သက်တံ့
၁၃. ၁၀. ၂၀၂၆
ကလေးငယ်များကို ထိုင်းနိုင်ငံအတွင်းသို့ ခေါ်ဆောင်ကာ ပန်းရောင်းခိုင်းနေကြောင်း တိုင်ကြားချက်များကို စုံစမ်းစစ်ဆေးပြီးနောက် ဘန်ကောက်ရှိ နေအိမ်တစ်လုံးမှ မြန်မာလူငယ် ၇ ဦးအား ကယ်တင်ခဲ့ပြီး သံသယရှိသူ ၄ ဦးကို ဖမ်းဆီးခဲ့သည်ဟု ထိုင်းပြည်ထဲရေးဝန်ကြီးဌာန ပြည်နယ်အုပ်ချုပ်ရေးဦးစီးဌာန (DOPA) မှ သိရသည်။
DOPA ဒုတိယညွှန်ကြားရေးမှူးချုပ်သည် DOPA S.W.A.T. အထူးစစ်ဆင်ရေးတပ်ဖွဲ့ကို ဦးဆောင်၍ ဖမ်းဝရမ်းများဖြင့် စဖန်းဆွန်း (Saphan Sung) မြို့နယ်၊ ရမ်းခမ်းဟဲင် လမ်းသွယ် ၁၂၂ (Soi Ramkhamhaeng 122) ရှိ နေအိမ်သို့ ဝင်ရောက်စီးနင်းခဲ့သည်။ အဆိုပါ စစ်ဆင်ရေးကို “Protecting Rosebuds” (နှင်းဆီငုံများအား ကာကွယ်စောင့်ရှောက်ခြင်း) ဟု အမည်ပေးခဲ့သည်။
သံသယရှိသူများသည် မြန်မာနိုင်ငံမှ ကလေးငယ်များကို ခေါ်ဆောင်လာပြီး ဘန်ကောက်နှင့် အနီးဝန်းကျင် ခရိုင်များရှိ ခရီးသွားများပြားရာ နေရာများတွင် ပန်း၊ အစားအသောက်နှင့် အဖျော်ယမကာများ ရောင်းချခိုင်းနေကြောင်း ပြည်သူများထံမှ တိုင်ကြားချက်များကို DOPA က လက်ခံရရှိခဲ့သည်။
လူမှုကူညီစောင့်ရှောက်ရေး စေတနာ့ဝန်ထမ်းအဖွဲ့ဖြစ်သော “Thai Mai Thon” အဖွဲ့သည် ရမ်းခမ်းဟဲင် လမ်းသွယ် ၁၂၂ နေအိမ်မှ ထွက်ပြေးလွတ်မြောက်လာသည့် မြန်မာနိုင်ငံသားတစ်ဦးထံမှ တိုင်ကြားချက် ရရှိခဲ့သည်။ ကျား/မခွဲခြားဖော်ပြထားခြင်းမရှိသေးသော တိုင်ကြားသူက သံသယရှိသူများ၏ အတင်းအဓမ္မ စေခိုင်းမှုကြောင့် ညဘက်ဖျော်ဖြေရေးနေရာများတွင် ပန်းရောင်းခဲ့ရသည့်အပြင် မုဒိမ်းကျင့်ခြင်းနှင့် ရိုက်နှက်နှိပ်စက်ခြင်းတို့ ခံခဲ့ရကြောင်း ကနဦးထွက်ဆိုခဲ့သည်။ ထို့နောက် အဆိုပါ အဖွဲ့မှ စေတနာ့ဝန်ထမ်းများသည် DOPA အထူးစစ်ဆင်ရေးတပ်ဖွဲ့သို့ ဆက်သွယ်အကြောင်းကြားခဲ့ခြင်း ဖြစ်သည်။
◾️ နံနက် ၄ နာရီအထိ ပန်းရောင်းခိုင်းခဲ့ကြောင်း စုံစမ်းစစ်ဆေးသူများ တွေ့ရှိ
စုံစမ်းစစ်ဆေးသူများ၏ ပြောကြားချက်အရ ကလေးငယ်များသည် ခေါက်ဆန်လမ်း (Khao San Road) နှင့် နွမ်ချန်လမ်း (Nuan Chan Road) တို့တွင် ညနေစောင်းမှ နောက်တစ်နေ့ နံနက် ၄ နာရီခန့်အထိ အသည်းအသန် ပန်းရောင်းခဲ့ရသော်လည်း တစ်စည်းလျှင် ၁၀ ဘတ်စီသာ ရရှိခဲ့ကြကြောင်း သိရသည်။
သံသယရှိသူများသည် မြန်မာကလေးငယ်များကို တက်ခ်ပြည်နယ် (Tak Province)၊ မဲဆောက်မြို့နယ်ရှိ တရားမဝင် နယ်စပ်ဂိတ်များမှတစ်ဆင့် ခေါ်ဆောင်လာပြီးမှ ဘန်ကောက်သို့ ခေါ်ဆောင်သွားခဲ့ခြင်းဖြစ်ကြောင်း စုံစမ်းစစ်ဆေးသူများက ဆိုသည်။ သံသယရှိသူများသည် ရမ်းခမ်းဟဲင် လမ်းသွယ် ၁၂၂ ရှိ နေအိမ်ကို ငှားရမ်းထားသည်မှာ ၂ လကျော်ပြီဖြစ်သည်။
ဖမ်းဆီးရမိသူ ၄ ဦးအနက် ၂ ဦးမှာ အိုရာနုချ် ပီဝီ (Oranuch Piwi) ဆိုသူနှင့် အူးခရစ် (Ukrit) အမည်ရှိ အမျိုးသားတစ်ဦးတို့ဖြစ်ကြောင်း အာဏာပိုင်များက အတည်ပြုခဲ့သည်။ စုံစမ်းစစ်ဆေးသူများ၏ အဆိုအရ အိုရာနုချ်သည် ပန်းရောင်ကတ် (ရွှေ့ပြောင်းလုပ်သား ကတ်) ကို ကိုင်ဆောင်ထားပြီး အူးခရစ်မှာမူ သုည (0) ဖြင့်စသော အမှတ်စဉ်ပါသည့် ရွှေ့ပြောင်းနေထိုင်သူအသိအမှတ်ပြုကတ်ကို ကိုင်ဆောင်ထားသူ ဖြစ်သည်။
◾️ ကယ်ဆယ်ခဲ့သည့် မြန်မာကလေးငယ် ၇ ဦးအား လူကုန်ကူးခံရသူ ဟုတ်မဟုတ် စိစစ်စစ်ဆေး
ရမ်းခမ်းဟဲင် လမ်းသွယ် ၁၂၂ နေအိမ်မှ ကယ်ဆယ်လိုက်သည့် မြန်မာကလေးငယ် ၇ ဦးအား ဘန်းချန်း (Bang Chan) ရဲစခန်းသို့ ပို့ဆောင်ကာ လူမှုဖွံ့ဖြိုးတိုးတက်ရေးနှင့် လူသားလုံခြုံရေး ဝန်ကြီးဌာနမှ တာဝန်ရှိသူများနှင့် စိတ်ပညာရှင်များ အပါအဝင် ဌာနပေါင်းစုံပါဝင်သော အဖွဲ့တစ်ဖွဲ့က စိစစ်စစ်ဆေးမှုများ ပြုလုပ်ခဲ့သည်။
တာဝန်ရှိသူများသည် စိစစ်စစ်ဆေးမှုများ ပြီးစီးပါက အဆိုပါ လူငယ်များကို နွန်သဘူရီ (Nonthaburi) ရှိ Kredtrakarn စောင့်ရှောက်ရေးနှင့် သက်မွေးဝမ်းကျောင်း ဖွံ့ဖြိုးတိုးတက်ရေး စခန်းသို့ ပို့ဆောင်ရန် စီစဉ်ခဲ့ကြသည်။
သံသယရှိသူများ၏ သတင်းအချက်အလက်အရ ရမ်းခမ်းဟဲင်ရှိ ဒုတိယမြောက် နေအိမ်ကိုပါ ဝင်ရောက်စစ်ဆေး
သံသယရှိသူများ၏ ထွက်ဆိုချက်အရ နောက်ထပ် ငှားရမ်းထားသည့် အိမ်တစ်လုံးရှိကြောင်း ပေါ်ပေါက်ခဲ့သဖြင့် ရဲအရာရှိများသည် ရမ်းခမ်းဟဲင် လမ်းသွယ် ၁၂၀ ရှိ ဆွေမျိုးတစ်ဦး၏ နေအိမ်သို့ စစ်ဆင်ရေး တိုးချဲ့ဆောင်ရွက်ခဲ့သည်။
မိမိကိုယ်ကိုယ် ရမ်းခမ်းဟဲင် လမ်းသွယ် ၁၂၀ နေအိမ်ပိုင်ရှင်ဟု မိတ်ဆက်သည့် အမျိုးသမီးတစ်ဦးက ထိုအိမ်တွင် လူငယ် ၅ ဦး နေထိုင်ပြီး တာခ်ခရိုင်၊ မဲဆောက်မြို့နယ်မှ လာရောက်ကြသူများဖြစ်ကြောင်း ပြောကြားခဲ့သည်။ ထိုအမျိုးသမီးက အချို့သော ကလေးများသည် ကျောင်းဆင်းချိန် ညနေပိုင်းတွင် လိမ္မော်ရည် ရောင်းချကြကြောင်း ဝန်ခံခဲ့သော်လည်း အခြားနေရာများတွင် ပန်းရောင်းရန် ခေါ်ဆောင်သွားခြင်း မရှိပါဟု ငြင်းဆိုခဲ့သည်။
တာဝန်ရှိသူများသည် ရမ်းခမ်းဟဲင် လမ်းသွယ် ၁၂၀ ရှိ အဆိုပါ အိမ်အား ဝင်ရောက်ရှာဖွေရန် ပူးပေါင်းဆောင်ရွက်ပေးပါရန် တောင်းဆိုခဲ့ပြီး အတွင်း၌ လူငယ်များကို တွေ့ရှိခဲ့သည်။ ၎င်းတို့ ထိုင်းနိုင်ငံအတွင်းသို့ ဝင်ရောက်လာသည့် အထောက်အထား စာရွက်စာတမ်းများကို ဆက်လက် စစ်ဆေးလျက်ရှိသည်ဟု သိရသည်။
Ref: Nation Thailand
About the Author
