သက်တံ့
၁၄. ၁၀. ၂၀၂၆
မလေးရှားနိုင်ငံသည် မြန်မာနိုင်ငံမှ ဒုက္ခသည်များကို မိမိစရိတ်ဖြင့် ပြန်လည်လက်ခံရေးအတွက် မြန်မာနိုင်ငံအား အောင်မြင်စွာ စည်းရုံးနိုင်ခဲ့သည့် ကမ္ဘာပေါ်တွင် ပထမဆုံးနိုင်ငံဖြစ်ပြီး၊ ၎င်းသည် မလေးရှားနိုင်ငံအတွက် အရေးပါသော သံတမန်ရေးရာ အောင်မြင်မှုတစ်ခု ဖြစ်ကြောင်း မလေးရှားအစိုးရအဖွဲ့ (Madani) ပြောရေးဆိုခွင့်ရှိသူ ဒါတုဆရီ ဖာမီ ဖာဇီးလ် (Datuk Seri Fahmi Fadzil) က ပြောကြားခဲ့သည်။
မလေးရှားဝန်ကြီးချုပ် ဒါတုဆရီ အန်ဝါ အီဘရာဟင်က ဤအောင်မြင်မှုကို ထင်ရှားစွာ ဖော်ပြခဲ့ပြီး ထူးကဲသည့် သံတမန်ရေးရာ ဆောင်ရွက်နိုင်မှုအဖြစ် တင်စားပြောဆိုခဲ့ကြောင်းလည်း ဆက်သွယ်ရေးဝန်ကြီးဖြစ်သည့် ဖာမီက ဆိုသည်။
“ဒါဟာ ထူးကဲတဲ့ အောင်မြင်မှုတစ်ခုပါပဲ။ ဘာလို့လဲဆိုတော့ ဝန်ကြီးချုပ် ထောက်ပြခဲ့သလိုပဲ မလေးရှားဟာ မြန်မာလိုမျိုး နိုင်ငံတစ်နိုင်ငံကို သူ့ရဲ့ဒုက္ခသည်တွေ ပြန်လည်လက်ခံဖို့ စည်းရုံးနိုင်ခဲ့တဲ့ ကမ္ဘာပေါ်က ပထမဆုံးနိုင်ငံ ဖြစ်လာလို့ပါပဲ။ ဒုက္ခသည်တွေ အားလုံးကို မြန်မာနိုင်ငံရဲ့ ကိုယ်ပိုင်စရိတ်နဲ့ပဲ နေရပ်ပြန်ပို့ပေးခဲ့တာ ဖြစ်ပါတယ်။ ဒါဟာ မလေးရှားအနေနဲ့ ဂုဏ်ယူနိုင်တဲ့ သံတမန်ရေးရာ အောင်မြင်မှုတစ်ခု အမှန်တကယ် ဖြစ်ပါတယ်” ဟု ယနေ့ မလေးရှား အမျိုးသား သတင်းအေဂျင်စီ (Bernama) က ဦးစီးကျင်းပသည့် ဝန်ကြီးဌာန၏ လစဉ် အစည်းအဝေးတွင် ၎င်းက ပြောကြားခဲ့သည်။
အမျိုးသား အားကစားနေ့ ၂၀၂၆ နှင့် တိုက်ဆိုင်စွာ ကျင်းပခဲ့သည့် အဆိုပါ အစည်းအဝေးသို့ ဆက်သွယ်ရေးဝန်ကြီးဌာန အမြဲတမ်းအတွင်းဝန် ဒါတု အဗ္ဗဒူ ဟာလင်း ဟမ်ဇာ (Datuk Abdul Halim Hamzah)၊ Bernama သတင်းအေဂျင်စီ၏ အမှုဆောင်အရာရှိချုပ် ဒါတင်ပါဒူကာ နူအာ အာဖီဒါ ကာမလူဒင် (Datin Paduka Nur-ul Afida Kamaludin) နှင့် Bernama သတင်းအယ်ဒီတာချုပ် အာရူး ရာဂျူး ဒူရာ ရဂျ် (Arul Rajoo Durar Raj) တို့လည်း တက်ရောက်ခဲ့ကြသည်။
မြန်မာနိုင်ငံတော်သမ္မတ ဦးမင်းအောင်လှိုင်၏ အောက်တိုဘာ ၇ ရက်နှင့် ၈ ရက်နေ့က တရားဝင် လာရောက်ခဲ့သော ခရီးစဉ်သည် မြန်မာနိုင်ငံမှ ဒုက္ခသည်များကို နေရပ်သို့ ပိုမိုပြန်လည်ပို့ဆောင်နိုင်ရေး သေချာစေရန် ဆွေးနွေးမှုများအတွက် လမ်းခင်းပေးခဲ့ကြောင်းလည်း ဖာမီက ပြောကြားခဲ့သည်။
“ဘုရားသခင် အလိုတော်ရှိပါက အမျိုးမျိုးသော တိုင်းရင်းသားလူမျိုးစုများမှ မြန်မာဒုက္ခသည် ၃,၀၀၀ ကျော်ကို နေရပ်ပြန်ပို့ရေး လုပ်ငန်းစဉ်တွေကို မကြာမီ စတင်တော့မည် ဖြစ်ပါတယ်” ဟု ၎င်းက ဆိုသည်။
အဆိုပါ အစပျိုးလုပ်ဆောင်မှုသည် အခြားနိုင်ငံများနှင့် သံတမန်ရေးရာ ဆက်ဆံရေး ပိုမိုခိုင်မာစေရန် မလေးရှားနိုင်ငံ၏ ဆက်လက်ဆောင်ရွက်နေသည့် ကြိုးပမ်းမှုများအနက် တစ်စိတ်တစ်ပိုင်းဖြစ်ကြောင်း ဖာမီက ဖော်ပြခဲ့ပြီး Bernama သတင်းအေဂျင်စီနှင့် Radio Televisyen Malaysia (RTM) တို့အနေဖြင့် ဖြစ်ပေါ်တိုးတက်မှုများကို အနီးကပ် စောင့်ကြည့်ကြရန်လည်း တိုက်တွန်းခဲ့သည်။
ပြီးခဲ့သည့် ရက်ပိုင်းကလည်း မြန်မာ့ရေတပ်ပိုင် ဆေးရုံသင်္ဘော တစ်စီးအပါအဝင် သင်္ဘောသုံးစီးကို အသုံးပြု၍ မြန်မာနိုင်ငံသား ၁,၄၇၆ ဦး ပါဝင်သည့် ပထမအဆင့် နေရပ်ပြန်ပို့ရေး အစီအစဉ်ကို မလေးရှားနိုင်ငံက ဆောင်ရွက်ပြီးစီးခဲ့ပြီး ဖြစ်သည်။
မြန်မာနိုင်ငံအနေဖြင့် ၎င်းတို့၏ နိုင်ငံသားများ ကျယ်ကျယ်ပြန့်ပြန့် နေရပ်ပြန်လာရေးကို အဆင်ပြေချောမွေ့စေရန်နှင့် သက်ဆိုင်ရာ ကုန်ကျစရိတ်များကိုပါ ကျခံရန် အသင့်ရှိနေကြောင်း ဝန်ကြီးချုပ် အန်ဝါကလည်း ပြောကြားခဲ့သည်ဟု သတင်းရရှိသည်။
Ref: Bernama
About the Author
