သတိုး
၁၃ . ၅. ၂၀၂၆
အိန္ဒိယနိုင်ငံတွင် လေကြောင်းဘေးကင်းလုံခြုံရေး စံချိန်စံညွှန်းများနှင့်ပတ်သက်၍ စိုးရိမ်မှုများ ပြန်လည်မြင့်တက်လာစဉ် ယနေ့နံနက်ပိုင်းက မဟာရဋ္ဌပြည်နယ်၊ ဘာရာမာတီ (Baramati) လေဆိပ်အနီး၌ လူနှစ်ယောက်စီး လေ့ကျင့်ရေးလေယာဉ်တစ်စင်း အရေးပေါ်ဆင်းသက်ရာမှ ပျက်ကျခဲ့သော်လည်း သင်တန်းသားလေသူရဲမှာ အသက်ဘေးမှ လွတ်မြောက်ခဲ့သည်။
ဖြစ်စဉ်မှာ ယနေ့ မေလ ၁၃ ရက် (ဗုဒ္ဓဟူးနေ့) နံနက် ၈ နာရီ ၅၀ မိနစ်ခန့်တွင် ပူနေး (Pune) ခရိုင်၊ ဂိုဂျူဘာဗီ (Gojubavi) ကျေးရွာအနီး၌ ဖြစ်ပွားခဲ့ခြင်းဖြစ်ပြီး ပျက်ကျသောလေယာဉ်မှာ Redbird Flight Training Academy မှ ပိုင်ဆိုင်သော လူနှစ်ယောက်စီး လေ့ကျင့်ရေးလေယာဉ်ဖြစ်သည်။ လေယာဉ်ပေါ်တွင် သင်တန်းသားလေသူရဲ တစ်ဦးတည်းသာပါရှိပြီး ကြီးကြီးမားမား ဒဏ်ရာရရှိခြင်းမရှိဘဲ လွတ်မြောက်ခဲ့သည်။ မြေပြင်ရှိ လူများလည်း ထိခိုက်မှုမရှိပေ။
လေယာဉ်သည် ပျံသန်းနေစဉ်အတွင်း နည်းပညာပိုင်းဆိုင်ရာ ချို့ယွင်းမှု (Technical Snag) ဖြစ်ပေါ်ခဲ့သဖြင့် အရေးပေါ်ဆင်းသက်ရန် ကြိုးပမ်းခဲ့ခြင်းဖြစ်သည်။ နိမ့်သော အမြင့်ပေမှ ဆင်းသက်ရန် ကြိုးစားစဉ် ဟန်ချက်ပျက်သွားပြီး အနီးရှိ ဓာတ်တိုင်တစ်ခုနှင့် ငြိကာ မြေပြင်ပေါ်သို့ ပျက်ကျခဲ့ခြင်းဖြစ်ကြောင်း ရဲတပ်ဖွဲ့က ပြောကြားခဲ့သည်။
ယခုဖြစ်စဉ်သည် ဘာရာမာတီလေဆိပ်၏ ဘေးကင်းလုံခြုံရေးနှင့် ပတ်သက်၍ မေးခွန်းထုတ်စရာများ ဖြစ်လာစေသည်။ ယခု ၂၀၂၆ ခုနှစ်၊ ဇန်နဝါရီလအတွင်းကလည်း မဟာရဋ္ဌပြည်နယ် ဝန်ကြီးချုပ်ဟောင်း Ajit Pawar အပါအဝင် ၅ ဦး သေဆုံးခဲ့သည့် Learjet 45 လေယာဉ်ပျက်ကျမှု ဖြစ်ပွားခဲ့ဖူးသည်။ ပြီးခဲ့သည့် ၂၀၂၅ ခုနှစ်ကလည်း လေ့ကျင့်ရေးလေယာဉ်တစ်စင်း ငှက်နှင့်တိုက်မိပြီး ဆင်းသက်မှု ကြမ်းတမ်းခဲ့သည့် ဖြစ်စဉ်တစ်ခု ရှိခဲ့ဖူးသည်။ ဒေသတွင်း လေဆိပ်ငယ်များတွင် လုံလောက်သော အခြေခံအဆောက်အအုံ မရှိခြင်း၊ ရာသီဥတုဆိုးရွားခြင်းနှင့် လုပ်ငန်းပိုင်းဆိုင်ရာ အားနည်းချက်များ ရှိနေကြောင်း စုံစမ်းစစ်ဆေးရေးအဖွဲ့ (AAIB) က ထောက်ပြထားသည်။
လက်ရှိအခြေအနေတွင် လေကြောင်းညွှန်ကြားမှုဦးစီးဌာန (DGCA) နှင့် အခြားအဖွဲ့အစည်းများက လေယာဉ်၏ ပြုပြင်ထိန်းသိမ်းမှုမှတ်တမ်းများနှင့် နည်းပညာပိုင်းဆိုင်ရာများကို အသေးစိတ် စစ်ဆေးသွားမည်ဖြစ်သည်။ အိန္ဒိယနိုင်ငံ၏ လေကြောင်းကဏ္ဍ အရှိန်အဟုန်ဖြင့် ဖွံ့ဖြိုးလာသည်နှင့်အမျှ လေ့ကျင့်ရေးကျောင်းများနှင့် ဒေသတွင်းလေဆိပ်များတွင် ဘေးကင်းလုံခြုံရေး စံနှုန်းများကို ပိုမိုတင်းကျပ်စွာ စောင့်ကြည့်ရန် လိုအပ်နေပြီဖြစ်ကြောင်း ကျွမ်းကျင်သူများက ဆိုသည်။
Ref : TLI
About the Author
