၂၁. ၅. ၂၀၂၅

Translated by Tha Doe

ထိုင်းဘတ် ၂ ဒသမ ၂ ဘီလျံကျော် အွန်လိုင်းလိမ်လည်မှုနှင့် ဆက်စပ်နေသည့် တရုတ်နိုင်ငံသား ၁၅ ဦးကို ခရီးသွားဗီဇာဖြင့် ဘဏ်အကောင့်ဖွင့်ရန် ကူညီပေးသည့် ဘဏ်မန်နေဂျာအပါအဝင် ၁၁ ဦးကို ထိုင်းအာဏာပိုင်များ ဖမ်းဆီးလိုက်သည်။

ထိုင်းတော်ဝင်ရဲတပ်ဖွဲ့က အွန်လိုင်းလိမ်လည်မှုကျုးလွန်သူ တရုတ်နိုင်ငံသားများ ကျူးလွန်သော ရာဇဝတ်မှုများတွင် ငွေလွှဲပြောင်းပေးသော ဘဏ်အကောင့် ၁၅ ခု ဖွင့်ရာ၌ အကူအညီပေးခဲ့သည့် ဘဏ်အရာရှိများကို ဖမ်းဆီး လိုက်သည့်အပြင် စုံစမ်းစစ်ဆေးသူများက အဆိုပါအမှုတွင် ပူးပေါင်းပါဝင်သူများကို ဖော်ထုတ်ရန် စုံစမ်းစစ်ဆေးမှုကို ချဲ့ထွင်နေသည်။

◾️ အရေးယူဆောင်ရွက်မှုနှင့် ဖမ်းဆီးမှုများ

ထိုင်းတော်ဝင်ရဲတပ်ဖွဲ့၏ အထွေထွေစစ်ဆေးရေးချုပ်နှင့် နည်းပညာရာဇဝတ်မှုနှိမ်နင်းရေးဌာန၏ ညွှန်ကြားရေးမှူး ရဲချုပ် သက်ချိုင်း ပီတာနီလာဘတ်က ယနေ့ မေလ ၂၁ ရက်နေ့တွင် တော်ဝင်ထိုင်းရဲတပ်ဖွဲ့ဌာနချုပ်၌ အဆိုပါ အွန်လိုင်းလိမ်လည်မှု အဓိကစစ်ဆင်ရေး၏ ရလဒ်များကို ကြေညာရန် သတင်းစာရှင်းလင်းပွဲတစ်ခု ပြုလုပ်ခဲ့သည်။

အဆိုပါ ရှင်းလင်းပွဲတွင် မြို့တော်ရဲတပ်ဖွဲ့နှင့် ခရိုင်ရဲတပ်ဖွဲ့ဒေသ (၂) တို့ ပူးပေါင်း၍ တရုတ်အွန်လိုင်းလိမ်လည်သူများကို ဘဏ်အကောင့်ဖွင့်ပေးခဲ့သည့် ဘဏ်မန်နေဂျာတစ်ဦးအပါအဝင် ဘဏ်ဝန်ထမ်း ၄ ဦး၊ ဘာသာပြန်သူ ၂ ဦး နှင့် အွန်လိုင်းလိမ်လည်သူတရုတ်များကို ကူညီပံ့ပိုးပေးခဲ့သည့် ထိုင်းနိုင်ငံသား ၅ ဦး ကို ဖမ်းဆီးခဲ့ရာ စုစုပေါင်း ၁၁ ဦး ဖမ်းဆီးရမိခဲ့သည်ဟု ပြောခဲ့သည်။

◾️ ဘဏ်အကောင့်ဖွင့်လှစ်မှုနှင့် ငွေကြေးလည်ပတ်မှု

စုံစမ်းစစ်ဆေးသူများက ရာဇဝတ်မှုအတွက် အသုံးပြုသော ဘဏ်အကောင့် ၁၅ ခု ကို ချွန်ဘူရီပြည်နယ်၊ ပတ္တရားရှိ ဘဏ်တစ်ခုတွင် ဖွင့်လှစ်ခဲ့ကြောင်း တွေ့ရှိခဲ့သည်။ အဆိုပါ အကောင့်များသည် ၂၀၂၅ ခုနှစ် မတ်လတွင် ထိုင်းနိုင်ငံသို့ ခရီးသွားဗီဇာဖြင့် ပထမဆုံးအကြိမ် လာရောက်ခဲ့ကြသော တရုတ်နိုင်ငံသား ၁၅ ဦး ၏ အမည်များဖြင့် ဖွင့်လှစ်ထားခြင်း ဖြစ်သည်။ ထိုင်းနိုင်ငံသားပူးပေါင်းပါဝင်သူများက အဆိုပါ တရုတ်နိုင်ငံသားများကို မတ်လ ၉ ရက်နေ့မှ စတင်၍ နိုင်ငံတစ်ဝန်းရှိ ဘဏ်များသို့ ဘဏ်အကောင့်ဖွင့်နိုင်ရန် လိုက်ပို့ပေးခဲ့ကြသည်။

ဘဏ်မန်နေဂျာများနှင့် ဝန်ထမ်းများက ခရီးသွားဗီဇာဖြင့် အကောင့်ဖွင့်ခွင့်ပြုရန် စာရွက်စာတမ်းများကို အတုပြုလုပ်ခဲ့သည်ဟု သံသယရှိခဲ့ပြီးနောက် တရုတ်နိုင်ငံသားများက မတ်လ ၁၃ ရက်နေ့တွင် တရုတ်နိုင်ငံသို့ ပြန်လည်ထွက်ခွာသွားခဲ့ကြသည်။ လက်ရှိကာလတွင် စုံစမ်းစစ်ဆေးမှုများ ဆက်လက်လုပ်ဆောင်နေသောကြောင့် ဘဏ်ဝန်ထမ်းများ ရရှိခဲ့သည့် ကော်မရှင်ကို ရဲတပ်ဖွဲ့က ထုတ်ဖော်ပြောကြားခြင်း မရှိသေးပေ။

ပြစ်မှုဆိုင်ရာစုံစမ်းစစ်ဆေးမှုအရ ဘဏ်အကောင့် ၁၅ ခုသည် ဘတ်ငွေ ၁၁၈ သန်း (အမေရိကန်ဒေါ်လာ ၃ ဒသမ ၆ သန်း) ခန့် လက်ခံရရှိခဲ့ပြီး၊ ၎င်းတို့အနက် ဘတ် ၉၁ သန်းကို ထုတ်ယူပြီးဖြစ်ကြောင်း သိရသည်။ ကျန်ရှိသော ငွေ ၂၇ သန်းကိုမူ အာဏာပိုင်များက ပိတ်ဆို့ထားပြီးဖြစ်သည်။ အဆိုပါ တရုတ်နိုင်ငံသားများ ဖွင့်လှစ်ခဲ့သော ဘဏ်အကောင့်များသည် လိမ်လည်မှု ၁၀၆ ခု နှင့် ဆက်စပ်နေကြောင်း တွေ့ရှိခဲ့ရပြီး ထပ်မံစုံစမ်းစစ်ဆေးမှုများအရ ၎င်းတို့သည် နိုင်ငံတစ်ဝန်းတွင် ဖြစ်ပွားခဲ့သော အမှုပေါင်း ၂,၀၈၄ မှု နှင့် ဆက်စပ်သည့် နောက်ထပ်အကောင့် ၄၆၂ ခု နှင့်လည်း ချိတ်ဆက်နေကာ စုစုပေါင်း အွန်လိုင်းလိမ်လည်မှုကြောင့် ဆုံးရှုံးရမှုပမာဏမှာ ဘတ် ၂ ဒသမ ၂ ဘီလျံ (အမေရိကန်ဒေါ်လာ ၆၇ ဒသမ ၃ သန်း) ခန့် ရှိကြောင်း ခန့်မှန်းထားသည်။

◾️ ဆက်လက်စုံစမ်းမှုများနှင့် မေးခွန်းထုတ်မှုများ

ရဲတပ်ဖွဲ့သည် လက်ရှိတွင် နိုင်ငံမှ ထွက်ပြေးသွားသော တရုတ်နိုင်ငံသား ၁၅ ဦးနှင့် ပတ်သက်၍ ဘက်ပေါင်းစုံမှ စုံစမ်းစစ်ဆေးမှုများကို ချဲ့ထွင်နေသည်။ သံသယရှိသူများထဲမှ ၅ ဦးသည် အိမ်နီးချင်းနိုင်ငံများတွင် လည်ပတ်နေသော ကောလ်စင်တာ အွန်လိုင်းလိမ်လည်မှုဂိုဏ်းများနှင့် ဆက်စပ်မှုရှိကြောင်း တွေ့ရှိပြီးနောက် ထိုင်းအာဏာပိုင်များက တရုတ်အရာရှိများနှင့် ပူးပေါင်းကာ ဖမ်းဝရမ်းထုတ်ပြန်ရန် ညှိနှိုင်းဆောင်ရွက်ခဲ့သည်။

ရဲတပ်ဖွဲ့သည် နိုင်ငံခြားသားများအား ခရီးသွားဗီဇာဖြင့် ဘဏ်အကောင့်ဖွင့်ခွင့်ပြုခြင်းဆိုင်ရာ လုပ်ထုံးလုပ်နည်းများ ကို သေချာစွာ ပြန်လည်သုံးသပ်ရန်အတွက် ထိုင်းဗဟိုဘဏ် (Bank of Thailand) ကိုလည်း ဆက်သွယ်ခဲ့သည်။ အဘယ်ကြောင့်ဆိုသော် ထိုသို့သော လုပ်ဆောင်မှုများသည် ကမ္ဘာတစ်ဝန်းရှိ အခြားနိုင်ငံများတွင် ခွင့်မပြုသောကြောင့်ဖြစ်သည်။

Ref Khaosod