၈.၉.၂၀၂၆
Translated by Htwe Ko Tun
အမေရိကန်ပြည်ထောင်စု၊ ဖလော်ရီဒါပြည်နယ်၊ Space Coast ဒေသဆိုင်ရာလေဆိပ်မှ စက်တင်ဘာလ ၇ ရက်တွင် ပျံတက်လာသော လေယာဉ်ငယ်တစ်စီးမှာ လေဆိပ်မှ ထွက်ခွာပြီး မကြာမီ မီးလောင်မှုဖြစ်ပွားရာ လေယာဉ်မှူး သေဆုံးသွားခဲ့ကြောင်း တီတူးစ်ဗီလီမြို့အရာရှိများက ပြောကြားခဲ့သည်။
လေဆိပ်အနီးရှိ Sisson လမ်းနှင့် South Washington Avenue လမ်းအကြားရှိ Columbia Boulevard လမ်းပေါ်တွင် လေယာဉ်ပျက်ကျမှုဖြစ်ပွားပြီးနောက် အရေးပေါ်အဖွဲ့များသည် နံနက် ၁၀ နာရီ ၁၆ မိနစ်တွင် တုံ့ပြန်ဆောင်ရွက်ခဲ့ကြသည်။ အမျိုးသားသယ်ယူပို့ဆောင်ရေး ဘေးကင်းရေးဘုတ်အဖွဲ့မှ ကနဦး သတင်းအချက်အလက်များအရ လေယာဉ်မှူးသည် အင်ဂျင်ပြဿနာများကို သတင်းပို့ပြီးနောက် လေဆိပ်သို့ပြန်လည်ဆင်းသက်ရန် ကြိုးစားနေစဉ် လေယာဉ်က ဓာတ်အားလိုင်းနှင့် သစ်ပင်များကို ဝင်တိုက်မိပြီးနောက် ပျက်ကျခဲ့ကြောင်း သိရသည်။
လေယာဉ်ပေါ်တွင် တစ်ဦးတည်းပါရှိသူ လေယာဉ်မှူးမှာ အခင်းဖြစ်ပွားရာနေရာတွင် သေဆုံးသွားခဲ့သည်။
မတော်တဆမှုက စွဲမက်ဖွယ်သစ်တောအုပ် ဧရိယာတွင်” ဖြစ်ပွားခဲ့ကြောင်း တီတူးစ်ဗီလီမြို့ မီးသတ်ဦးစီးချုပ် ဂျွန်ဟတ်စတိုးလ်က လေယာဉ်ပျက်ကျပြီး ငါးနာရီအကြာတွင် သတင်းစာရှင်းလင်းပွဲတစ်ခု၌ ပြောကြားခဲ့သည်။ မီးသတ်အဖွဲ့များ ရောက်ရှိပြီး ကိုးမိနစ်အတွင်း မီးငြှိမ်းသတ်နိုင်ခဲ့ကြောင်း ၎င်းက ပြောကြားခဲ့သည်။
လေယာဉ်ပျက်ကျမှုကို စုံစမ်းစစ်ဆေးမည့် ဖက်ဒရယ်အေဂျင်စီ NTSB က လေယာဉ်သည် ထိုင်ခုံလေးလုံးပါ Mooney M20F လေယာဉ်ဖြစ်ကြောင်း အတည်ပြုခဲ့သည်။
လေယာဉ်ပျက်ကျမှုဖြစ်ပွားရာနေရာသို့ မီးသတ်တပ်ဖွဲ့များစွာ ရောက်ရှိနေပြီး အနီးအနားရှိ ဧရိယာတွင် လျှပ်စစ်ဓာတ်အား ပြတ်တောက်မှုများနှင့် Columbia Boulevard တစ်လျှောက် နှစ်ဖက်စလုံးတွင် ယာဉ်ကြောပိတ်ဆို့မှုများ ဖြစ်ပေါ်ခဲ့သည်။
Ref-Florida Today
About the Author
