၂၅. ၅. ၂၀၂၅
Translated by Thettant
လက်ရှိတွင် အာဆီယံဥက္ကဋ္ဌအဖြစ် တာဝန်ယူထားသော မလေးရှားနိုင်ငံသည် မြန်မာနိုင်ငံတွင် ကာလကြာရှည် ဖြစ်ပွားနေသော ပြည်တွင်းနိုင်ငံရေးအကျပ်အတည်းပဋိပက္ခကို ဖြေရှင်းရန် အာဆီယံ၏ ကြိုးပမ်းအားထုတ်မှု တစ်စိတ်တစ်ပိုင်းအဖြစ် နိုင်ငံတော်စီမံအုပ်ချုပ်ရေးကောင်စီ (SAC) နှင့် တိုက်ရိုက်ဆွေးနွေးမှုများ ပြုလုပ်ရေး မြန်မာနိုင်ငံသို့ ကိုယ်စားလှယ်အဖွဲ့ စေလွှတ်မည်ဟု ရည်ရွယ်ထားသည်။
မလေးရှား နိုင်ငံခြားရေးဝန်ကြီး ဒါတွတ်ဆာရီ မိုဟာမက် ဟာဆန်က ဒေသတွင်း ငြိမ်းချမ်းရေးနှင့် တည်ငြိမ်မှုကို ပြန်လည်ထိန်းသိမ်းရာတွင် အာဆီယံအနေဖြင့် တက်ကြွစွာ ပါဝင်ဆောင်ရွက်သင့်ကြောင်းနှင့် အထူးသဖြင့် ပဋိပက္ခကြောင့် ဖြစ်ပေါ်လာသည့် နယ်စပ်ဖြတ်ကျော်သက်ရောက်မှုများကို ထည့်သွင်းစဉ်းစားရမည်ဖြစ်ကြောင်း ပြောကြားခဲ့သည်။
“မြန်မာနိုင်ငံရဲ့ အခြေအနေကို ကောင်းစွာ စီမံခန့်ခွဲနိုင်အောင် ကြိုးပမ်းအားထုတ်မှုက လိုအပ်တယ်ဆိုတာကို ကျွန်တော်တို့ သဘောတူပါတယ်။ ဘာဖြစ်လို့လဲဆိုတော့ မြန်မာနိုင်ငံဟာ အာဆီယံမိသားစုရဲ့ တစ်စိတ်တစ်ပိုင်း ဖြစ်နေလို့ပါ။ ပြီးတော့ အာဆီယံမိသားစုဝင်တစ်ဦးအနေနဲ့ မြန်မာနိုင်ငံ ကောင်းမွန်တဲ့ အခြေအနေမှာ ရှိနေဖို့ အာဆီယံမှာ တာဝန်ရှိပါတယ်” ဟု ၎င်းက ကွာလာလမ်ပူတွင် စနေနေ့က ကျင်းပပြုလုပ်ခဲ့သည့် ၄၆ ကြိမ်မြောက် အာဆီယံထိပ်သီးအစည်းအဝေးသတင်းစာရှင်းလင်းပွဲတွင် ပြောကြားခဲ့သည်။
မလေးရှားနိုင်ငံသည် မကြာသေးမီက ကွာလာလမ်ပူတွင် အာဆီယံကိုယ်စားလှယ်များနှင့် တွေ့ဆုံခဲ့ကြသော မြန်မာနိုင်ငံမှ ပါဝင်ပတ်သက်သူများ၏ အမြင်များနှင့် မျှော်လင့်ချက်များကို တပ်မတော်
ဦးဆောင်သည့် မြန်မာအစိုးရထံသို့ တိုက်ရိုက်ပေးပို့မည်ဟု ၎င်းက ပြောကြားခဲ့သည်။
“အာဆီယံဥက္ကဋ္ဌတစ်ဦးအနေနဲ့ ကျွန်တော်တို့ မြန်မာနိုင်ငံကို သွားရောက်လည်ပတ်ပြီး စကားပြောဖို့ စီစဉ်ထားပါတယ်။ ဘာဖြစ်လို့လဲဆိုတော့ သက်ဆိုင်ရာ ပါဝင်ပတ်သက်သူတွေနဲ့ တွေ့ဆုံပြီးသွားပါပြီ။ သူတို့ရဲ့ လိုအင်ဆန္ဒတွေကို သိပါတယ်။ အခု SAC ကို တင်ပြချင်ပါတယ်” ဟု ၎င်းက ပြောကြားခဲ့သည်။
“အဲဒီနောက် SAC ကနေ ဘယ်လို တုံ့ပြန်မှု၊ အကြောင်းပြန်ကြားမှုတွေ ရရှိလဲဆိုတာကို ကြည့်ပါမယ်” ဟု ၎င်းက ဆက်ပြောသည်။
မိုဟာမက်က ၎င်းသည် မြန်မာနိုင်ငံ၏ ပြည်တွင်းရေးကို ဝင်ရောက်စွက်ဖက်ခြင်း မဟုတ်ဘဲ အာဆီယံတစ်ခုလုံးကို ထိခိုက်နေသော ပြဿနာတစ်ခုကို ဖြေရှင်းရန်အတွက် လိုအပ်သည့် ခြေလှမ်းဖြစ်ကြောင်း အလေးထားပြောကြားခဲ့သည်။အထူးသဖြင့် ဒုက္ခသည်များ လှုပ်ရှားသွားလာမှုနှင့် နယ်စပ်ဖြတ်ကျော်ရာဇဝတ်မှုများကဲ့သို့သော ကိစ္စရပ်များတွင် ဖြစ်သည်။
မြန်မာနိုင်ငံသည် ဘုံသဘောတူညီချက် ငါးရပ်ကို သဘောတူထားပြီး အဓိက စိန်ခေါ်မှုမှာ အကောင်အထည်ဖော်ခြင်း မဟုတ်တော့ဘဲ ဘက်အသီးသီးအကြား ယုံကြည်မှု ကင်းမဲ့ခြင်းဖြစ်သည်ဟု ၎င်းက ထပ်လောင်းပြောကြားခဲ့သည်။
“ဘုံသဘောတူညီချက် ငါးရပ်က မခက်ခဲပါဘူး။ ပထမအချက်ကတော့ သူတို့ရဲ့ ပြည်သူတွေ၊ လူမျိုးစုအသီးသီးအပေါ် ရန်လိုမှုအားလုံးကို ရပ်တန့်ပြီး ဆွေးနွေးညှိနှိုင်းဖို့ပါပဲ။ ပြီးတော့ လူသားချင်းစာနာထောက်ထားမှု အကူအညီပေးရေးက မနှောင့်နှေးရပါဘူး။ အဲဒီနောက်မှာ ခန့်အပ်ထားတဲ့ အထူးကိုယ်စားလှယ်ဟာ မြန်မာနိုင်ငံရှိ ပါဝင်သူအားလုံးနဲ့ တွေ့ဆုံနိုင်ဖို့ ကျွန်တော်တို့ကို သေချာစေရပါမယ်” ဟု ၎င်းက ပြောကြားခဲ့သည်။
မိုဟာမက်က မြန်မာနိုင်ငံ၏ ပြည်တွင်းရေး အခြေအနေများမှာ ဆယ်စုနှစ်များစွာကြာမြင့်နေပြီဖြစ်သော ဒေသများစွာ၊ ဘာသာစကားများနှင့် မတူညီသော အထောက်အထားများရှိသည့် လူမျိုးစု ပဋိပက္ခများက အမြစ်တွယ်နေသောကြောင့် မည်သည့် ပုံစံမျိုးဖြင့်မဆို ပေါင်းစည်းညီညွတ်သော ဆွေးနွေးညှိနှိုင်းမှုများကို ရှုပ်ထွေးစေသည်ဟု ထပ်မံပြောကြားခဲ့သည်။
သို့သော် အာဆီယံအနေဖြင့် စဉ်ဆက်မပြတ် ပါဝင်ဆောင်ရွက်သွားရန် ကတိပြုထားဆဲဖြစ်ကြောင်း ၎င်းက ပြောကြားခဲ့သည်။
“ဒီဆွေးနွေးပွဲတွေက တစ်ကြိမ်၊ နှစ်ကြိမ်တည်းနဲ့ ဖြစ်ပေါ်လာနိုင်တာ မဟုတ်ပါဘူး။ အပြန်အလှန်နားလည်မှု တည်ဆောက်ဖို့အတွက် ထပ်ခါထပ်ခါ လုပ်ဆောင်ရပါမယ်” ဟု ၎င်းက ဆက်ပြောသည်။
မြန်မာနိုင်ငံကို အာဆီယံ၏ အဆင့်မြင့်နိုင်ငံရေး အစည်းအဝေးများမှ ဖယ်ထုတ်ထားဆဲ ဖြစ်သော်လည်း မိုဟာမက်က မြန်မာနိုင်ငံကို လုံးဝပိတ်ပင်ထားခြင်း မရှိကြောင်း ပြောကြားခဲ့သည်။
“သူတို့ကို ဖိတ်ကြားထားပါတယ်။ ဒါပေမဲ့ နိုင်ငံရေးအရ ဖိတ်ခေါ်ထားတာတော့ မဟုတ်ပါဘူး။ သူတို့ ဒီမှာ ရှိနေပါလိမ့်မယ်” ဟု ၎င်းက ပြောကြားခဲ့သည်။
Ref, Malaysian Reserve
About the Author
