ခရီးသည်တစ်ဦးသေဆုံးကာ ၂၂ ဦး ဒဏ်ရာရခဲ့သော မိဘဂုဏ်ခရီးသည်ယာဥ် တိမ်းမှောက်မှု သတ်မှတ်ကီလိုထက် ကျော်လွန်မောင်းနှင်သည့်အပြင် တယ်လီမက်တစ်စင်တာမှ ဖုန်းဆက်သတိပေးမှုကိုပါ လိုက်နာခြင်းမရှိ၍ ဖြစ်ပွားခဲ့ရဟု ဆို

သက်တံ့
၃. ၉. ၂၀၂၆

အမြန်လမ်းတွင် ယမန်နေ့ကဖြစ်ပွားခဲ့သော ခရီးသည်တစ်ဦးသေဆုံးကာ ၂၂ ဦး ဒဏ်ရာရခဲ့သည့် မိဘဂုဏ်ခရီးသည်တင်ယာဥ် တိမ်းမှောက်မှုမှာ သတ်မှတ်ကီလိုထက် ကျော်လွန်မောင်းနှင်သည့်အပြင် တယ်လီမက်တစ်စင်တာမှ ဖုန်းဆက်သတိပေးမှုကိုပါ လိုက်နာခြင်းမရှိ၍ ဖြစ်ပွားခဲ့ရခြင်းဖြစ်သည်ဟု အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့က သတင်းထုတ်ပြန်သည်။

ဖြစ်စဥ်မှာ ယမန်နေ့ စက်တင်ဘာ ၂ ရက် နေ့လယ် ၂ နာရီခန့်က ရန်ကုန်- မန္တလေးအမြန်လမ်း မိုင်တိုင် ၁၃/၆ နှင့် ၁၃/၇ ကြား မန္တလေးမှ‌နေပြည်‌တော်သို့အသွားလမ်းတွင် ယာဉ်မောင်းပါ အမျိုးသား (၁၅)ဦး၊ အမျိုးသမီး (၁၀)ဦး စုစုပေါင်း (၂၅)ဦး လိုက်ပါလာသည့် 9Q/7566 မိဘဂုဏ် ခရီးသည်တင်ယာဉ်သည် ရှေ့တွင်မောင်းနှင်နေသောယာဉ်အား လက်ယာဘက်ယာဥ်ကြောက ကျော်တက်စဉ် အခင်းဖြစ်နေရာမရောက်မီ ပေ ၃၀၀ ခန့်အလိုတွင် အရှိန်မထိန်းနိုင်ဘဲ လမ်း၏ယာ‌ဘက်မြေသားလမ်းပေါ်ရောက်ရှိပြီး Guard Rail များနှင့်တိုက်မိကာအခင်းဖြစ်‌နေရာအရောက်တွင် လမ်းအပြည့်ကန့်လန့်ဖြတ်တိမ်းမှောက်ခဲ့‌သောယာဉ်မတော်တဆမှုတစ်ခုဖြစ်ပွားခဲ့သည်။

တယ်လီမက်တစ် စောင့်ကြည့်စစ်ဆေးမှု အချက်အလက်များအရ အဆိုပါကားသည် မိုင်၉/၃တွင် သတ်မှတ်ကီလိုထက် ကျော်လွန်မောင်းနှင်သဖြင့် တယ်လီမက်တစ်ထိန်းချုပ်စင်တာမှ ဖုန်းဆက်သတိ‌ပေးခဲ့သော်လည်း လိုက်နာခြင်းမရှိဘဲ မိုင် ၁၃/၅ခန့်တွင် တစ်နာရီ ၁၀၂ ကီလိုမီတာ (၁၀၂ km/h) နှုန်းဖြင့်ဆက်လက်မောင်းနှင်ခဲ့‌သောကြောင့် တိမ်း‌မှောက်ခဲ့ခြင်းဖြစ်သည်ဟုလည်း အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့က သတင်းထုတ်ပြန်သည်။

ယင်းဖြစ်စဥ်ကြောင့် ယာဥ်ကြောနှစ်ခုလုံးပေါ်၌ ယာဥ်ကန့်လန့်လဲကျသဖြင့် လမ်းပိတ်ဆို့မှုဖြစ်ပွါးခဲ့၍ ကရိန်းဖြင့် ကားအား ဖယ်ရှားခဲ့ရပြီး မိုင် ၁၂/၅ ဂငယ်ကွေ့ မှ ၁၅/၅ ဂငယ်ကွေ့ အကြား အပြန်လမ်းမှ ယာဉ်နှစ်လမ်းသွားနိုင်ရန်ယာယီဆောင်ရွက်ခဲ့ရသော်လည်း ညနေ ၆ နာရီ မိနစ် ၂၀ တွင် ပုံမှန်အတိုင်းပြန်လည်သွားလာနိုင်ပြီဖြစ်သည်။

ဖြစ်စဉ်ကြောင့်ယာဉ်မောင်းနှင့် ယာဉ်ပေါ်ပါခရီးသည်များ ဒဏ်ရာမစိုးရိမ်ရ (၁၉)ဦး၊ စိုးရိမ်ရ (၃)ဦးနှင့် သေဆုံး (၁)ဦး ထိခိုက်ခဲ့ပြီး Guard Rail (၁၂၀ပေ)ခန့် နှင့် လမ်းပခုံးမြေသားလမ်း (၁၅၀)ပေခန့် ပျက်စီးခဲ့ကြောင်း သိရသည်။

အမြန်လမ်းအသုံးပြုသောယာဉ်မောင်းများအနေဖြင့် ယာဉ်မောင်းနှင်နေစဉ် လုမောင်းခြင်း၊ပြိုင်မောင်းခြင်း၊ ဖုန်းပြောခြင်း၊ စာတို SMS ပို့ခြင်း၊ လူမှုကွန်ရက်/အင်တာနက်သုံးခြင်း၊ ရုပ်ရှင်ကြည့်ခြင်း၊ ကွမ်းထွေးခြင်း စသည့် စိတ်အာရုံပျံ့လွင့်စေသော အပြုအမူများ မလုပ်ကြပါရန်၊မိမိယာဉ်၏ ကြံ့ခိုင်မှု၊ တာယာပန်းရှိမှုအား လမ်းပေါ်မရောက်မီ သေချာစွာ စစ်ဆေးကြရန်၊ မိုးရွာနေချိန်/ ညအချိန်များတွင် အရှိန်လျှော့ချ မောင်းနှင်ကြပါရန်နှင့် ယာဉ်အမျိုးအစားအလိုက်သတ်မှတ်အမြန်နှုန်းထက် ပိုမိုမောင်းနှင်ခြင်း မပြုကြပါရန်လည်း အမြန်လမ်းမကြီးထိန်းသိမ်းပြုပြင်ရေးနှင့်ကြီးကြပ်ရေးအဖွဲ့အထူးသတိပေးထားသည်။