လာမည့်နှစ် ဇန်နဝါရီလကုန်တွင် ဗြိတိန်ဝန်ကြီးချုပ် ကားစတားမား တရုတ်နိုင်ငံသို့ သွားရောက်မည်ဟု ဆို

၂၁. ၁၁. ၂၀၂၅
Translated by Thettant

ဗြိတိန်ဝန်ကြီးချုပ် ကားစတားမားသည် လာမည့်နှစ် ဇန်နဝါရီလကုန်တွင် တရုတ်နိုင်ငံသို့ သွားရောက်မည်ဖြစ်ကြောင်း Sky News က ကြာသပတေးနေ့တွင် ဖော်ပြခဲ့သည်။

၎င်းသည် ဗြိတိန်ခေါင်းဆောင်တစ်ဦးအနေဖြင့် တရုတ်နိုင်ငံသို့ ခုနစ်နှစ်အတွင်း ပထမဆုံးအကြိမ် သွားရောက်ခြင်း ဖြစ်လာမည်ဖြစ်သည်။

စတားမား၏ အလုပ်သမားပါတီအစိုးရသည် ရွေးကောက်ပွဲ ကတိကဝတ်များဖြစ်သော အခြေခံအဆောက်အအုံများ အဆင့်မြှင့်တင်ရန်နှင့် ဗြိတိန်၏ စီးပွားရေးကို တိုးတက်စေရန်အတွက် နိုင်ငံခြားရင်းနှီးမြှုပ်နှံမှုများရရှိရန် ကြိုးပမ်းနေသည့်အတွက် ပေကျင်းနှင့် ဆက်ဆံရေး တိုးတက်ကောင်းမွန်ရန်ကို ဦးစားပေး ဆောင်ရွက်နေသည်။

သို့သော် နှစ်နိုင်ငံအကြား သူလျှိုလုပ်မှုများဖြင့် အပြန်အလှန် စွပ်စွဲမှုများ ရှိခဲ့သောကြောင့် ဆက်ဆံရေးမှာ အတက်အကျ ရှိနေသည်။

ဇန်နဝါရီလတွင် သွားရောက်မည့် ဤခရီးစဉ်သည် ဝေဖန်သူများက လုံခြုံရေးအန္တရာယ် ရှိနိုင်သည်ဟု ပြောဆိုနေကြသော လန်ဒန်ရှိ တရုတ်သံရုံးအသစ်ကို အတည်ပြုရန် ဗြိတိန်က ဆုံးဖြတ်ပြီး ရက်သတ္တပတ်အနည်းငယ်အကြာတွင် ဖြစ်လာမည်ဖြစ်သည်။ ဗြိတိန်၏ ပြည်တွင်းလုံခြုံရေး အဖွဲ့အစည်းဖြစ်သော MI5 (Military Intelligence, Section 5) သည် တရုတ်သံရုံးအသစ်ကို ခွင့်ပြုလိုက်မှုအပေါ် သဘောထား အလွန်ပျော့ပြောင်းသည်ဆိုသည့် ဝေဖန်မှု သတင်းများလည်း ထွက်ပေါ်ခဲ့သည်။

နှစ်နိုင်ငံဆက်ဆံရေး တင်းမာနေဆဲဖြစ်ပြီး MI5 လုံခြုံရေးအဖွဲ့က တရုတ်အေးဂျင့်များ၏ ဗြိတိန်ပါလီမန်အမတ်များအပေါ် သတင်းအချက်အလက် စုဆောင်းမှုများနှင့် လွှမ်းမိုးမှုများအကြောင်း သတိပေးချက်အသစ်ကို ထုတ်ပြန်ခဲ့သည်။

ထို့အတူ တရုတ်အတွက် သူလျှိုလုပ်မှုဖြင့် တရားစွဲဆိုခံထားရသူ နှစ်ဦးကို ဗြိတိန်အစိုးရက တရုတ်သည် အမျိုးသားလုံခြုံရေးကို အမှန်တကယ် ခြိမ်းခြောက်ကြောင်း ခိုင်လုံသော အထောက်အထားများ ပေးအပ်ရန် ပျက်ကွက်ခဲ့သည့်အတွက် စက်တင်ဘာလတွင် တရားရုံးက အမှုပိတ်သိမ်းခဲ့သည်။

တရုတ်သံရုံးကမူ ထိုစွပ်စွဲချက်များကို “လုံးဝ လိမ်လည်ဖန်တီးထားခြင်းနှင့် မဟုတ်မမှန် စွပ်စွဲခြင်း” ဟု သုံးနှုန်းကာ ဗြိတိန်-တရုတ် ဆက်ဆံရေးကို ထိခိုက်စေသည့် လုပ်ရပ်များကို ချက်ချင်း ရပ်တန့်ရန် တောင်းဆိုခဲ့သည်။

ဝန်ကြီးချုပ်ရုံးအား စတားမား၏ ဖြစ်နိုင်ခြေရှိသော ခရီးစဉ်နှင့် ပတ်သက်၍ မေးမြန်းခဲ့ရာတွင် ပုံမှန်အတိုင်း သွားလာရေး အစီအစဉ်များအားလုံးကို ထုတ်ပြန်ပေးသွားမည်ဟုသာ ပြောကြားခဲ့သည်။ သို့သော် တရုတ်သံရုံးအနေဖြင့်မူ မှတ်ချက်ပေးရန် တောင်းဆိုမှုကို ချက်ချင်းတုံ့ပြန်ခြင်းမရှိပေ။

Ref : SCMP