MT News
၁၂. ၇. ၂၀၂၆
တရုတ်နိုင်ငံ အနောက်တောင်ပိုင်း ယူနန်ပြည်နယ်၊ ဖူယွမ်ခရိုင် (Fuyuan)၊ လောက်ချန်မြို့နယ် (Laochang) တွင် စနေနေ့က ယာဉ်တိုက်မှုတစ်ခု ဖြစ်ပွားခဲ့ပြီး လူ ၆ ဦး သေဆုံးခဲ့ကြောင်း ဒေသခံရဲတပ်ဖွဲ့က တနင်္ဂနွေနေ့တွင် ပြောကြားခဲ့သည်။
စနေနေ့ နံနက် ၈ နာရီခန့်တွင် ဘိလပ်မြေဖျော်စက်တင်ဆောင်လာသည့် ကုန်တင်ကားတစ်စီးသည် အိမ်စီးကားအသေးတစ်စီးနှင့် တိုက်မိပြီးနောက် တိမ်းမှောက်သွားခဲ့ရာ၊ ဘိလပ်မြေဖျော်သည့်စက်ကြီးက အိမ်စီးကားပေါ်သို့ ဖိမိသွားခဲ့သဖြင့် ကားမောင်းသူအပါအဝင် လူ ၆ ဦး သေဆုံးခဲ့ကြောင်း အဆိုပါခရိုင်ရဲတပ်ဖွဲ့၏ ပြောကြားချက်အရ သိရသည်။
မတော်တဆမှုသတင်းကို လက်ခံရရှိသည်နှင့်တစ်ပြိုင်နက် ရဲတပ်ဖွဲ့သည် အရေးပေါ်ကယ်ဆယ်ရေးအဖွဲ့များ၊ ဆေးဘက်ဆိုင်ရာဝန်ထမ်းများနှင့်အတူ အခင်းဖြစ်ပွားရာနေရာသို့ အမြန်ဆုံးသွားရောက်ကာ ကယ်ဆယ်ရေးလုပ်ငန်းများ လုပ်ဆောင်ခြင်းနှင့် စုံစမ်းစစ်ဆေးမှုများကို စတင်ခဲ့ကြသည်။
လူး (Liu) ဟု မျိုးရိုးအမည်ရှိသည့် ကုန်တင်ကားမောင်းသူအား ရဲတပ်ဖွဲ့က ဖမ်းဆီးထိန်းသိမ်းထားသည်။ မူလပဏာမ စစ်ဆေးချက်များအရ ၎င်းတွင် အရက်သေစာ သို့မဟုတ် မူးယစ်ဆေးဝါး သုံးစွဲထားခြင်းမရှိကြောင်း အတည်ပြုထားသည်။ အဆိုပါဖြစ်စဉ်နှင့်ပတ်သက်၍ နောက်ဆက်တွဲစုံစမ်းစစ်ဆေးမှုများနှင့် လုပ်ထုံးလုပ်နည်းများကို ဆက်လက်လုပ်ဆောင်လျက်ရှိသည်။
Ref: Xinhua
About the Author
