အများပြည်သူဆိုင်နေရာဖြစ်သည့် ဘူရီရမ်ဆည်အတွင်း စုံတွဲတစ်တွဲက လိင်ဆက်ဆံနေမှုရုပ်သံဖိုင် ထွက်ပေါ်လာပြီးနောက် ပိုမိုတင်းကျပ်စွာ ကြီးကြပ်ကွပ်ကဲရန် စီစဉ်

သက်တံ့

၅. ၁၁. ၂၀၂၆

ထိုင်းနိုင်ငံ၊ ဘူရီရမ်ခရိုင် (Buriram)၊ နွန်ဒင်းဒဲင်း (Non Din Daeng) မြို့နယ်ရှိ လမ်နန်းရုန်း (Lam Nang Rong) ဆည်အတွင်း၌ လိင်ဆက်ဆံနေသည့် စုံတွဲတစ်တွဲကို ဖမ်းဆီးအရေးယူနိုင်ရန် တာဝန်ရှိသူများက စုံစမ်းရှာဖွေလျက် ရှိသည်။ အဆိုပါ ရုပ်သံဖိုင်သည် နိုဝင်ဘာ ၄ ရက်နေ့တွင် အွန်လိုင်းပေါ်၌ ပျံ့နှံ့သွားခဲ့ပြီး အပြင်းအထန် ဝေဖန်ပြစ်တင်မှုများ ထွက်ပေါ်ခဲ့သည်။

ရုပ်သံဖိုင်အတွင်း ရေနက်ရှိုင်းကြောင်းသတိပေးဆိုင်းဘုတ်အနီး ရေထဲတွင် အချင်းချင်း ပွေ့ဖက်နမ်းရှုပ်ကာ လိင်ဆက်ဆံနေသော စုံတွဲတစ်တွဲကို တွေ့ရသည်။ ၎င်းတို့သည် ကမ်းပါးနှင့် နီးကပ်သည့်နေရာတွင် ရှိနေသဖြင့် အခြားလာရောက်လည်ပတ်သူများကပါ ရှင်းလင်းစွာ မြင်တွေ့နိုင်ခဲ့သည်။

ရေကန်ဘေးရှိ သက်သာချောင်ချိရေးဆိုင်တွင် အလုပ်လုပ်ကိုင်သူ ဝါချရာပွန် သရီဘွန်ရတ် (Watcharaporn Sribunrat) က အဆိုပါ ညနေပိုင်းတွင် စားပွဲများပေါ်မှ ပန်းကန်များနှင့် ခွက်များကို သိမ်းဆည်းနေစဉ် ဤဖြစ်စဉ်ကို တွေ့ရှိခဲ့ခြင်းဖြစ်ကြောင်း မီဒီယာများကို ပြောကြားခဲ့သည်။ ထိုစုံတွဲထံ သွားရောက်ပြောဆိုရန် အဆင်မပြေသည့်အတွက် သူမ၏ အလုပ်များကို ပြီးစီးအောင် လုပ်ဆောင်ပြီးနောက် တွေ့မြင်ခဲ့ရသည်များကို အထက်လူကြီးထံ သတင်းပို့ခဲ့သည်ဟု ဆိုသည်။

ဝါချရာပွန်က အဆိုပါဆည်သည် မိသားစုများ လာရောက်အနားယူသည့် နေရာတစ်ခုဖြစ်ပြီး အများပြည်သူဆိုင်ရာ အငွေ့အသက်ကို နှောင့်ယှက်ဖျက်ဆီးခဲ့သည့် ထိုစုံတွဲကို ပြစ်တင်ဝေဖန်ခဲ့သည်။

အွန်လိုင်းပေါ်တွင် ဝေဖန်မှုများ ထွက်ပေါ်လာပြီးနောက် နွန်ဒင်းဒဲင်း ကျေးရွာအုပ်စု အုပ်ချုပ်ရေးအဖွဲ့မှ တာဝန်ရှိသူများက သွားရောက်စစ်ဆေးခဲ့ရာ ဤဖြစ်စဉ်သည် နိုဝင်ဘာ ၂ ရက် ညနေပိုင်း၊ တာဝန်ရှိသူများ နယ်မြေကင်းလှည့်နေချိန်တွင် ဖြစ်ပွားခဲ့ခြင်းဖြစ်ကြောင်း ပြောကြားခဲ့သည်။

ကျေးရွာအုပ်စု အုပ်ချုပ်ရေးမှူး ချာရစ် သမ္မာဝေါင်း (Charit Thammawong) နှင့် အခြားတာဝန်ရှိသူများက အခင်းဖြစ်ပွားရာနေရာသို့ သွားရောက်ကြည့်ရှုခဲ့ကြသည်။ ၎င်းဆည်အတွင်း ယခုကဲ့သို့ ပြုမူနေထိုင်သည့် မလျော်ကန်သော အပြုအမူမျိုးကို ပထမဆုံးအကြိမ် ကြုံတွေ့ဖူးခြင်းဖြစ်ကြောင်း ၎င်းတို့က ပြောသည်။ တာဝန်ရှိသူများ၏ အဆိုအရ ထိုစုံတွဲ ရိုက်ကူးခြင်းခံရသည့် နေရာသည် ရေကူးရန် သတ်မှတ်ထားသော ဧရိယာ၏ အပြင်ဘက်တွင် ရှိနေပြီး နှစ်ဦးစလုံး အသက်ကယ်အင်္ကျီ ဝတ်ဆင်ထားခြင်း မရှိကြောင်း သိရသည်။

အဆိုပါ စုံတွဲကို ညစ်ညမ်းဥပဒေဆိုင်ရာပုဒ်မများဖြင့် အရေးယူဆောင်ရွက်နိုင်ရန် တာဝန်ရှိသူများက စုံစမ်းစစ်ဆေးမှုများ ဆက်လက်လုပ်ဆောင်လျက် ရှိသည်။ သို့သော် စွဲဆိုမည့် ပုဒ်မ သို့မဟုတ် ကျခံရမည့် ပြစ်ဒဏ်များကိုမူ တာဝန်ရှိသူများက အသေးစိတ် ထုတ်ဖော်ပြောဆိုခြင်း မရှိသေးပေ။

အလားတူဖြစ်စဉ်များ ထပ်မံမဖြစ်ပွားစေရန်အတွက် သက်ဆိုင်ရာ ကျေးရွာအုပ်စု အဖွဲ့အစည်း၊ မြို့နယ်အုပ်ချုပ်ရေးအဖွဲ့တို့နှင့် ပူးပေါင်း၍ ဆည်အတွင်း ထိန်းချုပ်ကြီးကြပ်မှုများကို ပိုမိုတိုးမြှင့်ဆောင်ရွက်သွားရန် အာဏာပိုင်များက စီစဉ်လျက်ရှိသည်။

တာဝန်ရှိသူများက ဆည်၏ ဂုဏ်သတင်းကို ဝိုင်းဝန်းထိန်းသိမ်းကြရန်၊ စည်းကမ်းချက်များကို လိုက်နာရန်နှင့် အများပြည်သူဆိုင်ရာ နေရာများတွင် သင့်တော်လျော်ကန်စွာ ပြုမူကြရန် လာရောက်လည်ပတ်သူများကို တိုက်တွန်းနှိုးဆော်ထားသည်။

Ref: Thaiger