သက်တံ့
၁၇. ၁၂. ၂၀၂၅
ဘတ်သန်းပေါင်း တစ်ထောင်ကျော် (တစ်ဘီလျံကျော်) တန်ဖိုးရှိ ရင်းနှီးမြှုပ်နှံမှု လိမ်လည်မှုများဖြင့် အပြည်ပြည်ဆိုင်ရာရဲတပ်ဖွဲ့ (Interpol) က အလိုရှိနေသော တရုတ်နိုင်ငံသားတစ်ဦးကို ယမန်နေ့ ဒီဇင်ဘာလ ၁၆ ရက်နေ့က ထိုင်းနိုင်ငံ၊ ဘန်ကောက်မြို့ရှိ သုဝဏ္ဏဘူမိလေဆိပ်တွင် ဖမ်းဆီးရမိခဲ့သည်။
၎င်းသည် နိုင်ငံကူးလက်မှတ်အတုကို အသုံးပြု၍ ထိုင်းနိုင်ငံမှ ထွက်ခွာရန် ကြိုးပမ်းစဉ် ဖမ်းဆီးခံခဲ့ရခြင်းဖြစ်သည်။
သုဝဏ္ဏဘူမိလေဆိပ်ရှိ လူဝင်မှုကြီးကြပ်ရေးအရာရှိများသည် အသက် ၄၄ နှစ်အရွယ် “ဟောင်” (Huang) အမည်ရှိ တရုတ်နိုင်ငံသားကို ယမန်နေ့ညနေပိုင်းတွင် ဖမ်းဆီးခဲ့ခြင်းဖြစ်ပြီး၊ ၎င်းသည် “ဂိုးလ်” (Gol) အမည်ရှိ မက္ကဆီကို နိုင်ငံကူးလက်မှတ်အတုဖြင့် ခရီးသွားနေခြင်းဖြစ်ကြောင်း တွေ့ရှိခဲ့သည်။ ရှာဖွေစစ်ဆေးရာတွင် ၎င်း၏အစစ်အမှန် တရုတ်နိုင်ငံကူးလက်မှတ်ကိုလည်း လျှို့ဝှက် သယ်ဆောင်လာသည်ကို တွေ့ရှိခဲ့ရသည်။
ဆက်လက်စစ်ဆေးမှုများအရ ဟောင်သည် Interpol ၏ အနီရောင်ဝရမ်း (Red Notice) ထုတ်ခံထားရသူဖြစ်ကြောင်း အတည်ပြုနိုင်ခဲ့သည်။ အနီရောင်ဝရမ်းဆိုသည်မှာ ကမ္ဘာတစ်ဝှမ်းရှိ ရဲတပ်ဖွဲ့များအနေဖြင့် တရားခံအား ရှာဖွေဖမ်းဆီးကာ တရားခံလွှဲပြောင်းပေးရန် သို့မဟုတ် ဆက်စပ်ဥပဒေကြောင်းအရ အရေးယူရန် တောင်းဆိုချက်ဖြစ်သည်။
ဟောင်သည် တရုတ်နိုင်ငံသား ၅၀၀ ကျော်ထံမှ ဘတ် ၁ ဘီလျံကျော် လိမ်လည်ခဲ့သည့် နယ်စပ်ဖြတ်ကျော် ငွေလိမ်ဂိုဏ်းကြီးတစ်ခု၏ အဓိကသံသယရှိသူလည်း ဖြစ်သည်။
၎င်းတွင် ထိုင်းနိုင်ငံ၌ နှစ်အတော်ကြာ တရားဝင်နေထိုင်ခွင့်ပြုသည့် “Thailand Privilege Card” ဗီဇာရှိနေသော်လည်း၊ အမည်ဝှက်အတုကို အသုံးပြုခဲ့ခြင်းကြောင့် အာဏာပိုင်များ၏ သံသယကို ပိုမိုဖြစ်ပေါ်စေခဲ့ခြင်းဖြစ်သည်။
ဟောင် မည်သူမည်ဝါဖြစ်ကြောင်း အတည်ပြုပြီးနောက် ထိုင်းလူဝင်မှုကြီးကြပ်ရေးအရာရှိများသည် ဘန်ကောက်ရှိ တရုတ်သံရုံးနှင့် ဆက်သွယ်ခဲ့ရာ ၎င်းသည် တရုတ်ဥပဒေစိုးမိုးရေးအဖွဲ့များက အဓိကအလိုရှိနေသည့် တရားခံဖြစ်ကြောင်း အတည်ပြုနိုင်ခဲ့သည်။
စုံစမ်းစစ်ဆေးမှုများအရ ဟောင်သည် ၂၀၂၀ ပြည့်နှစ်တွင် ယူနန်ပြည်နယ်ရှိ တရားမဝင် နယ်စပ်လမ်းကြောင်းမှတစ်ဆင့် တရုတ်နိုင်ငံက ထွက်ပြေးခဲ့ပြီး မြန်မာနိုင်ငံအတွင်းသို့ ဝင်ရောက်ခဲ့သည်။ ၂၀၂၂ ခုနှစ်မှ ၂၀၂၄ ခုနှစ်အတွင်း ထိုင်းနိုင်ငံ တက်ခ်ခရိုင်နှင့် နယ်စပ်ချင်း ထိစပ်နေသည့် မြန်မာနိုင်ငံ မြဝတီမြို့နယ်၊ ကျောက်ခတ်ရှိ New Taichang Park တွင် အခြေစိုက်သည့် ရာဇဝတ်ဂိုဏ်းတစ်ခု၌ လုပ်ကိုင်ခဲ့ကြောင်း သိရသည်။
ထိုဂိုဏ်းသည် ရင်းနှီးမြှုပ်နှံမှု အတုအယောင် ပလက်ဖောင်းတစ်ခုကို လုပ်ဆောင်ခဲ့ပြီး၊ လူမှုကွန်ရက်ပေါ်တွင် ချမ်းသာသော လူပျိုလူလွတ်စီးပွားရေးသမားများအဖြစ် ပုံဖော်ကာ သားကောင်များကို လိမ်လည်ခဲ့ကြခြင်းဖြစ်သည်။ အစပိုင်းတွင် ယုံကြည်မှုရစေရန်နှင့် ငွေများများထည့်ဝင်လာစေရန် အမြတ်ငွေ အမြောက်အမြား ပြန်ပေးခဲ့သော်လည်း၊ နောက်ပိုင်းတွင် ပလက်ဖောင်းကို ပိတ်လိုက်ကာ ဆက်သွယ်မှုအားလုံး ဖြတ်တောက်ပြီး ငွေများနှင့်အတူ ပျောက်ခြင်းမလှ ပျောက်ကွယ်သွားခဲ့ကြသည်။
ထိုင်းလူဝင်မှုကြီးကြပ်ရေးရဲတပ်ဖွဲ့သည် ဟောင်ကို နိုင်ငံကူးလက်မှတ်အတု ကိုင်ဆောင်မှု၊ အသုံးပြုမှုတို့ဖြင့် ကနဦး တရားစွဲဆိုထားပြီး ထိုင်းဥပဒေအရ ဆက်လက်အရေးယူနိုင်ရန် လူဝင်မှုကြီးကြပ်ရေးဌာနခွဲ (၃) ထံ လွှဲပြောင်းပေးခဲ့သည်။ နိုင်ငံတကာ တရားစီရင်ရေး လုပ်ငန်းစဉ်များ ဆက်လက်ဆောင်ရွက်နိုင်ရန် တရုတ်အာဏာပိုင်များနှင့်လည်း ပူးပေါင်းဆောင်ရွက်လျက် ရှိသည်။
ဤဖမ်းဆီးမှုသည် နယ်စပ်ဖြတ်ကျော် ရာဇဝတ်မှုများနှင့် အမျိုးသားလုံခြုံရေးကို ခြိမ်းခြောက်မှုများကို တုံ့ပြန်ရန်အတွက် နယ်စပ်ဝင်ပေါက်များတွင် တင်းတင်းကျပ်ကျပ် စစ်ဆေးရန် ညွှန်ကြားထားသည့် ထိုင်းလူဝင်မှုကြီးကြပ်ရေး အဆင့်မြင့်အရာရှိကြီးများ၏ အမိန့်နှင့်အညီ ဆောင်ရွက်ခဲ့ခြင်းဖြစ်ကြောင်း Matichon သတင်းဌာနက ဖော်ပြခဲ့သည်။
အလားတူ သတင်းများအရ မြန်မာနိုင်ငံမှ ထိုင်းနိုင်ငံအတွင်းသို့ တရားမဝင် နယ်စပ်ဖြတ်ကျော်ဝင်ရောက်လာပြီး ဘန်ကောက်ရှိ ဟိုတယ်တစ်ခုတွင် ပုန်းအောင်းနေသည့် အွန်လိုင်းငွေလိမ်ဂိုဏ်းတွင် ပါဝင်ပတ်သက်သည်ဟု သံသယရှိရသူ တရုတ်နိုင်ငံသား ၁၄ ဦးကိုလည်း ရဲတပ်ဖွဲ့က ဖမ်းဆီးခဲ့ကြောင်း သိရသည်။
Ref : The Thaiger
About the Author
