သက်တံ့
၂၃. ၁၀. ၂၀၂၆
ထိုင်းနိုင်ငံ၊ ကန်ချနဘူရီခရိုင်၊ သောင်းဖာဖုမ်းမြို့နယ်တွင် အလယ်တန်းကျောင်းသူတစ်ဦးသည် ပါဆယ်ထုပ်အတွင်း ဖွက်၍သယ်ဆောင်လာသော စိတ်ကြွဆေးပြား ၄,၀၃၈ ပြားနှင့်အတူ ဖမ်းဆီးခံခဲ့ရသည်။ သူမကမူ ဆေးဝါးများပါရှိကြောင်း မသိရှိဘဲ ဘတ်ငွေ ၂,၀၀၀ ရရှိရန်အတွက်သာ အဆိုပါသယ်ယူပို့ဆောင်မှုကို လက်ခံခဲ့ခြင်းဖြစ်ကြောင်း ထွက်ဆိုခဲ့သည်။
သောင်းဖာဖုမ်းမြို့နယ် ရဲတပ်ဖွဲ့သည် နယ်စပ်မြို့နယ်ဖြစ်သော စံခလဘူရီ (Sangkhla Buri) မှ မူးယစ်ဆေးဝါး ကုန်ကူးသည့်ကွန်ရက်က အသက်မပြည့်သေးသူ လူငယ်များကို အသုံးချကာ မူးယစ်ဆေးဝါး သယ်ဆောင်ခိုင်းနေကြောင်း သတင်းရရှိခဲ့ပြီးနောက် အောက်တိုဘာလ ၂၂ ရက် (မနေ့က) တွင် အဆိုပါ အသက် ၁၅ နှစ်အရွယ် မိန်းကလေးကို ဖမ်းဆီးထိန်းသိမ်းခဲ့ခြင်း ဖြစ်သည်။
သောင်းဖာဖုမ်းရဲစခန်းမှ တပ်ဖွဲ့ဝင်များသည် ခရိုင်အရာရှိများ၊ လတ်ယာ (Lat Ya) တပ်ဖွဲ့မှ စစ်သည်များနှင့် နယ်ခြားစောင့်ရဲတပ်ဖွဲ့တို့ ပူးပေါင်းကာ မူးယစ်ဆေးဝါး တင်ဆောင်လာသည်ဟု ယူဆရသော ခရီးသည်တင် ဗင်ကားတစ်စီးကို စောင့်ကြည့်ခဲ့ကြသည်။
ရဲတပ်ဖွဲ့သည် ယာဉ်ကို စစ်ဆေးရေးဂိတ်တွင် တားဆီးစစ်ဆေးမည့်အစား မူးယစ်ဆေးလက်ခံမည့်သူနှင့် သယ်ဆောင်လာသူ နှစ်ဦးစလုံးကို ဖမ်းဆီးနိုင်ရန် သောင်းဖာဖုမ်း ကားဂိတ်ဝန်းကျင်တွင် အသင့်စောင့်ဆိုင်း စစ်ဆေးခဲ့ကြသည်။
ဗင်ကားရောက်လာသောအခါ အဆိုပါဆယ်ကျော်သက်မိန်းကလေးမှာ ကားဂိတ်တွင် ဂျာကတ်အင်္ကျီဝတ်ဆင်ကာ စောင့်ဆိုင်းနေသည်ကို တပ်ဖွဲ့ဝင်များက တွေ့ရှိခဲ့ရသည်။ အချိန်အတော်ကြာလာသည်အထိ မည်သူကမှ သူမထံသို့ လာရောက်တွေ့ဆုံခြင်း မရှိသဖြင့် ရဲတပ်ဖွဲ့က မူးယစ်ဆေးလက်ခံမည့်သူမှာ ၎င်းတို့ရှိနေသည်ကို ရိပ်မိသွားပြီး ထွက်ပြေးသွားပြီဟု သံသယဝင်ခဲ့ကြသည်။
ထို့နောက် ရဲတပ်ဖွဲ့က အဆိုပါမိန်းကလေးကို စစ်ဆေးရန် ထိန်းသိမ်းခဲ့ရာ သူမ၏ဂျာကတ်အတွင်း ဖွက်ထားသော ယာဘ (Yaba) ဟုခေါ်သည့် စိတ်ကြွဆေးပြား ၄,၀၃၈ ပြား ပါရှိသည့် အထုပ်ကို ရှာဖွေတွေ့ရှိခဲ့သည်။ ထို့အပြင် လက်ကိုင်ဖုန်းတစ်လုံးနှင့် ငွေသား ဘတ် ၁,၅၀၀ ကိုလည်း သိမ်းဆည်းရမိခဲ့သည်။
စစ်ဆေးမေးမြန်းချက်များအရ အဆိုပါကန်ချနဘူရီကျောင်းသူသည် Mathayom 3 (Grade 9) တွင် ပညာသင်ကြားနေသူဖြစ်ပြီး ကျောင်းပိတ်ရက်များ၌ မိသားစု၏ စရိတ်စကကို လျှော့ချရန်နှင့် ကျောင်းစရိတ်ရှာဖွေရန်အတွက် စားသောက်ဆိုင်တွင် အလုပ်လုပ်ကိုင်နေသူဖြစ်ကြောင်း သိရသည်။
သူမသည် စာမေးပွဲတွင် ၄.၀ နီးပါးအထိ မှတ်ချက်ကောင်းများ ရရှိလေ့ရှိပြီး ယခုကဲ့သို့ ပါဆယ်ပို့ဆောင်ခြင်းကို အပိုဝင်ငွေရှာဖွေသည့် အခွင့်အလမ်းတစ်ခုအဖြစ် ယူဆကာ လုပ်ကိုင်ခဲ့ခြင်းဖြစ်ကြောင်း သိရှိရသည်။
စံခလဘူရီမှ သောင်းဖာဖုမ်း ကားဂိတ်အထိ ပါဆယ်ထုပ်တစ်ထုပ်ကို သယ်ဆောင်ပေးရန်နှင့် ထိုနေရာတွင် အခြားသူတစ်ဦးက လာရောက်ယူမည်ဖြစ်ကြောင်း ပြောဆိုကာ ဘတ်ငွေ ၂,၀၀၀ ပေးအပ်ရန် ကမ်းလှမ်းခဲ့ခြင်းဖြစ်ကြောင်း အဆိုပါ ဆယ်ကျော်သက်ကျောင်းသူလေးက စုံစမ်းစစ်ဆေးသူများကို ထွက်ဆိုခဲ့သည်။
သူမက ပါဆယ်ထုပ်အတွင်း တရားမဝင် မူးယစ်ဆေးဝါးများ ပါရှိကြောင်း လုံးဝမသိရှိခဲ့ကြောင်းနှင့် ရဲတပ်ဖွဲ့ ရောက်ရှိလာချိန်အထိ လက်ခံမည့်သူကိုသာ စောင့်ဆိုင်းနေဆဲဖြစ်ကြောင်း အခိုင်အမာ ပြောကြားခဲ့သည်။
ယင်းမိန်းကလေးကို ဆက်လက်စစ်ဆေးပြီး လိုအပ်သလို ဆောင်ရွက်ရန်အတွက် စုံစမ်းစစ်ဆေးရေး အရာရှိများထံသို့ လွှဲပြောင်းပေးအပ်ခဲ့သည်။ ရဲတပ်ဖွဲ့ကလည်း အဆိုပါ ပို့ဆောင်မှုကို စီစဉ်ပေးခဲ့သူများနှင့် မူးယစ်ဆေးဝါး မှောင်ခိုကွန်ရက်တွင် ပါဝင်ပတ်သက်နေသူများကို ဖော်ထုတ်နိုင်ရန် ဆက်လက်လုပ်ဆောင်လျက်ရှိကြောင်း သိရသည်။
Ref: Thaiger
About the Author
