ထိုင်းလက်ဝှေ့ကျော် အိုလံပစ်ရွှေတံဆိပ်ဆုရှင်ဟောင်းအား အရွယ်မရောက်သေးသူကို လှည့်ဖြား ခေါ်ဆောင်မှု၊ လိင်ပိုင်းဆိုင်ရာထိပါးမှုတို့ဖြင့် ပြစ်ဒဏ်ချ

သက်တံ့

၂၁. ၁၀. ၂၀၂၆

အသက် ၁၇ နှစ်အရွယ် မိန်းကလေးငယ်တစ်ဦးအား လှည့်ဖြား ခေါ်ဆောင်သွားသည့် အမှုတွင် အယူခံတရားရုံး အပိုင်း (၄) က အိုလံပစ်ရွှေတံဆိပ်ဆုရှင်ဟောင်း ထိုင်းလက်ဝှေ့သမား ဆွမ်ရက် ခမ်ဆင်း (Somrak Khamsing) အား ဆိုင်းငံ့ပြစ်ဒဏ်မပါဘဲ ထောင်ဒဏ် ၂ နှစ် ပြစ်ဒဏ်ချမှတ်ခဲ့ပြီး နစ်နာကြေးကို ဘတ် ၈၀,၀၀၀ သတ်မှတ်လိုက်ကြောင်း သိရသည်။

အယူခံတရားရုံးသည် အောက်တရားရုံး၏ ဆုံးဖြတ်ချက်ကို ပြင်ဆင်ခဲ့ပြီး မုဒိမ်းကျင့်ရန် ကြံစည်မှုဖြင့် ပြစ်ဒဏ်ချမှတ်ထားခြင်းကို ပယ်ဖျက်ကာ အရွယ်မရောက်သေးသူအား ဥပဒေမဲ့ ခေါ်ဆောင်သွားသည့် ပြစ်မှုကိုသာ အတည်ပြုခဲ့သည်။ ထောင်ဒဏ်ပြစ်ဒဏ်ကို ဆိုင်းငံ့ထားခြင်း မရှိပေ။

အဆိုပါအမှုသည် ၂၀၂၃ ခုနှစ်၊ ဒီဇင်ဘာ ၁၀ ရက်က ဖြစ်ပွားခဲ့သော ဖြစ်စဉ်တစ်ခုမှ စတင်ခဲ့ခြင်းဖြစ်ပြီး ဆွမ်ရက်သည် ဖျော်ဖြေရေးစခန်းတစ်ခုတွင် တွေ့ဆုံခဲ့သည့် အသက် ၁၇ နှစ်အရွယ် မိန်းကလေးအား လိင်ပိုင်းဆိုင်ရာ စော်ကားကျူးလွန်ခဲ့သည်ဟု စွပ်စွဲခံခဲ့ရခြင်း ဖြစ်သည်။

မူလသတင်း ဖော်ပြချက်များအရ အောက်တရားရုံးက ၎င်းအား စုစုပေါင်း ထောင်ဒဏ် ၄ နှစ်နှင့် ၈ လ ချမှတ်ခဲ့သော်လည်း တရားရင်ဆိုင်ရာတွင် ပူးပေါင်းဆောင်ရွက်ခဲ့မှုကြောင့် ပြစ်ဒဏ်၏ ထက်ဝက်ဖြစ်သော ထောင်ဒဏ် ၂ နှစ်၊ ၄ လနှင့် ၁၀ ရက် သို့ လျှော့ချပေးခဲ့သည်။ ထို့အပြင် ပြစ်မှုကျူးလွန်သည့်နေ့မှစ၍ နှစ်စဉ် အတိုး ၅ ရာခိုင်နှုန်းနှင့်အတူ နစ်နာသူ၏ ဆွေမျိုးများကို နစ်နာကြေး ဘတ် ၅၀,၀၀၀ နှင့် နစ်နာသူ မိန်းကလေးအား ဘတ် ၁၂၀,၀၀၀ ပေးလျော်ရန်လည်း အမိန့်ထုတ်ခဲ့သည်။ ထို့နောက် ခွန်ခန့်ခရိုင်တရားရုံးက အာမခံကြေး ဘတ် ၃၀၀,၀၀၀ သတ်မှတ်ကာ အယူခံဝင်နေစဉ် ကာလအတွင်း ဆွမ်ရက်အား ယာယီ လွတ်မြောက်ခွင့် ပြုခဲ့သည်။

၎င်းသည် အောက်တိုဘာ ၂၀ ရက် နံနက် ၉ နာရီခွဲခန့်တွင် အယူခံတရားရုံး အပိုင်း ၄ သို့ ရောက်ရှိလာခဲ့ပြီး ၎င်းအား ဝန်းရံအားပေးရန် သူငယ်ချင်း ၁၀ ဦးထက်မက လိုက်ပါလာခဲ့ကြသည်။ အမိန့်ဒီဂရီကို ဝင်ရောက်မနာယူမီ ၎င်းက သတင်းထောက်များကို တစ်စုံတစ်ရာ ပြောကြားခဲ့ခြင်း မရှိပေ။

အယူခံတရားရုံး၏ ပြင်ဆင်လိုက်သည့် အမိန့်အရ ပြစ်မှုအချို့ လျော့ကျသွားသဖြင့် ထောင်ဒဏ်လျော့ကျသွားသလို နစ်နာကြေး ပမာဏကို ဘတ် ၈၀,၀၀၀ သို့ ပြန်လည်လျှော့ချခဲ့သည်။ ဆွမ်ရက်သည် ယခင်က တရားရုံးတွင် ဘတ် ၁၂၀,၀၀၀ စာရင်းတင်သွင်း ထားပြီးဖြစ်ကြောင်း အစီရင်ခံစာတွင် ဖော်ပြထားသည်။

ဆွမ်ရက်သည် ထိုင်းနိုင်ငံ၏ အထင်ကရ အားကစားသမားများအနက် တစ်ဦးဖြစ်သည်။ ၁၉၉၆ ခုနှစ်၊ ဩဂုတ် ၄ ရက်တွင် အမေရိကန်ပြည်ထောင်စု၊ ဂျော်ဂျီယာပြည်နယ်၊ အတ္တလန်တာ အိုလံပစ်ပြိုင်ပွဲတွင် အမျိုးသား အပျော်တမ်း ဖယ်သာဝိတ် ဘောက်ဆင်ပြိုင်ပွဲ၌ ရွှေတံဆိပ် ဆွတ်ခူးခဲ့ပြီး အိုလံပစ် ရွှေတံဆိပ် ရရှိသည့် ပထမဆုံး ထိုင်းအားကစားသမား ဖြစ်လာခဲ့သည်။

ယခု အယူခံတရားရုံး၏ ဆုံးဖြတ်ချက်သည် အဆိုပါအမှုအတွက် သိသာထင်ရှားသော အပြောင်းအလဲတစ်ခု ဖြစ်လာခဲ့ပြီး ထောင်ဒဏ်ပြစ်ဒဏ်ကို ဆိုင်းငံ့ပေးခြင်း မရှိသဖြင့် ကျူးလွန်ပြစ်ဒဏ်ကို ချက်ချင်း ကျခံရမည်ဖြစ်သည်။

Ref: Khaosod