
၄. ၂. ၂၀၂၅
Translated by Thettant
ထိုင်းနဲ့ တရုတ်အာဏာပိုင်တွေဟာ သူတို့နိုင်ငံသားတွေ အပါအဝင် လူထောင်ပေါင်းများစွာ လူကုန်ကူးခံနေရသလို ကမ္ဘာတဝှမ်းကို ပစ်မှတ်ထား သားကောင်ရှာဖွေပြီး အွန်လိုင်း လိမ်လည်လှည့်ဖြားမှု ကျားဖြန့်လုပ်ငန်းတွေ လုပ်ဆောင်နေတယ်လို့ နာမည်ကျော်တဲ့ မြဝတီဘက်ခြမ်းက ရွှေကုက္ကိုလ်ကို လျှပ်စစ်မီး ဖြတ်တောက်ဖို့ ထိုင်းအစိုးရက စီရင်စု လျှပ်စစ်အာဏာပိုင်ကို ဒီအင်္ဂါနေ့မှာ အမိန့်ပေးလိုက်ပါတယ်။
ထိုင်း ဝန်ကြီးချုပ် ပေတုံတန် ရှင်နာဝပ်ထရာဟာ တရုတ်နိုင်ငံကို ဖေဖော်ဝါရီ ၅ ရက်ကနေ ၈ ရက်အထိ လေးရက်ကြာ သွားရောက်မှာဖြစ်ပြီး ဒီ ခရီးစဉ်အတွင်း တရုတ်သမ္မတ ရှီကျင့်ဖိန်နဲ့ လာမယ့် ကြာသပတေးနေ့မှာ တွေ့ဆုံဖို့ စီစဉ်ထားချိန်မှာ မြန်မာဘက်က ကျားဖြန့်တွေဆီ လျှပ်စစ်မီးရောင်းချနေတာကို ချက်ချင်းဖြတ်တောက်ဖို့ အမိန့် ထွက်ပေါ်လာခဲ့တာလည်းဖြစ်ပါတယ်။
ဒါ့အပြင် တရုတ်ပြည်သူ့လုံခြုံရေး ဒုဝန်ကြီး Liu Zhongyi ဟာ ပြီးခဲ့တဲ့ သီတင်းပတ်က ထိုင်းနိုင်ငံကို သွားရောက်ခဲ့ပြီး ထိုင်း-မြန်မာ နယ်နိမိတ်တစ်လျှောက်က ရွှေကုက္ကိုလ်နဲ့ KK Park တို့က ကျားဖြန့်တွေဆီပေးနေတဲ့ လျှပ်စစ်နဲ့တယ်လီကွန်းဝန်ဆောင်မှုတွေကို ဖြတ်တောက်ဖို့ ထိုင်းနိုင်ငံကို တောင်းဆိုခဲ့တာကလည်း အကြောင်း အချက်တစ်ခုအနေနဲ့ ပါဝင်ပါတယ်။
ထိုင်းနယ်စပ်အနီး မြန်မာနိုင်ငံမှာ လုပ်ကိုင်နေတဲ့ ကျားဖြန့် လိမ်လည်ဂိုဏ်းတွေဟာ ထိုင်းနိုင်ငံဘက်က လောင်စာဆီနဲ့ လျှပ်စစ်ဓာတ်အားကို သုံးစွဲနေတယ်လို့ ရှင်းရှင်းလင်းလင်းအထောက်အထားတွေ့ရင် ချက်ချင်းဖြတ်တောက်ဖို့ ပေတုံတန်က ညွှန်ကြားခဲ့သလို “ကျွန်မတို့ ပြည်သူတွေကို ဂရုစိုက်ရမယ်” လို့လည်း ပြောကြားခဲ့ပါသေးတယ်။
ကျားဖြန့်လိမ်လည်ဂိုဏ်းတွေရဲ့ လှုပ်ရှားမှုတွေဟာ ထိုင်းပြည်သူတွေနဲ့ ထိုင်းနိုင်ငံရဲ့ ပုံရိပ်အပေါ် ကြီးမားတဲ့ သက်ရောက်မှုရှိခဲ့ပါတယ်။
“ဒါဟာ ပြင်းထန်တဲ့ အတိုင်းအတာတွေ လိုအပ်ပါတယ်။ ချက်ချင်း ချမှတ်နိုင်တဲ့၊ ဒါက လေးနက်တဲ့ ကိစ္စပါ။ နိုင်ငံတိုင်းအတွက် တကယ်ကို စိုးရိမ်ပါတယ်”လို့ ပေတုံတန်က ထပ်မံ ပြောကြားခဲ့သလိုထောက်ပံ့မှုကို ဘယ်အချိန်မှာ ဖြတ်သင့်လဲလို့ မေးရာမှာလည်း “ဒီနေ့ ပြီးသွားပါပြီ။ ဆွေးနွေးမှုတွေ ရှင်းရှင်းလင်းလင်း ကောက်ချက်ချနိုင်ရင် ဒီနေ့ ဖြတ်လို့ရပါတယ်”လို့ ပြောခဲ့ပါတယ်။
ဒါ့အပြင် ဒုတိယဝန်ကြီးချုပ်နဲ့ ကာကွယ်ရေးဝန်ကြီး Phutham Wechayachai ကလည်း ဒီလို လျှပ်စစ်မီးပေးနေမှုဟာ နိုင်ငံတော်လုံခြုံရေးကို ထိခိုက်မယ်ဆို နယ်စပ်ဖြတ်ကျော် ဓာတ်အားပေးနေမှုကို ပြည်နယ်လျှပ်စစ်အာဏာပိုင်တွေက ချက်ချင်းဖြတ်တောက်နိုင်တယ်လို့လည်း အတည်ပြုခဲ့ပါတယ်။
ဒါ့အပြင် ၂၀၂၂ ခုနှစ် ဇွန်လကနေ ၂၀၂၄ ခုနှစ် ဇွန်လအထိ ထိုင်းပြည်သူ ၅၀၀,၀၀၀ ကျော်ဟာလိမ်လည်ဂိုဏ်းများရဲ့ သားကောင်ဖြစ်ခဲ့ပြီး ဘတ်ဘီလျံ ၆၀ ကျော် ဆုံးရှုံးခဲ့ရပါတယ်။ “လို့လည်း Mr Phumtham က ဆက်လက်ပြောပါတယ်။
ထိုင်းနိုင်ငံဟာ မြန်မာနိုင်ငံဘက်ခြမ်းက ဘုရားသုံးဆူ၊ တာချီလိတ်နဲ့ ကျားဖြန့်ဂိုဏ်းတွေတည်ရှိရာလို့ နာမည်ကျော် မြဝတီက နေရာငါးခုကို လျှပ်စစ်မီးပေးနေတာဖြစ်ပြီး ဒီလို မီးပေးနေမှုမှာလည်း တခြားနိုင်ငံတွေကို ရောင်းချတဲ့နှုန်းထက် အမြတ်တင်ထားတာကြောင့် လစဥ်ဘတ်သန်းရာချီ ဝင်ငွေရနေတာပါ။ လတ်တလောမှာတော့ မြဝတီဘက်က ရွှေကုက္ကိုလ်နဲ့ KNU ဥက္ကဋ္ဌ ကွယ်ထူးဝင်း လက်မှတ်ရေးထိုးလုပ်ဆောင်ခဲ့တဲ့ KK Park ကို ထိုင်းဘက်က ပေးနေတဲ့ လျှပ်စစ်မီးက ထိုင်းနိုင်ငံကို ထိခိုက်စေရင် ချက်ချင်းဖြတ်တောက်နိုင်တယ်လို့ အမိန့်ပေးတဲ့အသွင်သာ ထိုင်းသတင်းတွေမှာ ရေးသားတာဖြစ်ပြီး နေရာငါးခုစလုံးကို ချက်ချင်းဖြတ်တောက်မယ်ဆိုတဲ့ ညွှန်ကြားမှုတော့ မတွေ့ရသေးပါဘူး။
Ref , Nikkei Asia & Bangkok Post