၈. ၄. ၂၀၂၅
Written by Tha Doe
မြန်မာပြည်ကနေ ပြည်ပထွက်ပြေးတဲ့ Exile Media တွေရဲ့ အကျိုးစီးပွားရှာ ရေးသားခံရမှုနဲ့ ပတ်သက်ပြီး အိန္ဒိယနိုင်ငံသား Kiran Verma ကမြန်မာပြည်သူ၊ မြန်မာ့တပ်မတော်နဲ့ မြန်မာအစိုးရကို လေးစားကြောင်း၊ အကျိုးစီးပွားအတွက် သူဟာ အသုံးချခံခဲ့ရကြောင်း ဖွင့်ဟဝန်ခံလိုက်ပြီး မြန်မာနိုင်ငံဆိုင်ရာ အိန္ဒိယသံရုံးကိုပါ တောင်းပန်လာပါတယ်။
မြန်မာနိုင်ငံမှာ မတ်လ ၂၈ ရက်က ပြင်းထန်စွာလှုပ်ခတ်ခဲ့တဲ့ မန္တလေးငလျင်ကြီးကို ဧပြီ ၁ ရက်မှာ လာကြည့်သွားတဲ့ Kiran Verma ဆိုသူ အိန္ဒိယနိုင်ငံသား Yotuber တစ်ဖြစ်လည်း Simply Blood ဆိုတဲ့ သွေးလှူဒါန်းမှုအဖွဲ့အစည်းလေး ထူထောင်သူရဲ့ ရေးသားချက်ကို Exile Media တွေက ပုံကြီးချဲ့ရေးသားလာတဲ့အပြင် အင်္ဂလိပ်စာ၊ ဂျပန်စာတွေနဲ့ပါ လူမှုကွန်ရက်မျိုးစုံက ဖြန့်ဝေနေတာကြောင့် မြန်မာနိုင်ငံဆိုင်ရာ အိန္ဒိယသံရုံးက Kiran Verma ရဲ့ ရေးသားချက်ဟာ အိန္ဒိယအစိုးရနဲ့ မသက်ဆိုင်ဘဲ တစ်သီးပုဂ္ဂလအမြင်သာဖြစ်ကြောင်းနဲ့ အိန္ဒိယနိုင်ငံသားတွေ မြန်မာ့မီဒီယာတွေကို ရှောင်ရှားဖို့ အကြံပြုချက်ကို မနေ့ညက ဖော်ပြလာတာပါ။
မအောင်မြင်တဲ့ Youtuber တစ်ဖြစ်လည်း Kiran Verma ဟာ သူ့ရဲ့ ငွေမရတဲ့ Facebook Page ကနေ ‘သေနတ်ပြောင်းတွေရှေ့ ကယ်ဆယ်ရေးမလုပ်နိုင်ကြောင်း’၊ ‘စစ်တပ်အနေနဲ့ နိုင်ငံရဲ့ အဆိုးဆုံးအချိန်မှာ ကိုယ်ချင်းစာနာစိတ်မရှိရင်တောင် လူစိတ်နည်းနည်းလောက်ရှိသေးတယ်ဆိုတာ ပြသဖို့မျှော်လင့်ကြောင်း’၊ ပြိုကျနေတဲ့ အဆောက်အအုံတွေနဲ့ အပြစ်မဲ့ရုပ်အလောင်းတွေက ထွက်ရှိတဲ့ သေဆုံးဒီမိုကရေစီရဲ့ အနံ့အသက်ကို သည်းမခံနိုင်ကြောင်း’၊ အာရှရဲ့ စပါးကျီဖြစ်တဲ့ နိုင်ငံဟာ သေနတ်ထောက် ချုပ်ကိုင်ခံနေရပြီး ငွေမည်းတွေနဲ့ လွှမ်းခြုံထားကြောင်း’ စသလို ရေးခဲ့ပြီး ဒီရေးသားချက်တွေဟာ အိန္ဒိယနဲ့ မြန်မာနိုင်ငံအကြား ချစ်ကြည်မှု၊ အိန္ဒိယနိုင်ငံက မြန်မာ့ငလျင်ဘေးအတွက် ဗြဟ္မာစီမံချက်နဲ့ အင်တိုက်အားတိုက်ကူညီနေတဲ့ ပုံရိပ်ကို မှေးမှိန်စေမှုကြောင့် အရေးယူပေးဖို့ မြန်မာနိုင်ငံသားတစ်ဦးကလည်း မြန်မာနိုင်ငံဆိုင်ရာ အိန္ဒိယသံအမတ်ကြီးနဲ့ အိန္ဒိယပြည်ပရေးရာဝန်ကြီးဆီကို ဧပြီ ၅ ရက်က စာပို့တိုင်ကြားခဲ့ပါတယ်။
အထူးသဖြင့် EAO, NLD, CRPH, NUG နဲ့ PDF တွေက ရဟန်းသံဃာတွေ၊ နိုင်ငံဝန်ထမ်းတွေ၊ အရပ်သားတွေနဲ့ ကျောင်းသားကျောင်းသူပါမချန် သတ်ဖြတ်နေချိန်မှာ၊ ကူညီကယ်ဆယ်ရေးလာလုပ်သူ ပြည်ပနိုင်ငံသားတစ်ဦးဦး သတ်ဖြတ်ခံရရင် ပိုပြီး ဖိအားများမှာ စိုးရိမ်တာကြောင့် လုံခြုံရေးတိုးမြှင့်ထားရတာကိုလည်း Kiran Verma သဘောမပေါက်ခဲ့ဘူးလို့လည်း သုံးသပ်ကြပါတယ်။
ဒီဖြစ်စဥ်တစ်ခုလုံးအပေါ် Kiran Verma က တောင်းပန်ရာမှာတော့ သူဟာ မြန်မာနိုင်ငံနဲ့ မြန်မာနိုင်ငံသားတွေကို အစဉ်အမြဲ လေးစားတန်ဖိုးထားခဲ့သလို ဒီလို လေးစားမှုမှာ မြန်မာပြည်သူတွေ၊ တပ်မတော်နဲ့ အစိုးရအာဏာပိုင်အားလုံးပါဝင်ကြောင်း၊ သူ့ရဲ့ မူရင်းပို့စ်မှာ ဖော်ပြခဲ့တာ သူ့ရဲ့ကိုယ်ပိုင်အမြင်သာဖြစ်ပြီး အချို့သူတွေ မှားယွင်းနားလည်ခဲ့ကြောင်း၊ မြန်မာနိုင်ငံက ထွက်ခွာရတာလည်း အခြေအနေကို မထိန်းနိုင်တာကြောင့် ကိုယ်တိုင်ထွက်ခွာလာတာဖြစ်ကြောင်း၊ သူ မြန်မာနိုင်ငံလာစဥ်မှာ အိန္ဒိယနိုင်ငံသားအနေနဲ့ မဟုတ်သလို လူသားတစ်ဦးအဖြစ်နဲ့သာလာခဲ့ပြီး ဘယ်အဖွဲ့အစည်းကိုမှ ကိုယ်စားမပြုကြောင်း၊ နားလည်မှုမှားယွင်းမှာစိုးတာကြောင့် မြန်မာနိုင်ငံသားတွေရဲ့မျက်နှာကိုတောင် မမျှဝေခဲ့ကြောင်း၊ ဒါပေမဲ့လည်း တချို့သူတွေက သူ့ရဲ့ ပို့စ်ကို ကိုယ်ကျိုးစီးပွားအတွက် လှည့်ဖြားအသုံးချခဲ့ကြောင်း ရေးသားတောင်းပန်ထားပါတယ်။
ဒါ့အပြင် သူရှင်းလင်းစွာပြောလိုတာက သူ့အဖို့ သူ့နိုင်ငံက ဘယ်နိုင်ငံထက်မဆိုဦးစားပေးဖြစ်ကြောင်း၊ အိန္ဒိယနိုင်ငံနဲ့ ဖွဲ့စည်းပုံအခြေခံဥပဒေကို ယုံကြည်ကိုးစားကြောင်း၊ ကျေးဇူးပြုပြီး အိန္ဒိယနိုင်ငံ၊ အိန္ဒိယခေါင်းဆောင်တွေနဲ့ အုပ်ချုပ်ရေးစနစ်ကို ဆန့်ကျင်ဝေဖန်မှုမလုပ်ဖို့ ရိုးသားစွာ ပန်ကြားလိုကြောင်း၊ အိန္ဒိယနိုင်ငံအပေါ် စော်ကားတဲ့ စကားလုံးတစ်လုံးတစ်လေကိုမှ လက်မခံနိုင်ကြောင်း၊ မြန်မာနိုင်ငံဆိုင်ရာ အိန္ဒိယသံရုံးကိုလည်း စိတ်ရင်းအမှန်နဲ့ ရိုးသားစွာတောင်းပန်အပ်ပြီး ဒီလိုအခြေအနေဖြစ်လာဖို့ မမျှော်လင့်ကြောင်း၊ သူ့ရည်ရွယ်ချက်ကောင်းမွန်ပေမဲ့ အခြေအနေက မလိုလားအပ်တဲ့လမ်းကြောင်းပေါ် ရောက်သွားခဲ့ကြောင်း တောင်းပန်ခဲ့တာကို တွေ့ရပါတယ်။
About the Author
