သက်တံ့
၃. ၆. ၂၀၂၆
အိန္ဒိယနိုင်ငံ၊ ဒေလီမြို့၊ မာလ်ဗီယာနဂါး (Malviya Nagar) ဒေသရှိ ဟိုတယ်တစ်ခုတွင် ယနေ့ ဗုဒ္ဓဟူးနေ့ (ဇွန်လ ၃ ရက်) နံနက်ပိုင်းက မီးလောင်မှုဖြစ်ပွားခဲ့ရာ အနည်းဆုံး လူ ၂၁ ဦး သေဆုံးခဲ့ပြီး၊ အခြားလူ ၄၀ ကျော်ကို ကယ်ဆယ်နိုင်ခဲ့ကြောင်းနှင့် သေဆုံးသူအများစုမှာ နိုင်ငံခြားသားများဖြစ်ကြောင်း သိရသည်။
မီးလောင်မှုဖြစ်ပွားကြောင်း သတင်းပေးပို့ချက်ရရှိပြီးနောက် နံနက် ၈ နာရီ မိနစ် ၅၀ ဝန်းကျင်တွင် လီမွန်ဂရင်း စားသောက်ဆိုင် (Lemon Green Restaurant) သို့ မီးသတ်ကား အများအပြား ချက်ချင်းစေလွှတ်ခဲ့ရသည်။ မာလ်ဗီယာနဂါးဒေသရှိ Flourish Stay B&B ဟု သိရှိရသော လီမွန်ဂရင်း စားသောက်ဆိုင်တည်ရှိရာ အဆိုပါဟိုတယ်အဆောက်အအုံသည် ရဲတပ်ဖွဲ့၊ မီးသတ်တပ်ဖွဲ့နှင့် အခြားအေဂျင်စီများ ပါဝင်သည့် အရေးပေါ်တုံ့ပြန်မှု အကြီးအကျယ် လုပ်ဆောင်ရသည့် နေရာတစ်ခု ဖြစ်လာခဲ့သည်။
ဒေလီရဲတပ်ဖွဲ့ (တောင်ပိုင်း) ၏ ဒုတိယရဲမင်းကြီး (DCP) မစ္စတာ အာနန့် မစ်တယ်လ် (Anant Mittal) က မီးလောင်မှုနှင့်ပတ်သက်သည့် သတင်းကို ယနေ့ နံနက် ၈ နာရီ ၄၈ မိနစ်တွင် အရေးပေါ်ထိန်းချုပ်ရေးအခန်းက လက်ခံရရှိခဲ့ကြောင်း ပြောကြားသည်။
“ဒေသခံရဲတပ်ဖွဲ့ဝင်တွေဟာ အခင်းဖြစ်ပွားရာနေရာကို ချက်ချင်းရောက်ရှိသွားပြီး ကယ်ဆယ်ရေး၊ ရွှေ့ပြောင်းရေးနဲ့ ကူညီကယ်ဆယ်ရေးလုပ်ငန်းတွေကို စတင်ဆောင်ရွက်ခဲ့ကြပါတယ်” ဟု ၎င်းက ဆိုသည်။
ဖြစ်စဉ်အတွင်း မီးသတ်ကား ရှစ်စီးကို တာဝန်ချထားခဲ့ပြီး မီးကို အောင်မြင်စွာ ငြှိမ်းသတ်နိုင်ခဲ့သည်။ ရဲတပ်ဖွဲ့၊ မီးသတ်တပ်ဖွဲ့နှင့် အခြားအရေးပေါ်တုံ့ပြန်ရေးအဖွဲ့များ၏ ပူးပေါင်းဆောင်ရွက်မှုကြောင့် လူ ၄၀ ကျော်ကို ကယ်ဆယ်နိုင်ခဲ့ပြီး ဆေးဝါးကုသမှုခံယူနိုင်ရန် အနီးရှိဆေးရုံများသို့ ပို့ဆောင်ပေးခဲ့သည်။
သို့သော် ဒုတိယရဲမင်းကြီး မစ္စတာ မစ်တယ်လ်က လူ ၂၁ ဦး သေဆုံးကြောင်း ကြေညာရသည့်အတွက် “အထူးပင် ဝမ်းနည်းကြေကွဲရပါကြောင်း” အတည်ပြုပြောကြားခဲ့သည်။
“ကယ်ဆယ်ရေးနဲ့ ရှာဖွေရေးလုပ်ငန်းတွေကို အခုထိ ဆက်လက်လုပ်ဆောင်နေဆဲဖြစ်ပြီး ထိခိုက်ခံရသူတွေကို ဖြစ်နိုင်ခြေရှိတဲ့ ကူညီပံ့ပိုးမှုမှန်သမျှ သေချာရရှိစေဖို့ သက်ဆိုင်ရာ အေဂျင်စီအားလုံးဟာ အခင်းဖြစ်ပွားရာနေရာမှာ ဆက်လက်တာဝန်ယူထားဆဲဖြစ်ပါတယ်” ဟု ၎င်းက ဖြည့်စွက်ပြောကြားသည်။
အိန္ဒိယဝန်ကြီးချုပ် မစ္စတာ နာရင်ဒရာ မိုဒီက မီးလောင်မှုဖြစ်စဉ်အတွင်း အသက်ဆုံးရှုံးခဲ့ရမှုအပေါ် ဝမ်းနည်းကြောင်း ထုတ်ဖော်ပြောကြားခဲ့ပြီး သေဆုံးသူတစ်ဦးစီ၏ ကျန်ရစ်သူမိသားစုများအတွက် တစ်ဦးလျှင် ရူပီး ၂ သိန်းစီနှင့် ဒဏ်ရာရရှိသူများအတွက် ရူပီး ၅ သောင်းစီ ထောက်ပံ့ပေးမည်ဟု ကြေညာခဲ့သည်။
မီးလောင်မှုဖြစ်စဉ်ဖြစ်ပွားရသည့်အခြေအနေမှာ စုံစမ်းစစ်ဆေးနေဆဲဖြစ်ကြောင်း သိရသည်။
Ref: The Hindu (With inputs from PTI & ANI)
About the Author
