၂. ၃. ၂၀၂၄
Written by Pan Ei
မြန်မာနိုင်ငံက အကျပ်အတည်းတွေဟာ နိုင်ငံတကာရဲ့ မီးမောင်းထိုးပြမှုနဲ့ ဝေးကွာနေတဲ့ တိုင်းပြည်က ပြည်သူတွေအတွက် မဆုံးနိုင်တဲ့ “အိပ်မက်ဆိုး” ဖြစ်တယ်လို့ ကုလသမဂ္ဂ လူ့အခွင့်အရေး အကြီးအကဲ Volker Türk က လူ့အခွင့်အရေးကောင်စီကို သောကြာနေ့က ပြောခဲ့ပါတယ်။
ကုလသမဂ္ဂရဲ့ထိပ်တန်းအခွင့်အရေးဖိုရမ်အတွက် စီစဉ်ထားတဲ့ အပ်ဒိတ်တစ်ခုမှာ ကုလသမဂ္ဂလူ့အခွင့်အရေးဆိုင်ရာ မဟာမင်းကြီးရုံးက မြန်မာနိုင်ငံမှာ ၂၀၂၁ ခုနှစ်က ဖြစ်ပွားခဲ့တဲ့ အာဏာအငြင်းပွားမှုနဲ့ဆက်စပ်နေတဲ့ လူသားချင်းစာနာထောက်ထားမှုဆိုင်ရာ အရေးပေါ်အခြေအနေဟာ မကြာသေးမီလတွေအတွင်းမှာ ပိုမိုဆိုးရွားလာခဲ့တယ်လို့ ရှင်းပြခဲ့ပါတယ်။
“သုံးနှစ်ကြာလွန်လာပြီးတဲ့နောက်မှာ မြန်မာနိုင်ငံက ပြည်သူတွေအပေါ် သည်းမခံနိုင်တဲ့ ဆင်းရဲဒုက္ခတွေနဲ့ ရက်စက်ကြမ်းကြုတ်မှုတွေ ဆက်ပြီး တိုးလာနေပါတယ်” လို့ နိုင်ငံတဝှမ်း လက်နက်ကိုင် ပဋိပက္ခတွေ ပြင်းထန်စွာ မြင့်တက်လာချိန် လေကြောင်းမှ တိုက်ခိုက်မှုတွေကြောင့် အပါအဝင် လူပေါင်း ထောင်နဲ့ချီပြီး အသက်ဆုံးရှုံးခဲ့ရတယ် ဆိုတာတွေအပေါ် မူတည်ပြီး Volker Türk က ပြောကြားခဲ့ကာ “လူ့အသက်ကို အလေးမထားခြင်း” ဟာ နိုင်ငံတဝှမ်းမှာ အခြေခံအခွင့်အရေးတွေနဲ့ တရားဥပဒေစိုးမိုးမှုကို ချိုးဖောက်တာတွေ ဖြစ်စေတယ်လို့လည်း မစ္စတာ Türk က အခိုင်အမာပြောကြားခဲ့ပါတယ်။
ဒီနေ့ မြန်မာနိုင်ငံမှာ အမျိုးသမီး ၃၉၀၉ ဦး အပါအဝင် တပ်မတော်ကို ဆန့်ကျင်သူ ၂၀,၀၀၀ ကျော်ဟာ ထိန်းသိမ်းခံထားရဆဲဖြစ်ကြောင်း မဟာမင်းကြီးရုံးက သိရတယ်လို့ ဖော်ပြခဲ့ပြီး လူအများဟာလည်း ဘယ်အချိန်မှာမဆို ဖမ်းဆီးခံရမှာကို ကြောက်ရွံ့နေကြရကြောင်း ဆက်လက်ပြောဆိုခဲ့သလို အရပ်သားတွေကို ပစ်မှတ်ထားတိုက်ခိုက်တဲ့ စစ်ရေးလှုပ်ရှားမှုတွေကို ချက်ချင်းရပ်ပစ်ဖို့၊ နိုင်ငံရေးအကျဉ်းသားတွေ လွှတ်ပေးဖို့နဲ့ နိုင်ငံတကာလူ့အခွင့်အရေးဥပဒေတွေကို အပြည့်အဝလိုက်နာဖို့လည်း SAC ကို သူက တောင်းဆိုခဲ့ပါတယ်။
မြန်မာစစ်အစိုးရဘက်ကို စစ်ဘက်ဆိုင်ရာ လက်နက်တွေ ထောက်ပံ့မှု ရရှိခွင့်ကို ကန့်သတ်ခြင်းတွေအပါအဝင် နိုင်ငံကို အုပ်စိုးနေတဲ့ လူ့အခွင့်အရေး အကျပ်အတည်းကို အဆုံးသတ်ဖို့ ကမ္ဘာလုံးဆိုင်ရာ စည်းလုံးညီညွတ်မှုနဲ့ ပံ့ပိုးကူညီမှုတို့အတွက် အရေးတကြီး လိုအပ်ကြောင်း မစ္စတာ Türk က အလေးအနက် ပြောကြားခဲ့ပါတယ်။
“ပြီးခဲ့တဲ့ သုံးနှစ်အတွင်းမှာ မြန်မာနိုင်ငံက လူတွေဟာ အရာရာကို စတေးပြီး ပိုမိုကောင်းမွန်လုံခြုံတဲ့ အနာဂတ်အတွက် သူတို့ရဲ့ မျှော်လင့်ချက်တွေနဲ့ ဆက်လက်ရှင်သန်ခဲ့ကြပါတယ်။ သူတို့ကို ပံ့ပိုးပေးဖို့ နိုင်ငံတကာ အသိုင်းအဝိုင်းတစ်ခုလုံး လိုအပ်တယ်” လို့ ကုလသမဂ္ဂ လူ့အခွင့်အရေး အကြီးအကဲက အခုလို အခိုင်အမာ ပြောကြားခဲ့တာပဲဖြစ်ပါတယ်။
Ref; UN News
