ချန်ပီယံဟောင်း ပန်တိုဂျာကို ရင်ဆိုင်ကာကွယ်ရန် Flyweight ချန်ပီယံ Joshua Van က ပေါင် ၂၀ ကျော် ဝိတ်တင် ထိုးသတ်ခဲ့

သက်တံ့
၂၂. ၉. ၂၀၂၆

ကယ်လီဖိုးနီးယားပြည်နယ် အားကစားကော်မရှင် (CSAC) သည် ကစားသမားများ၏ ထိုးသတ်သည့်ည (Fight Night) ဝိတ်နှင့် ဆုကြေးငွေများကို ပုံမှန်ထုတ်ပြန်ပေးလေ့ရှိသည့် အဓိကကော်မရှင်အနည်းငယ်ထဲမှ တစ်ခုဖြစ်သည်။

လွန်ကဲစွာ ဝိတ်ချခြင်းကို တားဆီးရန် ကော်မရှင်၏ ကြိုးပမ်းမှုတစ်စိတ်တစ်ပိုင်းအဖြစ် ပြိုင်ပွဲထိုးသတ်သည့်နေ့တွင် ကစားသမားများ၏ ကိုယ်အလေးချိန်ကို နောက်တစ်ကြိမ် ပြန်လည်တိုင်းတာပြီး ထိုကိန်းဂဏန်းများကို အများပြည်သူသို့ ထုတ်ပြန်ပေးသည်။ UFC 331 ပြိုင်ပွဲ ပြီးဆုံးသွားချိန်တွင် CSAC သည် စက်တင်ဘာ ၁၉ ရက်၊ စနေနေ့က ကယ်လီဖိုးနီးယားပြည်နယ်၊ လော့စ်အိန်ဂျယ်လိစ်မြို့ရှိ Crypto.com Arena ကွင်းအတွင်း တိုင်းတာခဲ့သော ကစားသမားများ၏ Fight Night ကိုယ်အလေးချိန်များကို ထုတ်ပြန်ခဲ့သည်။

ထိုထုတ်ပြန်ချက်တွင် စိတ်ဝင်စားဖွယ်ရာ အချက်အလက်များစွာ ပါဝင်ခဲ့သည်။

Ultimate Fighting Championship (UFC) ၏ Flyweight ချန်ပီယံ ဂျော်ရှဝါဗန်သည် ပြိုင်ဘက် ပန်တိုဂျာထက် ခန္ဓာကိုယ် ပိုသေးပုံရသော်လည်း သောကြာနေ့ (စက်တင်ဘာ ၁၈ ရက်)နံနက်ပိုင်း တရားဝင်ဝိတ်ချိန်စဉ်က ၁၂၅ ပေါင်အတိသာရှိခဲ့ရာမှ ပြိုင်ပွဲကျင်းပချိန်တွင် ၂၀ ဒသမ ၈ ပေါင် တိုးလာခဲ့သည်။ “The Fearless” ဟု အမည်ရသည့် ဗန်သည် Octagon လှောင်အိမ်အတွင်းသို့ ၁၄၅ ဒသမ ၈ ပေါင်ဖြင့် ဝင်ရောက်ထိုးသတ်ခဲ့သဖြင့် သူသည် ၁၂၅ ပေါင်တန်း ခါးပတ်ကို ကာကွယ်ချိန်တွင် နည်းပညာအရ Featherweight ဝိတ်တန်းသို့ ရောက်ရှိနေခဲ့သည်။

တစ်ချိန်တည်းမှာပင် ဗန့်ကို အရေးနိမ့်သူ ချန်ပီယံဟောင်း အလက်ဇန္ဒား ပန်တိုဂျာသည် ၁၂၅ ပေါင်မှ ၁၄၀ ဒသမ ၂ ပေါင်သို့ ၁၅ ဒသမ ၂ ပေါင် တိုးလာခဲ့သည်။ ထို့ကြောင့် ပြိုင်ပွဲကျင်းပသည့်ညတွင် ဗန်သည် ချန်ပီယံဟောင်းထက် ၅ ဒသမ ၆ ပေါင် ပိုမိုအသာစီးရရှိခဲ့သည်။

ဝိတ်အတိုးဆုံး ကစားသမားမှာ Middleweight ဝိတ်တန်းမှ Ozzy Diaz ဖြစ်ပြီး ၁၈၆ ပေါင်မှ ၂၁၂ ဒသမ ၄ ပေါင် အထိ ၂၆ ဒသမ ၄ ပေါင်တိုင်အောင် သိသိသာသာ တိုးလာခဲ့သည်။

သို့သော်လည်း အံ့ဩစရာအကောင်းဆုံး ပြောင်းလဲမှုမှာ UFC 331 ပွဲစတင်ချိန်တွင် Giga Chikadze ကို အလဲထိုးခဲ့သည့် Featherweight လက်သီးပြင်းသူ Joanderson Brito ထံမှ လာခဲ့ခြင်းဖြစ်သည်။

အမှန်တကယ်ပင် အဆိုပါ ဘရာဇီးကစားသမားသည် သောကြာနေ့က ၁၄၅ ဒသမ ၅ ပေါင်သာ ရှိခဲ့သော်လည်း ထိုးသတ်ချိန်တွင် အံ့အားသင့်ဖွယ် ၂၅ ဒသမ ၉ ပေါင် တိုးလာကာ ၁၇၁ ဒသမ ၄ ပေါင်ဖြင့် Octagon အတွင်းသို့ ဝင်ရောက်ခဲ့သဖြင့် Welterweight ဝိတ်တန်းထဲသို့ တိုက်ရိုက်ရောက်ရှိသွားခဲ့သည်။ Chikadze မှာမူ ၂၁ ပေါင် တိုးလာပြီး ၁၆၇ ပေါင် ရှိခဲ့သဖြင့် Brito က ၄ ဒသမ ၄ ပေါင် ပိုမိုအသာစီး ရရှိခဲ့သည်။

“UFC 331 ပြိုင်ပွဲဝင်များ၏ ထိုးသတ်သည့်ည ကိုယ်အလေးချိန် စာရင်းအပြည့်အစုံ”

Joshua Van – ၁၂၅ ပေါင်မှ ၁၄၅.၈ ပေါင် (+၂၀.၈ ပေါင်၊ ၁၇ ရာခိုင်နှုန်း)

Alexandre Pantoja – ၁၂၅ ပေါင်မှ ၁၄၀.၂ ပေါင် (+၁၅.၂ ပေါင်၊ ၁၂ ရာခိုင်နှုန်း)

Arman Tsarukyan – ၁၅၆ ပေါင်မှ ၁၇၇ ပေါင် (+၂၁ ပေါင်၊ ၁၃ ရာခိုင်နှုန်း)

Mauricio Ruffy – ၁၅၅ ပေါင်မှ ၁၇၈ ပေါင် (+၂၃ ပေါင်၊ ၁၅ ရာခိုင်နှုန်း)

Patricio “Pitbull” Freire – ၁၄၅.၅ ပေါင်မှ ၁၆၁.၈ ပေါင် (+၁၆.၃ ပေါင်၊ ၁၁ ရာခိုင်နှုန်း)

Doo Ho Choi – ၁၄၆ ပေါင်မှ ၁၆၅ ပေါင် (+၁၉ ပေါင်၊ ၁၃ ရာခိုင်နှုန်း)

Gable Steveson – ၂၄၀ ပေါင်မှ ၂၄၁.၂ ပေါင် (+၁.၂ ပေါင်၊ ၀ ရာခိုင်နှုန်း)

Sean Sharaf – ၂၄၁ ပေါင်မှ ၂၄၂.၆ ပေါင် (+၁.၆ ပေါင်၊ ၁ ရာခိုင်နှုန်း)

Alonzo Menifield – ၂၀၅.၅ ပေါင်မှ ၂၂၀.၈ ပေါင် (+၁၅.၃ ပေါင်၊ ၇ ရာခိုင်နှုန်း)

Iwo Baraniewski – ၂၀၆ ပေါင်မှ ၂၂၈ ပေါင် (+၂၂ ပေါင်၊ ၁၁ ရာခိုင်နှုန်း)

Marlon Vera – ၁၃၆ ပေါင်မှ ၁၅၅.၄ ပေါင် (+၁၉.၄ ပေါင်၊ ၁၄ ရာခိုင်နှုန်း)