နေမိုး
၃၀. ၈. ၂၀၂၆
“ဝ” လက်နက်ကိုင် UWSA ထိန်းချုပ်ထားသည့်တောင်ပိုင်း ၁၇၁ စစ်ဒေသမှ မြန်မာ-ထိုင်းနယ်စပ် BP1 နယ်စပ်မျဉ်း၌ နယ်စပ်ဖြတ်ကျော် မူးယစ်ဆေးဝါးများ ကြားဖြတ်ဖမ်းဆီးရမိသော်လည်း တရားခံများ လွတ်မြောက်သွားကြောင်း UWSA ပြောရေးဆိုခွင့်ရှိသူ ဦးညီရန်းက အသိပေးသည်။
သတင်းအရ နယ်စပ်ဖြတ်ကျော် မူးယစ်ဆေးဝါးများ မြန်မာနိုင်ငံ ထိန်းချုပ်နယ်မြေ BP1 နယ်စပ်မျဉ်းသို့ သယ်ယူပို့ဆောင်ပြီး ထိုင်းနိုင်ငံသို့ မှောင်ခိုတင်သွင်းမည်ဖြစ်ကြောင်းသိရှိရသဖြင့် “ဝ”လက်နက်ကိုင်များက အလွန်အရေးကြီး အခြေအနေအဖြစ် ကင်းလှည့်ခြင်းနှင့် တပ်ဖြန့်ချထားခြင်းများကို လျင်မြန်စွာ ပြုလုပ်နိုင်ရန် တပ်ဖွဲ့များကို ဖွဲ့စည်းပေးခဲ့သည်။ အရာရှိနှင့် တပ်သား ၇၁ ဦး (ဝန်ထမ်းရုံးမှ ၅ ဦး၊ အထူးစစ်ဆင်ရေးတပ်ခွဲမှ ၇ ဦး၊ ကင်းတပ်ခွဲမှ ၁၀ ဦး၊ တပ်ရင်းမှ ၃၁ ဦးနှင့် ပြည်သူ့စစ် ၁၈ ဦး) ကို စောင့်ကြည့်ရန်အတွက် BP1 နယ်စပ်မျဉ်းသို့ စေလွှတ်ခဲ့ပြီး နယ်စပ်ဖြတ်ကျော်ဂိတ်တွင် ကင်းစောင့်များကို ချထားခဲ့သည်။ တစ်ချိန်တည်းမှာပင် သံသယဖြစ်ဖွယ် ယာဉ်များနှင့် မှောင်ခိုဂိုဏ်းများအား တင်းကျပ်စွာ စုံစမ်းစစ်ဆေး ရန် ဆောင်ရွက်ခဲ့သည်။
ထိုသို့ ခြေရာခံအပြီး ၂၀၂၆ ခုနှစ် ဩဂုတ်လ ၂၈ ရက်နေ့ သန်းခေါင်ယံခန့်အချိန် နယ်စပ်ရှိ ယာယီ ကင်းစခန်းတစ်ခုတွင် BP1 (C-45) တည်နေရာ (E: 98°56′01″, N: 19°45′52″) ၏ အနောက်တောင်ဘက် မီတာ ၇၇၉ အကွာတွင် လုံခြုရေးတပ်ဖွဲ့များသည် လူ ၁၀-၁၅ ဦးခန့်ရှိသော သံသယရှိ မူးယစ်ဆေးဝါး မှောင်ခိုဂိုဏ်းတစ်ဂိုဏ်း ဝင်ရောက်လာသည်ကို တွေ့ရှိခဲ့သည်။ ၎င်းတို့အား ချက်ချင်းရပ်တန့်စစ်ဆေးရန် အမိန့်ပေးခဲ့သော်လည်း ထွက်ပြေးခဲ့ကြသည်။
ထိတ်လန့်တုန်လှုပ်စွာဖြင့် သံသယရှိသူများသည် မူးယစ်ဆေးဝါးများကို စွန့်ပစ်ပြီး မှောင်မိုက်မှုနှင့် ရှုပ်ထွေးသော မြေပြင်အနေအထားအောက်တွင် ထိုင်းနိုင်ငံသို့ ထွက်ပြေးခဲ့ကြသည်။ လိုက်လံဖမ်းဆီးစဉ်အတွင်း မက်သာဖက်တမင်း ၁၁ ထုပ် (ဆေးပြား ၂,၇၈၂,၀၀၀) ကို သိမ်းဆည်းရမိခဲ့သည်။ မူးယစ်ဆေးဝါး မှောင်ခိုဂိုဏ်း၏ ထွက်ပြေးလမ်းကြောင်းအပေါ် အခြေခံ၍ ထိုနေရာတွင် တပ်စွဲထားသော လုံခြုံရေးတပ်ဖွဲ့ များသည် အဖွဲ့များစွာ ခွဲ၍ လမ်းကြောင်းများစွာမှ လိုက်လံဖမ်းဆီးမှုများ ပြုလုပ်ခဲ့ကြသည်။
တစ်ချိန်တည်းမှာပင် ၎င်းတို့သည် ပိတ်ဆို့မှုများနှင့် အနီးတစ်ဝိုက်ရှိ နေရာများကို သေချာစွာ ရှာဖွေမှုများ ပြုလုပ်ခဲ့ပြီး ထွက်ပြေးသွားသည့် မူးယစ်ဆေးဝါး မှောင်ခိုသမားများအား ဖမ်းဆီးရန် အရင်းအမြစ်အမျိုးမျိုးမှ သဲလွန်စများကို စုဆောင်းပြီး BP1 နယ်စပ်တစ်လျှောက်၌ သေချာစွာရှာဖွေခြင်းနှင့် လိုက်လံဖမ်းဆီးနိုင်ခြင်းများကို ဆက်လက်လုပ်ဆောင်နေကြကြောင်း UWSA ၏ ထုတ်ပြန်ချက်တွင် ဖော်ပြမှုအရ သိရသည်။
About the Author
