◾️ မြန်မာ့အရေးအပေါ် မလေးရှားနိုင်ငံ၏ ဆောင်ရွက်ချက်များကို အာဆီယံခေါင်းဆောင်များက ကောင်းမွန်ကြောင်း ထောက်ခံခဲ့သလို ရွေးကောက်ပွဲအတွက် တင်းကျပ်သော တောင်းဆိုမှုမရှိဘဲ မြန်မာပြည်သူများကိုယ်တိုင် ရွေးချယ်ရန်ပါ ပြောကြား
၂၂. ၅. ၂၀၂၅
Translated by Tha Doe
မြန်မာ့အရေးနှင့်ပတ်သက်၍ မကြာသေးမီက ဖြစ်ပေါ်တိုးတက်မှုများကို “ထူးခြားသော တိုးတက်မှု” အဖြစ် အာဆီယံ ဥက္ကဋ္ဌနှင့် မလေးရှားဝန်ကြီးချုပ် ဒါတွခ် ဆရီ အန်ဝါ အီဘရာဟင်က ဖော်ပြခဲ့ပြီး သက်ဆိုင်ရာ ဘက်အသီးသီးမှ ပါဝင်သူအားလုံးနှင့် အပြုသဘောဆောင်သော ထိတွေ့ဆက်ဆံမှုများ ရှိခဲ့ကြောင်း ထောက်ပြပြောဆိုခဲ့သည်။
ထို့အပြင် အန်ဝါက ဘက်စုံပါဝင်သော ဆွေးနွေးပွဲနှင့် မြန်မာနိုင်ငံရှိ လူသားချင်းစာနာထောက်ထားမှု အကူအညီများ ပိုမိုရရှိရေးအတွက် မလေးရှားက တက်ကြွစွာ တွန်းအားပေးခဲ့ကြောင်း ပြောကြားခဲ့သလို အဆိုပါဆောင်ရွက်ချက်သည်လည်း အာဆီယံ၏ ဘုံသဘောတူညီချက် ငါးချက်နှင့် ကိုက်ညီကြောင်း ပြောကြားခဲ့သည်။ ယင်းအပြင် ပဋိပက္ခဒေသတွင် မကြာသေးမီက ဖြစ်ပွားခဲ့သော ငလျင်လှုပ်ခတ်မှုအပေါ် ညှိနှိုင်းတုံ့ပြန်မှုသည် သက်ဆိုင်သူအသီးသီးနှင့် လက်ရှိ ထိတွေ့ဆက်ဆံမှုများမှတစ်ဆင့် လူသားချင်းစာနာထောက်ထားမှုဆိုင်ရာ အကူအညီရရှိမှု တိုးတက်လာပုံ၏ ဥပမာတစ်ခုဖြစ်ကြောင်းလည်း အန်ဝါက ကိုးကားပြောဆိုခဲ့သည်။
“မြန်မာနိုင်ငံမှာဆိုရင် ဥပမာအားဖြင့်၊ ကျွန်တော်တို့အားလုံး ဘက်အသီးသီးက ပါဝင်သူအားလုံးနဲ့ ထိတွေ့ဆက်ဆံနိုင်ခဲ့တယ်။ ဒါက နံပါတ်တစ်ပေါ့။ နံပါတ်နှစ်ကတော့ အပစ်အခတ်ရပ်စဲရေးကို အာမခံနိုင်ခဲ့တယ်။ ပြီးတော့ နံပါတ်သုံးကတော့ ဘယ်အဖွဲ့ကပဲ ထိန်းချုပ်ထားပါစေ၊ လူသားချင်းစာနာထောက်ထားမှု အကူအညီတွေအားလုံးကို ဘယ်ဒေသခွဲကိုမဆို သွားရောက်နိုင်ဖို့ ကျွန်တော်တို့ အာမခံနိုင်ခဲ့တယ်။ အခုဆိုရင် အဖွဲ့သုံးဖွဲ့ ရှိတယ်။”ဟု ပြောသည်။
ထို့အပြင် “အခုထိတော့ ကျွန်တော့်အတွက် ဒါက ကောင်းပါတယ်။ ဒီအခွင့်အရေးကို အကောင်းဆုံးအသုံးချဖို့ ဘုံသဘောတူညီချက် ငါးချက်ရဲ့ ကျယ်ပြန့်တဲ့ ဘောင်များအတွင်းကနေ ကျွန်တော်တို့ ဆောင်ရွက်ရပါမယ်။ ကျွန်တော်တို့ ဒါကို မဖမ်းဆုပ်နိုင်ဘဲ ပူးပေါင်းဆောင်ရွက်မှု မရှိရင် အားလုံး ဆုံးရှုံးရမှာပဲ” ဟု ၎င်းက ဒေသတွင်းနှင့် နိုင်ငံတကာမီဒီယာများမှ အယ်ဒီတာချုပ်များကို အာဆီယံ ထိပ်သီးအစည်းအဝေး ၂၀၂၅ နှင့်ပတ်သက်သည့် သတင်းအချက်အလက် ရှင်းလင်းပွဲအတွင်း ပြောကြားခဲ့သည်။
အဆိုပါပွဲသို့ မီဒီယာကိုယ်စားလှယ် စုစုပေါင်း ၈၃ ဦး တက်ရောက်ခဲ့ပြီး ဒေသတွင်း မီဒီယာမှ ၄၂ ဦး၊ နိုင်ငံတကာ မီဒီယာမှ ၁၈ ဦးနှင့် သတင်းယူရန် တာဝန်ပေးအပ်ခံရသူ ၂၃ ဦး ပါဝင်ခဲ့ကာ ရှင်းလင်းပွဲအတွင်း အန်ဝါက မလေးရှား၏ ကြိုးပမ်းမှုသည် အာဆီယံအဖွဲ့ဝင်နိုင်ငံများ၏ ထောက်ခံမှုကို ရရှိခဲ့ကြောင်းလည်း မျှဝေခဲ့သည်။
“ကျွန်တော့်လုပ်ဖော်ကိုင်ဘက် ကိုးဦးဖြစ်တဲ့ ဘရူနိုင်းဘုရင် (ဆူလ်တန် ဟာဆန်နာ ဘိုကီယား) ကနေ ဖိလစ်ပိုင်သမ္မတ ဘောင်ဘောင် (ဖာဒီနန် မာကို့စ် ဂျူနီယာ)၊ ဗီယက်နမ်ဝန်ကြီးချုပ် (ဖမ် မင်း ချင်)၊ အင်ဒိုနီးရှားသမ္မတ (ပရာဘိုဝို ဆူဘီယန်တို) နဲ့ စင်ကာပူဝန်ကြီးချုပ် (လောရန့်စ် ဝေါင်) အထိ တိုင်ပင်တဲ့အခါ ဘယ်သူကမှ သတိထားပါ ဒါမှမဟုတ် သတိထားမနေပါနဲ့လို့ မပြောဘူး။ အားလုံးက ဒီအခွင့်အရေးက ကောင်းပါတယ်။ ပါဝင်သူအားလုံးနဲ့ ထိတွေ့ဆက်ဆံဖို့ အသုံးချပါလို့ ပြောကြတယ်” ဟု ၎င်းက ဆိုသည်။
ထို့အပြင် အန်ဝါက မြန်မာ့ ပဋိပက္ခတွင် ပါ၀င်နေသည့်ဘက်အသီးသီးက ယခုအခါ သွယ်ဝိုက်သောနည်းဖြင့် စတင်ဆွေးနွေးနေပြီဖြစ်သဖြင့် မလေးရှား၏ ကြိုးပမ်းမှုများသည် အပြုသဘောဆောင်သော ရလဒ်များ ရရှိခဲ့ကြောင်း ဖြည့်စွက်ပြောကြားခဲ့သည်။
“ကျွန်တော် ထင်ပါတယ်၊ သူတို့ စကားပြောဖို့ အချိန်တန်ပါပြီ။ မြန်မာပြည်သူတွေ ကိုယ့်ဘာသာကိုယ် ဆုံးဖြတ်ရမှာပါ။ ကျွန်တော်တို့ လာမယ့်နှစ်မှာ ဒီမိုကရေစီကို တောင်းဆိုတာမျိုး ဒါမှမဟုတ် ရွေးကောက်ပွဲတွေကို ဘယ်လိုလုပ်ရမယ်ဆိုတာကို သတ်မှတ်တာမျိုး တင်းကျပ်တဲ့ ဘောင်တွေကို ချမှတ်တာမျိုး မရှိပါဘူး။ ဘယ်နိုင်ငံက တခြားနိုင်ငံတွေကို မှန်ကန်တဲ့ ရွေးကောက်ပွဲတွေ ဘယ်လိုလုပ်ရမယ်ဆိုတာ သင်ပေးနိုင်လဲဆိုတာ ကျွန်တော် မသေချာဘူး။ ဒါကြောင့် သူတို့ ကိုယ့်ဘာသာကိုယ် ဆုံးဖြတ်ပါစေ” ဟု ၎င်းက ဆက်လက် ပြောကြားခဲ့သည်။
Ref , malaymail
About the Author
