သက်တံ့
၁၄. ၁၀. ၂၀၂၆
မနေ့က (အောက်တိုဘာ ၁၃ ရက်နေ့က) ထိုင်းနိုင်ငံ၊ ချွန်ဘူရီခရိုင်၊ ဘန်းလမုံမြို့နယ်ရှိ ပုဂ္ဂလိကလေယာဉ်ကွင်းအနီးတွင် အပေါ့စားလေယာဉ်ငယ်တစ်စင်းသည် အင်ဂျင်ချို့ယွင်းမှုဟု ယူဆရသောဖြစ်ရပ်ကြောင့် ပစ္စည်းဟောင်းရောင်းဝယ်ရေးလုပ်ငန်းတစ်ခု၏ နံရံကို ဝင်တိုက်မိခဲ့ကာ ထိုင်း-ဂျာမန်လေယာဉ်မှူးတစ်ဦး ပြင်းထန်စွာ ဒဏ်ရာရရှိခဲ့သည်။
အဆိုပါ မတော်တဆမှုသည် ပြေးလမ်း၏ မီတာ ၁၀၀ အကွာ၊ အရှေ့ပိုင်းပတ္တရားလေယာဉ်ကွင်းဟုလည်းခေါ်ကြသော ဘူရဖာသစ်လေယာဉ်ကွင်းအနီး နံနက် ၁၁ နာရီခွဲခန့်တွင် ဖြစ်ပွားခဲ့ခြင်း ဖြစ်သည်။
နောင်ပရူရဲစခန်းမှ တာဝန်ရှိသူများနှင့် ကယ်ဆယ်ရေးသမားများ ရောက်ရှိလာချိန်တွင် အပြာနှင့်အဖြူရောင် တစ်လုံးထိုး အင်ဂျင်ပါလေယာဉ်ငယ်မှာ အဆိုပါလုပ်ငန်း၏ အကာအရံနံရံကို ဝင်တိုက်မိကာ ပြင်းထန်စွာ ပျက်စီးနေသည်ကို တွေ့ရှိခဲ့ရသည်။
တိုက်မိမှုကြောင့် နံရံနှင့် အမိုး၏ အစိတ်အပိုင်းအချို့ ပျက်စီးခဲ့ပြီး ပျက်ကျနေသော လေယာဉ်အနီးတစ်ဝိုက်တွင် ပြင်းထန်သော လောင်စာဆီနံ့များ ထွက်ပေါ်နေကြောင်း သတင်းရရှိသည်။
လေယာဉ်မှူးမှာ အသက် ၃၂ နှစ်အရွယ် ထိုင်း-ဂျာမန်နိုင်ငံသား မာတင်ဟူဘာ (Martin Huber) ဖြစ်ပြီး ၎င်းသည် အဆိုပါ နှစ်ထိုင်ခုံပါလေယာဉ်၏ ပိုင်ရှင်ဖြစ်သည်ဟု သတင်းရရှိသည်။ သူသည် ဘယ်ဘက်လက်မောင်း အထက်ပိုင်း ကျိုးသွားခဲ့ပြီး မျက်နှာတွင် ပြင်းထန်သော ဒဏ်ရာရရှိခဲ့သည်။
ကယ်ဆယ်ရေးဝန်ထမ်းများက အခင်းဖြစ်ပွားရာနေရာတွင် ဆေးကုသမှုပေးခဲ့ပြီးနောက် နောက်ထပ်ဆေးကုသမှုများခံယူရန် ပတ္တရား ဘန်ကောက်ဆေးရုံသို့ ပို့ဆောင်ပေးခဲ့သည်။
ဖြစ်စဉ်၏ တစ်စိတ်တစ်ပိုင်းကို မှတ်တမ်းတင်ခဲ့သော အသက် ၅၂ နှစ်အရွယ် ဒေသခံ ဆွမ်ချိုင်း တော့ပ်ဖွန် (Somchai Topphon) က လေယာဉ်သည် လေယာဉ်ကွင်းမှ ပျံတက်သွားပြီး နှစ်မိနစ်ခန့်အကြာတွင်မှ လေယာဉ်ကွင်းဘက်သို့ ပြန်လည်ဦးတည်လာခြင်းဖြစ်ကြောင်း ပြောကြားခဲ့သည်။ ဆွမ်ချိုင်း၏ ပြောကြားချက်အရ လေယာဉ်မှူးသည် ပြန်လည်ဆင်းသက်ရန် ပြင်ဆင်နေပုံရသော်လည်း အင်ဂျင်မှ လုံလောက်သော စွမ်းအင် ထွက်မလာခြင်းကြောင့် ပျံသန်းမှုလမ်းကြောင်းပြောင်း၍ ပြန်လည်ပျံတက်ရန် (Go-around) ကြိုးစားခဲ့ခြင်းဖြစ်နိုင်ကြောင်း ဆိုသည်။
သို့သော်လည်း လေယာဉ်မှာ လုံလောက်သော အမြင့်သို့ မရောက်ရှိဘဲ ပြေးလမ်းကို ကျော်လွန်ကာ ပျက်ကျသွားခဲ့သည်။ စစ်ဆေးရေးမှူးများက အင်ဂျင်ချို့ယွင်းချက်သည် အဆိုပါမတော်တဆမှုကို အထောက်အကူပြုခြင်း ရှိမရှိကို အတည်မပြုနိုင်သေးပေ။
ပျက်စီးသွားသော အဟောင်းပစ္စည်းရောင်းဝယ်ရေး လုပ်ငန်း၏ပိုင်ရှင် အသက် ၄၂ နှစ်အရွယ် ချမ်ဖွန် မာနီချော့ (Chumphon Maneechot) က ယာဉ်တစ်စီး၏ နောက်ဘက်တွင် ထိုင်နေစဉ် လေယာဉ်အင်ဂျင် ရပ်သွားသည့် အသံကဲ့သို့ ကြားလိုက်ရကြောင်း ပြောကြားခဲ့သည်။
ခဏအကြာတွင် လေယာဉ်သည် ၎င်းဆိုင်နံရံကို ဝင်တိုက်မိခဲ့ပြီး အိမ်အမိုးက အဖျားသာ ကပ်လွတ်သွားခဲ့သော်လည်း သစ်ကိုင်းကျိုးကျမှုကြောင့်ပင် အဆောက်အအုံ ထိခိုက်ပျက်စီးခဲ့ရသည်။
လေယာဉ်ပျက်ကျပြီးနောက် မတော်တဆမှု စစ်ဆေးရေးမှူးများသည် စစ်ဆေးရန်အတွက် အပျက်အစီးများကို ထိန်းသိမ်းရန် အခင်းဖြစ်ပွားရာနေရာကို လုံခြုံရေးယူခဲ့ကြသည်။
လေယာဉ်မတော်တဆမှုနှင့် ဖြစ်ရပ်များစစ်ဆေးရေးကော်မတီမှ တာဝန်ရှိသူ ပွန်ချိုင်း ဘွန်းမောင်း (Pornchai Boonmuang) က လေကြောင်းအင်ဂျင်နီယာများအပါအဝင် ပိုမိုကြီးမားသော အဖွဲ့တစ်ဖွဲ့က လေယာဉ်ပျက်ကျရသည့်အကြောင်းရင်းကို ဖော်ထုတ်ရန်အတွက် လေယာဉ်ကို စစ်ဆေးသွားမည်ဖြစ်ကြောင်း ပြောကြားခဲ့သည်။
စစ်ဆေးရေးမှူးများသည် ၎င်းတို့၏ စစ်ဆေးမှု၏ တစ်စိတ်တစ်ပိုင်းအနေဖြင့် ဒဏ်ရာရရှိထားသော လေယာဉ်မှူးထံမှ ထွက်ဆိုချက်ကို ရယူရန် စီစဉ်ထားသည်။
Ref: Thaiger
About the Author
