ဗင်နီဇွဲလားနိုင်ငံကို အမေရိကန် တိုက်ခိုက်မှုအတွင်း အနည်းဆုံး လူပေါင်း ၄၀ ခန့် သေဆုံးခဲ့ရ

သက်တံ့
၄. ၁. ၂၀၂၆

ယမန်နေ့ ဇန်နဝါရီ ၃ ရက် (စနေနေ့) နံနက်အစောပိုင်းက ဗင်နီဇွဲလားနိုင်ငံအပေါ် အမေရိကန်၏ တိုက်ခိုက်မှုအတွင်း စစ်ဘက်ဝန်ထမ်းများနှင့် အရပ်သားများ အပါအဝင် အနည်းဆုံး လူပေါင်း ၄၀ ခန့် သေဆုံးခဲ့ကြောင်း အမည်မဖော်လိုသည့် ဗင်နီဇွဲလား အဆင့်မြင့်အရာရှိ တစ်ဦးက ကနဦးအစီရင်ခံစာများကို ကိုးကား၍ ပြောကြားခဲ့သည်။

သမ္မတ ထရမ့်ပ်ကမူ Fox News နှင့် စနေနေ့က တွေ့ဆုံမေးမြန်းခန်း၌ ပြောကြားရာတွင် အမေရိကန်တပ်ဖွဲ့ဝင်များ သေဆုံးမှုမရှိကြောင်း ပြောဆိုခဲ့သည်။ သို့သော်လည်း အချို့သော တပ်ဖွဲ့ဝင်များ ဒဏ်ရာရရှိခဲ့ဖွယ်ရှိကြောင်း ၎င်းက အရိပ်အမြွက် ပြောကြားခဲ့သည်။ ပူးတွဲစစ်ဦးစီးချုပ်များ အဖွဲ့၏ ဥက္ကဋ္ဌ ဗိုလ်ချုပ်ကြီး ဒန်ကိန်းက သမ္မတ နီကိုးလပ်စ် မာဒူရိုနှင့် ၎င်း၏ဇနီးတို့ကို ဖမ်းဆီးခေါ်ဆောင်ရန် သွားရောက်သည့် အမေရိကန် ရဟတ်ယာဉ်များ ပစ်ခတ်ခံခဲ့ရကြောင်း မာအေလာဂို (Mar-a-Lago) တွင် ပြုလုပ်သည့် သတင်းစာရှင်းလင်းပွဲ၌ ပြောကြားခဲ့သည်။

ရဟတ်ယာဉ်တစ်စီး ထိမှန်ခဲ့သော်လည်း ဆက်လက်ပျံသန်းနိုင်ခဲ့ပြီး အမေရိကန် လေယာဉ်များအားလုံး “အိမ်သို့ ပြန်ရောက်ခဲ့ကြသည်” ဟု ၎င်းက ဆိုသည်။

တိုက်ခိုက်မှုအပြီးတွင် ကာရာကတ်စ် လေဆိပ်၏ အနောက်ဘက် ကမ်းခြေဒေသဖြစ်သော ကာတီယာလာမာ (Catia La Mar) ရှိ ဗင်နီဇွဲလား အရပ်သားတစ်ဦး သေဆုံးမှုနှင့် ပတ်သက်သည့် အသေးစိတ် အချက်အလက်များ ထွက်ပေါ်လာခဲ့သည်။

အမေရိကန်တပ်ဖွဲ့များ မြို့ကို ဝင်ရောက်စီးနင်းစဉ် စနေနေ့ အစောပိုင်းက လေကြောင်းတိုက်ခိုက်မှုတစ်ခုသည် သုံးထပ်အရပ်သား လူနေအိမ်ရာ တစ်ခုကို ထိမှန်ခဲ့ပြီး အပြင်ဘက်နံရံတစ်ခု ပြိုကျပျက်စီးခဲ့သည်။

အဆိုပါ တိုက်ခိုက်မှုကြောင့် အသက် ၈၀ အရွယ် ရိုစာ ဂွန်ဇာလက်စ် သေဆုံးခဲ့ပြီး နောက်ထပ်လူတစ်ဦးမှာလည်း ပြင်းထန်စွာ ဒဏ်ရာရရှိခဲ့ကြောင်း သူမ၏ မိသားစုက ပြောကြားခဲ့သည်။

ညနေပိုင်းတွင် အစိုးရစုံစမ်းစစ်ဆေးရေးမှူး တစ်ဦးသည် ထိုနေရာသို့ ရောက်ရှိလာပြီး သက်သေများကို မေးမြန်းခြင်းနှင့် ကျည်ဆံ/ဗုံးအပိုင်းအစများကို သိမ်းဆည်းခြင်းများ ပြုလုပ်ခဲ့သည်။

သေဆုံးသူ၏ တူဖြစ်သူ ဝီလ်မန် ဂွန်ဇာလက်စ်က မနက် ၂ နာရီခန့်တွင် တိုက်ခိုက်သံကြားသဖြင့် ငုံ့လိုက်သော်လည်း မျက်လုံးတစ်ဖက် ဆုံးရှုံးလုနီးပါး ဖြစ်ခဲ့ကြောင်း ပြောသည်။ ၎င်း၏ မျက်နှာဘေးဘက်တွင် ချုပ်ရိုး ၃ ချက် ချုပ်ခဲ့ရသည်။

မိမိအိမ် ဆုံးရှုံးသွားပြီဖြစ်၍ မည်သည့်နေရာသို့ ဆက်သွားမည်နည်းဟု မေးမြန်းရာတွင် ဂွန်ဇာလက်စ်က “ကျွန်တော် မသိတော့ပါဘူး” ဟုသာ တိုတိုတုတ်တုတ် ဖြေကြားခဲ့သည်။ ၎င်းသည် ပျက်စီးသွားသောအိမ်အတွင်းမှ တန်ဖိုးရှိပစ္စည်းများကို ရှာဖွေရင်း ထီးဟောင်းတစ်လက်နှင့် အံဆွဲအထပ်လိုက်ကို သယ်ဆောင်လာခဲ့သည်။

တိုက်ခိုက်မှုကြောင့် အိမ်ခန်း၏ အတွင်းပိုင်းများမှာ အပြင်သို့ ပေါ်ထွက်နေပြီး ပျက်စီးမှုများကြားတွင် ဗင်နီဇွဲလား လွတ်လပ်ရေးအာဇာနည် ဆိုင်မွန် ဘိုလီဗာ (Simón Bolívar) ၏ ပုံတူပန်းချီကားမှာလည်း ဗုံးစများ ထိမှန်ထားသည်ကို တွေ့ရသည်။

အိမ်နီးချင်းဖြစ်သူ အသက် ၇၀ အရွယ် ဂျော့ချ် (၎င်း၏မျိုးရိုးအမည်ကို ထုတ်ဖော်မပြောကြားခဲ့ပါ) က ဤလေကြောင်းတိုက်ခိုက်မှုကြောင့် မိမိပိုင်ဆိုင်သမျှ အားလုံး ဆုံးရှုံးခဲ့ရကြောင်း ပြောသည်။

စနေနေ့ ညနေပိုင်းတွင် လူအချို့မှာ အိမ်ပြင်၌ စုရုံးနေကြပြီး အချို့မှာမူ ပျက်စီးသွားသော အိမ်ခန်းများအတွင်း ရှာဖွေမှုများ ပြုလုပ်နေကြသည်။ အများစုမှာ စကားပင် မပြောနိုင်လောက်အောင် ဖြစ်နေကြသည်။

အချို့သော ဒေသခံများမှာ ဆုတောင်းနေကြပြီး အချို့မှာမူ အမျက်ဒေါသ ထွက်နေကြသည်။ ဟာဗီးယားဟု အမည်ပေးထားသည့် အမျိုးသားတစ်ဦးကမူ ဤတိုက်ခိုက်မှုသည် အမေရိကန်ကုမ္ပဏီများကို ဗင်နီဇွဲလား၏ ရေနံမြေများအား ထိန်းချုပ်ခွင့်ပေးလိုသော ထရမ့်ပ်အစိုးရ၏ လောဘကြောင့် ဖြစ်သည်ဟု ပြစ်တင်ပြောဆိုခဲ့သည်။ ၎င်းတို့ကဲ့သို့သော လူများ၏ အသက်သည် ဘာမှတန်ဖိုးမရှိသလို ဖြစ်နေကြောင်း ၎င်းက ဆိုသည်။

လေကြောင်းတိုက်ခိုက်မှုအပြီးတွင် အမျိုးသား ၄ ဦးက ရိုစာ ဂွန်ဇာလက်စ်အား ကယ်တင်ရန် ကြိုးစားခဲ့ကြပြီး သူမကို မော်တော်ဆိုင်ကယ်ဖြင့် ဆေးရုံသို့ ပို့ဆောင်ခဲ့သော်လည်း ဆေးရုံသို့ ရောက်ရှိချိန်တွင် သေဆုံးသွားပြီဖြစ်ကြောင်း အတည်ပြုခဲ့ကြသည်။

အခြားအမျိုးသမီးတစ်ဦးကိုလည်း ဆေးရုံသို့ ပို့ဆောင်ခဲ့ရာ သူမမှာ အသက်ရှင်သော်လည်း အခြေအနေ အလွန်စိုးရိမ်ရကြောင်း ဒေသခံများအား အကြောင်းကြားခဲ့သည်ဟု သိရသည်။

Ref: The New York Times