သက်တံ့
၁၇. ၁၀. ၂၀၂၆
ငွေကြေးခဝါချသည့် ဂိုဏ်းများသို့ ဘဏ်အကောင့်ပေါင်း ၁၃၃ ခုကျော် ထောက်ပံ့ပေးခဲ့ပြီး ယွမ်သန်း ၅၀၀ (ထိုင်းဘတ် ၂ ဘီလီယံခန့် သို့မဟုတ် အမေရိကန်ဒေါ်လာ ၆၂ သန်းခန့်) လှည့်ပတ်စီးဆင်းခဲ့သည့် ဘဏ်အကောင့်တု (Mule Account) ကွန်ရက်တစ်ခုကို လုပ်ကိုင်ခဲ့သည်ဟု စွပ်စွဲခံထားရသော တရုတ်တရားခံပြေးတစ်ဦးကို ဘန်ကောက်မြို့တွင် ထိုင်းလူဝင်မှုကြီးကြပ်ရေး ရဲတပ်ဖွဲ့က ဖမ်းဆီးရမိခဲ့သည်။
လူဝင်မှုကြီးကြပ်ရေး တပ်ဖွဲ့ခွဲ (၃) မှ ရဲအရာရှိများသည် အသက် ၃၇ နှစ်အရွယ် ဝူ (Wu) ဟု အမည်ရသည့် အဆိုပါ တရုတ်နိုင်ငံသားအား အောက်တိုဘာ ၁၆ ရက် (သောကြာနေ့) က ဆဖန်းဆောင်း (Saphan Sung) ခရိုင်ရှိ အိမ်ရာဝန်းတစ်ခုအတွင်းရှိ နေအိမ်၌ ဖမ်းဆီးခဲ့ခြင်းဖြစ်သည်။ ၎င်းအား တရားမဝင် တိုးတိုးတိုးတိတ် ငွေတိုးချေးစားသည့် ဂိုဏ်းနှင့် ဆက်စပ်သော ပြစ်မှုများဖြင့် တရုတ်နိုင်ငံက ဖမ်းဝရမ်း ထုတ်ပြန်ထားပြီး၊ ထိုင်းလုံခြုံရေး တပ်ဖွဲ့ဝင်များ၏ အဖမ်းအဆီးကို ၃ နှစ်ကျော်ကြာ တိမ်းရှောင်မှု ပြုလုပ်ခဲ့ကြောင်း ရဲတပ်ဖွဲ့က ပြောကြားခဲ့သည်။
ဝူ သည် လူများအား ငွေပေး၍ ဘဏ်အကောင့်များ ဖွင့်လှစ်ခိုင်းခြင်း၊ အဆိုပါ ဘဏ်ကတ်များနှင့် အကောင့်အသေးစိတ် အချက်အလက်များကို စုဆောင်းကာ ငွေကြေးခဝါချသည့် အဖွဲ့များထံ လွှဲပြောင်းပေးခြင်းတို့ဖြင့် နိုင်ငံဖြတ်ကျော် ရာဇဝတ်ဂိုဏ်းတစ်ခုကို ထောက်ပံ့ပေးခဲ့ကြောင်း ရဲတပ်ဖွဲ့က ဆိုသည်။
ထို့ပြင် ၎င်းသည် ရာဇဝတ်ဂိုဏ်းများအတွက် ခရစ်ပတိုကာရင်စီနှင့် နိုင်ငံခြားငွေလဲလှယ်ပေးခြင်း၊ အခြား ငွေကြေးခဝါချမှုများနှင့် ဆက်စပ်နေသော ဂိုဏ်းဝင်များအတွက် ဗီဇာစီစဉ်ပေးခြင်းများကိုလည်း ပြုလုပ်ခဲ့သည်ဟု စွပ်စွဲခံထားရသည်။
စုံစမ်းစစ်ဆေးသူများ၏ အဆိုအရ ဝူ သည် ၎င်း၏ နေရပ်လိပ်စာကို အတုအယောင် စာရွက်စာတမ်းများဖြင့် သတင်းပို့ခြင်း၊ မော်တော်ယာဉ် နံပါတ်ပြားများ လဲလှယ်ခြင်းနှင့် ကားအရောင်ကို စတစ်ကာ ကပ်၍ ပြောင်းလဲခြင်းတို့ဖြင့် ရဲတပ်ဖွဲ့ကို လမ်းလွဲအောင် ပြုလုပ်ခဲ့သည်။ ရဲတပ်ဖွဲ့သည် ၎င်းကို ခြေရာခံရန် အင်တာပို (Interpol) ၏ ဒေတာဘေ့စ်ကို အသုံးပြုခဲ့ပြီး မြေပြင်စုံစမ်းစစ်ဆေးမှုများမှတစ်ဆင့် ဆဖန်းဆောင်း ခရိုင်၊ ရမ်ခမ်းဟဲင်း (Ramkhamhaeng) ဧရိယာရှိ စံအိမ်ဇိမ်ခံအိမ်တစ်အိမ်သို့ ခြေရာခံလိုက်ပါနိုင်ခဲ့ခြင်းဖြစ်သည်။
၎င်း၏ ထိုင်းနိုင်ငံအတွင်း နေထိုင်ခွင့် သက်တမ်းသည် လွန်ခဲ့သော ၃ နှစ်နှင့် ၈ လခန့်ကတည်းက ကုန်ဆုံးခဲ့ပြီးဖြစ်သည်။ ၎င်းအား ၁၉၇၉ ခုနှစ် လူဝင်မှုကြီးကြပ်ရေး အက်ဥပဒေ ပုဒ်မ ၈၁ အရ ပြည်ဝင်ခွင့် သက်တမ်းလွန် နေထိုင်မှု (Overstay) ဖြင့် တရားစွဲဆိုထားပြီး စုံစမ်းစစ်ဆေးရေး အရာရှိများထံ လွှဲပြောင်းပေးခဲ့သည်။ ၎င်းကို ပြည်နှင်ဒဏ်ပေးမည်ဖြစ်ပြီး တရုတ်အေဂျင်စီများနှင့် ပေါင်းစပ်ညှိနှိုင်း၍ ဝရမ်းအတိုင်း အရေးယူနိုင်ရေး လွှဲပြောင်းပေးအပ်သွားမည်ဟု ရဲတပ်ဖွဲ့က ပြောကြားခဲ့သည်။
လူဝင်မှုကြီးကြပ်ရေးဗျူရို အာဏာပိုင်များက နိုင်ငံဖြတ်ကျော် ရာဇဝတ်ဂိုဏ်းများ၊ တရားမဝင် ဝင်ရောက်နေထိုင်သူများ၊ အထူးသဖြင့် ဘဏ်အကောင့်တုများဖြင့် ငွေကြေးခဝါချသည့် ကွန်ရက်များကို ပိုမိုဖိဖိစီးစီး နှိမ်နင်းကြရန် အဖွဲ့အားလုံးကို ညွှန်ကြားထားသည်။ ထိုင်းနိုင်ငံသည် တရားပြေးများ ပုန်းအောင်းရာနေရာ မဖြစ်စေရန်အတွက် နိုင်ငံအတွင်း ဝင်ရောက်လာသည့် နိုင်ငံခြားသားများကို ဆက်လက်စိစစ်သွားမည်ဖြစ်ပြီး ဥပဒေချိုးဖောက်သူများကို အရေးယူဆောင်ရွက်သွားမည်ဟု ဗျူရိုက ထုတ်ပြန်ထားသည်။
Ref: The Thaiger
About the Author
