြောင်း FBI က ပြောကြားခဲ့သည်။ အဆိုပါဂိုဏ်းများသည် အွန်လိုင်းလိမ်လည်မှု၏ သားကောင်ဖြစ်ခဲ့ရသည့် အမေရိကန်နိုင်ငံသားတစ်ဦးတည်းထံမှတင် ဒေါ်လာ ၃ သန်းအထိ အပါအဝင် ကမ္ဘာတစ်ဝန်းရှိ အမေရိကန်နိုင်ငံသားများထံမှ အကြီးအကျယ် ခိုးယူလိမ်လည်မှုများအတွက် တရားခံများဖြစ်ကြသည်။
ကမ္ဘောဒီးယားအခြေစိုက် Prince Holding Group ကုမ္ပဏီ၏ စီအီးအို ဖြစ်သူ ခေါင်းဆောင်တစ်ဦးဖြစ်သည့် ချန်ကျိ (Chen Zhi) ကို ဖမ်းဆီးစဉ်အတွင်း FBI သည် ဘစ်ကွိုင် (Bitcoin) အကြွေစေ့ပေါင်း ၁၂၇,၀၀၀ ကျော်ကို သိမ်းဆည်းခဲ့သည်။ ယင်းသည် ဒေါ်လာ ၈ ဘီလျံကျော် တန်ဖိုးရှိပြီး (သိမ်းဆည်းရမိစဉ်အချိန်က တန်ဖိုးအရ ဒေါ်လာ ၁၅ ဘီလျံကျော်အထိ ရှိနိုင်သည်)၊ ၎င်းကို အမေရိကန်အစိုးရသမိုင်းတွင် အကြီးမားဆုံးသော ပိုင်ဆိုင်မှုသိမ်းဆည်းမှုအဖြစ် တာဝန်ရှိသူများက ခေါ်ဆိုနေကြသည်။
DKBA သည် မြန်မာနိုင်ငံရှိ ဒေသတစ်ခုကို အစွဲပြု၍ အမည်ပေးထားသည့် လက်နက်ကိုင်အဖွဲ့အစည်းတစ်ခုဖြစ်ပြီး တရုတ်မာဖီးယားဂိုဏ်းများနှင့် ဆက်နွှယ်မှုရှိသည်ဟု စွပ်စွဲခံထားရကာ ယခင်က အကြီးစားငွေလိမ်လည်မှုလုပ်ငန်းများ လုပ်ဆောင်ခဲ့ခြင်းကြောင့် လက်ရှိတွင် အမေရိကန်ဘဏ္ဍာရေးဝန်ကြီးဌာန၏ ပိတ်ဆို့အရေးယူမှုကို ခံထားရသည်။ ၎င်းကို အစိုးရက နိုင်ငံဖြတ်ကျော် ရာဇဝတ်မှုကျူးလွန်သည့် အဖွဲ့အစည်းအဖြစ် သတ်မှတ်ထားသည်။
အာရှ၊ အာဖရိကနှင့် အရှေ့အလယ်ပိုင်းတို့ရှိ အခြားသော ငွေလိမ်စခန်းများသည်လည်း တရုတ်ဖွဲ့စည်းပုံအခြေခံရှိသည့် ရာဇဝတ်ဂိုဏ်းများနှင့် ဆက်နွှယ်နေပြီး အမေရိကန်နိုင်ငံသားများကို အဓိကပစ်မှတ်ထားနေခြင်းဖြစ်ကြောင်း၊ အဆိုပါ အခြားသောစခန်းများကို ဖြိုခွင်းမည့် စစ်ဆင်ရေးများကိုလည်း ကမ္ဘာတစ်ဝန်းတွင် ဆက်လက်လုပ်ဆောင်နေဆဲဖြစ်ကြောင်း FBI အရာရှိတစ်ဦးက ကြာသပတေးနေ့တွင် Fox News Digital သို့ ပြောကြားခဲ့သည်။
“ငွေလိမ်စခန်းတွေဆိုတာ ဖုန်းခေါ်ဆိုတဲ့ Call Center သက်သက်တင် မဟုတ်ပါဘူး။ အမေရိကန်နိုင်ငံသားတွေဆီက ခိုးယူဖို့၊ ငွေကြေးခဝါချဖို့နဲ့ လူတွေကို အကြီးအကျယ် အမြတ်ထုတ်ဖို့ တည်ဆောက်ထားတဲ့ စနစ်ကျတဲ့ ရာဇဝတ်မှုလုပ်ငန်းစုတွေ ဖြစ်ပါတယ်” ဟု FBI ညွှန်ကြားရေးမှူး ကာ့ရှ် ပါတေးလ် (Kash Patel) က Fox News Digital သို့ ပေးပို့သည့် ထုတ်ပြန်ချက်တွင် ပြောကြားခဲ့သည်။
“ကမ္ဘောဒီးယားက Prince Group ကို ဖြိုခွင်းတာကနေ ဒူဘိုင်းက စစ်ဆင်ရေး (Operation Sand Dollar) အထိ FBI က ဦးဆောင်လှုပ်ရှားနေပါတယ်။ ကျွန်တော်တို့ဟာ လူကုန်ကူးခံရတဲ့ အလုပ်သမား ၂,၀၀၀ နီးပါးကို လွတ်မြောက်အောင် ကူညီပေးနိုင်ခဲ့ပြီး၊ ဒေါ်လာ ၈ ဘီလျံကျော် တန်ဖိုးရှိတဲ့ ငွေလိမ်စခန်းတွေရဲ့ လိမ်လည်မှုတွေကို ပိတ်ပစ်နိုင်ခဲ့သလို လူပေါင်း ၃၀၀ နီးပါးကိုလည်း ဖမ်းဆီးနိုင်ခဲ့ပါတယ်” ဟု ပါတေးလ်က ပြောကြားပြီး “ခင်ဗျားတို့က အမေရိကန်တွေကို ပစ်မှတ်ထားမယ်ဆိုရင် ကျွန်တော်တို့ ခင်ဗျားတို့ကို ရှာဖွေပြီး ခင်ဗျားတို့ရဲ့ ကွန်ရက်ကို ဖျက်ဆီးပစ်မှာဖြစ်သလို ဖက်ဒရယ်အစိုးရရဲ့ ရရှိနိုင်တဲ့ လက်နက်ကိရိယာ မှန်သမျှနဲ့ နှိမ်နင်းသွားမှာပါ”ဟုလည်း ဆက်လက်ပြောကြားသည်။
ထိုင်းနိုင်ငံတွင် ပြုလုပ်သည့် စစ်ဆင်ရေးတစ်ခု၌ FBI သည် စမတ်ဖုန်း ထောင်ပေါင်းများစွာနှင့် ရုံးသုံးပစ္စည်းများကို သိမ်းဆည်းခဲ့သည့် ဓာတ်ပုံများကို တွေ့ရသည်။ ဒူဘိုင်းတွင်မူ ပြည်တွင်းရဲတပ်ဖွဲ့နှင့် FBI တို့က လူပေါင်း ၂၇၅ ဦးကို ဖမ်းဆီးခဲ့ပြီး ၎င်းတို့အနက် ၆ ဦးကို ဖက်ဒရယ်အမှုရင်ဆိုင်ရန် အမေရိကန်နိုင်ငံသို့ လွှဲပြောင်းပေးသွားမည်ဖြစ်ကြောင်း FBI က ပြောကြားခဲ့သည်။ ထိုနေရာတွင် ဝင်ရောက်စီးနင်းခဲ့သည့် စခန်းကိုးခုစလုံးသည် တစ်နှစ်လျှင် လိမ်လည်ရရှိငွေ ဒေါ်လာ ၆ သန်းစီ ရရှိနေသည်ဟု စွပ်စွဲခံထားရသည်။ Prince Group သည် ကမ္ဘာတစ်ဝန်းတွင် ယခုကဲ့သို့ အစောင့်အကြပ် ထူထပ်သော စခန်းများကို ဖွင့်လှစ်ထားကြောင်း အာဏာပိုင်များက ပြောသည်။
ချန်ကျိသည် ကြေးနန်းစာဖြင့် လိမ်လည်မှု (Wire Fraud) နှင့် ငွေကြေးခဝါချရန် ပူးပေါင်းကြံစည်မှုတို့ဖြင့် ဖက်ဒရယ်အမှုများကို ရင်ဆိုင်နေရသည်။ FBI အရာရှိတစ်ဦးက Fox News Digital သို့ ပြောကြားရာတွင် အစိုးရအဖွဲ့သည် လွန်ခဲ့သည့် ၁၂ လတာကာလအတွင်း အဆိုပါဂိုဏ်းများကို နှိမ်နင်းရန် အဓိကဦးစားပေး လုပ်ဆောင်ခဲ့ကြောင်း ပြောသည်။ အဆိုပါ ဒေါ်လာ ၃ သန်း ဆုံးရှုံးခဲ့သည့် အမှုသည် Romance Scam (အွန်လိုင်းမှတစ်ဆင့် အချစ်ဇာတ်လမ်းဆင်၍ လိမ်လည်ခြင်း) ၏ သားကောင်ဖြစ်ခဲ့ရသူတစ်ဦး ပါဝင်ကြောင်း အရာရှိက ပြောကြားခဲ့ပြီး၊ အခြားသော လိမ်လည်မှုအချို့သည် ကြောက်မက်ဖွယ်ရာ ကိုယ့်ကိုယ်ကိုယ် သေကြောင်းကြံစည်မှုနှင့် ဆက်နွှယ်နေကြောင်း၊ အထူးသဖြင့် ဆယ်ကျော်သက်များကို ပစ်မှတ်ထားသည့် ငွေညှစ်မှု (Extortion) များ ဖြစ်ကြောင်း မှတ်ချက်ပြုခဲ့သည်။
အဆိုပါ ဂိုဏ်းအချို့သည် လုပ်အားအတွက် လူကုန်ကူးခံရသည့် သားကောင်များကို အမှီပြုထားကြောင်း FBI အရ သိရသည်။ လိမ်လည်သူများသည် လူများကို ဝင်ငွေကောင်းကောင်းနှင့် အလုပ်ဗီဇာ ကတိကဝတ်များဖြင့် ဆွဲဆောင်ကာ ငွေလိမ်လုပ်ငန်းများထဲသို့ သွေးဆောင်ခေါ်ယူလေ့ရှိပြီး၊ ထို့နောက် ရိုက်နှက်ခြင်း သို့မဟုတ် အခြားသော ညှင်းပန်းနှိပ်စက်နည်းများဖြင့် ခြိမ်းခြောက်ကာ ငွေလိမ်လည်မှုများ ပြုလုပ်ရန် ဖိအားပေး ခိုင်းစေကြသည်။
ထို့အပြင် FBI သည် အီလွန်မတ်စ် ပိုင်ဆိုင်သော ဂြိုဟ်တုကုမ္ပဏီဖြစ်သည့် Starlink နှင့် ပူးပေါင်းခဲ့ပြီး လိမ်လည်မှုများပြုလုပ်ရန် Starlink စက်များကို အသုံးပြုနေသည့် လိမ်လည်သူများကို ဖော်ထုတ်နိုင်ရန် ကမ္ဘာ့မြေမျက်နှာပြင် တည်နေရာပြဒေတာ (Geolocation Data) များကို ပံ့ပိုးပေးခဲ့သည်။ ထိုသို့ ပူးပေါင်းဆောင်ရွက်မှုမှတစ်ဆင့် Starlink သည် မြန်မာနိုင်ငံရှိ စက်ပစ္စည်းပေါင်း ၇,၀၀၀ ကျော်ကို လိုင်းပိတ်သိမ်းခဲ့ကြောင်း FBI မှ သိရသည်။
ယခုစစ်ဆင်ရေးသည် FBI ၏ အင်တာနက်ရာဇဝတ်မှု တိုင်ကြားရေးဗဟိုဌာန (IC3) သို့ ၂၀၂၅ ခုနှစ်အတွင်း ရရှိခဲ့သည့် တိုင်ကြားချက်များစွာမှတစ်ဆင့် စတင်ခဲ့ခြင်းဖြစ်သည်။ ထိုနှစ်အတွင်း IC3 သည် ခရစ်ပ်တိုငွေကြေး ရင်းနှီးမြှုပ်နှံမှု လိမ်လည်မှုနှင့်ပတ်သက်၍ ဒေါ်လာ ၇ ဒသမ ၅ ဘီလျံကျော် ဆုံးရှုံးခဲ့ရသည့် တိုင်ကြားချက်ပေါင်း ၇၂,၀၀၀ နီးပါးကို လက်ခံရရှိခဲ့သည်။ ယင်းပမာဏသည် အမှန်တကယ် ဆုံးရှုံးမှုများထက် များစွာ လျော့နည်း၍ ဖော်ပြထားခြင်းသာဖြစ်ကြောင်း FBI က ခန့်မှန်းထားသည်။ အမေရိကန် ငြိမ်းချမ်းရေးတိုက်တွန်းမှုအဖွဲ့ (USIP) ၏ ခန့်မှန်းချက်အရ ရာဇဝတ်ဂိုဏ်းများသည် နှစ်စဉ် ခန့်မှန်းခြေ ဒေါ်လာ ၆၄ ဘီလျံ ခိုးယူနေကြကြောင်း သိရသည်။
ခြုံငုံလုပ်ဆောင်သည့် Operation Blackout စစ်ဆင်ရေးတွင် အထက်တွင် ဖော်ပြခဲ့သည့် Prince Holding Group ကို စုံစမ်းစစ်ဆေးသည့် Operation Zephyr Exodus အပါအဝင် သီးခြားစစ်ဆင်ရေး အနည်းဆုံး လေးခု ပါဝင်သည်။ အခြားစစ်ဆင်ရေးတစ်ခုဖြစ်သည့် Operation Sand Dollar သည် အာရပ်စော်ဘွားများပြည်ထောင်စု (UAE) ရှိ အမေရိကန်နိုင်ငံသားများကို ပစ်မှတ်ထားကာ အာရှတစ်လွှားတွင် ရာဇဝတ်ဂိုဏ်းများက လည်ပတ်နေသည့် ငွေလိမ်စခန်းများကို ပစ်မှတ်ထား စုံစမ်းစစ်ဆေးခြင်း ဖြစ်သည်။
အခြားစစ်ဆင်ရေးတစ်ခုဖြစ်သည့် Operation Haochen သည် မြန်မာနိုင်ငံ၊ DKBA ထိန်းချုပ်ထားသော ကျောက်ခတ် (Kyaukhat) ဒေသရှိ ‘တိုင်းချန် (Tai Chang)’ ငွေလိမ်စခန်းကို စုံစမ်းစစ်ဆေးခြင်း ဖြစ်သည်။ အဆိုပါစခန်းသည် တရုတ်ရာဇဝတ်ဂိုဏ်းများနှင့် ဆက်နွှယ်နေသည်ဟု စွပ်စွဲခံထားရသည်။ FBI သည် တိုင်းချန်နှင့် အခြားငွေလိမ်စခန်းများနှင့် ဆက်နွှယ်နေသည့် ဒေါ်လာ သန်း ၃၀ ကို သိမ်းဆည်းခဲ့သည်။
Shunda စခန်း ဖြိုခွင်းမှု (Shunda Compound Takedown) တွင် FBI နှင့် ထိုင်းနိုင်ငံသား မိတ်ဖက်များ ပါဝင်သည့် ပူးပေါင်းအထူးအဖွဲ့ တစ်ဖွဲ့ ပါဝင်ခဲ့သည်။ ထိုစုံစမ်းစစ်ဆေးမှုကြောင့် ထိုင်းနိုင်ငံတွင် သံသယရှိသူ နှစ်ဦးကို ဖမ်းဆီးနိုင်ခဲ့ပြီး ကမ္ဘောဒီးယား တရားဥပဒေစိုးမိုးရေးအဖွဲ့အစည်းအဖြစ် ဟန်ဆောင်ကာ လိမ်လည်သည့် လုပ်ငန်းခွင်သို့ အဓမ္မလုပ်အားပေးခိုင်းစေရန် လူစုဆောင်းရာတွင် အသုံးပြုသည့် Telegram ချန်နယ်တစ်ခုကို သိမ်းဆည်းနိုင်ခဲ့သည်။
ထို့အပြင် FBI သည် ကြိုတင်ကာကွယ်သည့် အစီအစဉ်တစ်ခုအနေဖြင့် ခရစ်ပ်တိုရင်းနှီးမြှုပ်နှံမှု လိမ်လည်မှု၏ သားကောင်ဖြစ်နေသူများကို ဖော်ထုတ်ပြီး လိမ်လည်ခံနေရကြောင်း သတိပေးသည့် Operation Level Up စစ်ဆင်ရေးကိုလည်း အကောင်အထည်ဖော်ခဲ့သည်။ ထိုစစ်ဆင်ရေးမှတစ်ဆင့် FBI သည် သားကောင်ဖြစ်ရသူ ပေါင်း ၈,၉၃၅ ဦးကို အကြောင်းကြားပေးခဲ့ပြီးဖြစ်ရာ ၎င်းတို့အနက် ၇၇ ရာခိုင်နှုန်းမှာ မိမိတို့ လိမ်လည်ခံနေရသည်ကို သတိမပြုမိကြသူများ ဖြစ်သည်။ ယခုကဲ့သို့ အကြောင်းကြားမှုများကြောင့် ဆုံးရှုံးမှုတန်ဖိုး ဒေါ်လာ ၅၆၂ သန်းကို ကာကွယ်ပေးနိုင်ခဲ့သည်။
Ref : Fox News
About the Author
