၂၃.၁၀.၂၀၂၆
Written by KL
မွန်ပြည်နယ်၊ မော်လမြိုင်မြို့နယ်၊ သာယာအေးရပ်ကွက်၊ မေတ္တာလမ်းရှိ နေအိမ်တစ်လုံးတွင် ကလေးငယ်တစ်ဦး ခေါက်ဆွဲပြုတ်ရာမှ နေအိမ်တစ်လုံး မီးလောင်ဆုံးရှုံးမှု ယနေ့ အောက်တိုဘာလ ၂၃ ရက် နံနက် ၁၁ နာရီခွဲခန့်က ဖြစ်ပွားခဲ့ကြောင်း မီးငြှိမ်းသတ်သူများထံမှ သိရသည်။
” ၁၂ နှစ်သား ကလေးက ခေါက်ဆွဲပြုတ်ရင်း ထရံကို မီးကူးပြီး စလောင်တာပါ။ နေအိမ်တစ်လုံးပဲ မီးထဲပါသွားတယ်”ဟု မီးငြိမ်းသတ်သူတစ်ဦးက ပြောသည်။
မီးလောင်မှုကြောင့် ပျဉ်ခင်း၊ ဓနိမိုး၊ ထရံကာ နေအိမ်တစ်လုံးနှင့် အတွင်းပစ္စည်းများ မီးလောင်ဆုံးရှုံးခဲ့သော်လည်း လူထိခိုက်သေဆုံးမှုမရှိကြောင်း သိရသည်။
နေအိမ်မီးလောင်မှုကို မော်လမြိုင်မြို့နယ်မီးသတ်စခန်းမှ မီးငြှိမ်းသတ်ယာဉ် ၂ စီး၊ ရေသယ်ယာဉ် ၂ စီး အပါအဝင် သန္ဓေအရန် မီးသတ်တပ်ဖွဲ့ဝင်များ၊ မော်လမြိုင်မြို့ပေါ်ရှိလူမှုကယ်ဆယ်ရေးအဖွဲ့များ၊ ရပ်ကွက်နေ ပြည်သူများက ဝိုင်းဝန်းငြှိမ်းသတ်ခဲ့ကြရာ နံနက် ၁၁ နာရီ ၄၅ မိနစ်တွင် မီးငြိမ်းခဲ့ကြောင်း သိရသည်။
အောက်တိုဘာလ ၂၁ ရက် နံနက် ၁၀ နာရီခန့်ကလည်း မွန်ပြည်နယ်၊ ရေးမြို့နယ်၊ သောင်ပြင်ကျေးရွာ ကျောက်တိုင်ရပ်တွင် ဆိုလာအပူလွန်ကဲရာမှ လူနေအိမ်သုံးလုံး မီးလောင်ဆုံးရှုံးခဲ့သည်။
About the Author
