၁၀.၉.၂၀၂၆
Translated by Htwe Ko Tun
ဆီးရီးယားနိုင်ငံတွင် အချိန်ကာလ ရှည်လျားသော ပြည်တွင်းစစ်၏ လက်နက်များနှင့် အကြွင်းအကျန်များကို သိုလှောင်ရန်အသုံးပြုသည့် ယာယီနေရာတစ်ခု၌ စက်တင်ဘာလ ၉ ရက်က ပေါက်ကွဲမှုကြောင့် အနည်းဆုံး လူ ၁၄ ဦး သေဆုံးပြီး နောက်ထပ် ၁၁ ဦး ဒဏ်ရာရရှိခဲ့ကြောင်း အာဏာပိုင်များက သတင်း ထုတ်ပြန်ခဲ့သည်။
ပေါက်ကွဲမှုက နိုင်ငံ အနောက်မြောက်ပိုင်း အစ်ဒလစ်ဘ်ပြည်နယ်ရှိ ဆာမာဒါမြို့အနီးတွင် ဖြစ်ပွားခဲ့ကြောင်း သိရသည်။
အရေးပေါ်ဝန်ဆောင်မှုများနှင့် ကြက်ခြေနီဝန်ထမ်းများက အပျက်အစီးများအောက်တွင် ပိတ်မိနေနိုင်သူများကို ရှာဖွေရန်နှင့် ကယ်ဆယ်ရေးလုပ်ငန်းများကို အမြန်ဆုံး လုပ်ဆောင်ရန် အလျင်အမြန် သွားရောက်ခဲ့ကြသည်။
ဆီးရီးယားကာကွယ်ရေးဝန်ကြီးဌာနက စစ်ပွဲမှ လက်နက်များနှင့် အကြွင်းအကျန်များကို အခြားနေရာသို့ ပို့ဆောင်ခြင်းမပြုမီ ယာယီသိမ်းဆည်းထားကြောင်း ပြောကြားခဲ့သည်။ ဒဏ်ရာရရှိသူများထဲတွင် ၎င်း၏ ဝန်ထမ်းအချို့ ပါဝင်ကြောင်းလည်း ပြောကြားခဲ့သည်။
ပေါက်ကွဲလွယ်သောပစ္စည်းများ ပြည့်နှက်နေသော နယ်မြေအတွင်း ဒုတိယအကြိမ်ပေါက်ကွဲမှုများနှင့် မီးလောင်မှုများ ဖြစ်ပွားခဲ့ပြီး အရေးပေါ်တုံ့ပြန်ဆောင်ရွက်မှုကို အနှောင့်အယှက်ဖြစ်စေခဲ့သည်။ စက်တင်ဘာလ ၉ ရက်တွင် ပေါက်ကွဲမှုနေရာမှ မီးခိုးများ တစ်ချိန်လုံး ထွက်ပေါ်နေခဲ့သည်။ “ဆာမာဒါမြို့အနီးရှိ လက်နက်နှင့် စစ်ကျန်ပစ္စည်းများ စုဆောင်းရန် ယာယီသိုလှောင်ရုံတွင် ပေါက်ကွဲမှုကြောင့် သေဆုံးသူအရေအတွက်မှာ ကနဦးစာရင်းအရ ၁၄ ဦး သေဆုံးပြီး ၁၁ ဦး ဒဏ်ရာရရှိခဲ့သည်” ဟု အစ်လစ်ဘ် ကျန်းမာရေးဌာနက ပြောကြားခဲ့သည်။
အာဏာပိုင်များက ပေါက်ကွဲမှုဖြစ်ပွားရခြင်းအကြောင်းရင်းကိုမူ မပြောကြားကြသေးပေ။။
ယခုလတွင် အစ်လစ်ဘ်ပြည်နယ်၌ ဒုတိယအကြိမ်မြောက် သေဆုံးမှုဖြစ်ရပ်ဖြစ်သည်။ စက်တင်ဘာ ၁ ရက်တွင် ဘင်နစ်ရှ်တွင် ခဲယမ်းမီးကျောက်တင်ဆောင်လာသော ယာဉ်တစ်စီး ပေါက်ကွဲခဲ့ရာ လူ ၅ ဦး သေဆုံးပြီး အခြားသူများ ဒဏ်ရာရရှိခဲ့သည်။
ဆီးရီးယားသည် ဆယ်စုနှစ်တစ်ခုကျော်ကြာ ပြည်တွင်းစစ်မှ မကြာသေးမီကမှ လွတ်မြောက်လာခဲ့ပြီး သမ္မတသစ် အာမက် အယ်လ်ရှာရာအား သစ္စာခံတပ်ဖွဲ့များက ဘာရှာအာဆတ်ကို ရာထူးမှ ဖယ်ရှားပြီး ဒမတ်စကတ် မြို့ကို ထိန်းချုပ်ခဲ့သည်။ အစ်လစ်ဘ်သည် စစ်ပွဲအတွင်း နိုင်ငံ၏ အဆိုးရွားဆုံး ထိခိုက်ခံစားခဲ့ရသော ဒေသများထဲမှ တစ်ခုဖြစ်သည်။
၂၀၁၁ ခုနှစ်မှ ၂၀၂၄ ခုနှစ်နှောင်းပိုင်းအထိ ပြင်းထန်သောတိုက်ပွဲများအပြီးတွင် အစ်လစ်ဘ် ပြည်နယ် သည် စစ်ဘက်လက်နက်ပစ္စည်းများဖြင့် ပြည့်နှက်နေဆဲဖြစ်သည်။
Ref; DW News
About the Author
