သက်တံ့
၈. ၅. ၂၀၂၆
အိန္ဒိယနိုင်ငံ၊ အရူးနားချားပရာဒေ့ရှ်ပြည်နယ်၊ ချန်လန်း (Changlang) ခရိုင်အတွင်းရှိ အိန္ဒိယ-မြန်မာနယ်စပ်တစ်လျှောက် မေလ ၇ ရက်နေ့က ပြုလုပ်ခဲ့သော ပူးပေါင်းမူးယစ်ဆေးဝါးနှိမ်နင်းရေး စစ်ဆင်ရေးအတွင်း ဘိန်းဟု သံသယရှိဖွယ်ပစ္စည်းများ၊ ငွေသားများနှင့်အတူ မြန်မာနိုင်ငံသားတစ်ဦး ဖမ်းဆီးခံခဲ့ရသည်။
နယ်စပ်ဖြတ်ကျော်မှုများနှင့် မူးယစ်ဆေးဝါးမှောင်ခိုကူးမှုများရှိနေကြောင်း တိကျသော သတင်းပေးချက်အရ နမ်ပွန် (Nampong) ရဲတပ်ဖွဲ့နှင့် အထူးတာဝန်တပ်ဖွဲ့ (STF) တို့က နမ်ပွန်ဒေသတွင် ပူးပေါင်းစစ်ဆင်ရေး ဆောင်ရွက်ခဲ့ခြင်းဖြစ်သည်။
ဖမ်းဆီးရမိသူမှာ အသက် ၄၀ အရွယ် လာဟိုကိုင်တာကိုင်ဆန် (Laho Kaita Kaisan) အမည်ရှိ မြန်မာနိုင်ငံသားတစ်ဦးဖြစ်ပြီး ၎င်းသည် အိန္ဒိယပိုင်နက်အတွင်းသို့ တရားမဝင်ဝင်ရောက်ရန် ကြိုးပမ်းစဉ် လုံခြုံရေးတပ်ဖွဲ့ဝင်များ၏ တားဆီးဖမ်းဆီးခြင်းကို ခံခဲ့ရခြင်းဖြစ်ကြောင်း ရဲတပ်ဖွဲ့က သတ်မှတ်ဖော်ပြခဲ့သည်။
ရှာဖွေစစ်ဆေးမှုအတွင်း ၎င်း၏ထံမှ ဘိန်းဟု သံသယရှိဖွယ် အလေးချိန် ၄၂၀ ဒသမ ၅ ဂရမ်ခန့်နှင့် အိန္ဒိယရူပီး ၁ သိန်း (Rs 1 lakh) ကို သိမ်းဆည်းရမိခဲ့သည်။ သိမ်းဆည်းရမိသော မူးယစ်ဆေးဝါးနှင့် ငွေသားများကို ဥပဒေလုပ်ထုံးလုပ်နည်းအတိုင်း သိမ်းဆည်းထားလိုက်ပြီဖြစ်သည်။
ဒေသတွင်းတွင် နယ်စပ်ဖြတ်ကျော်ဝင်ရောက်မှုနှင့် မူးယစ်ဆေးဝါးမှောင်ခိုကူးမှုများ မြင့်တက်လာခြင်းကြောင့် အိန္ဒိယ-မြန်မာနယ်စပ်တစ်လျှောက် စောင့်ကြည့်စစ်ဆေးမှုများကို တိုးမြှင့်လုပ်ဆောင်ထားကြောင်း တာဝန်ရှိသူများက ပြောကြားခဲ့သည်။ စုံစမ်းစစ်ဆေးသူများက အဆိုပါဖမ်းဆီးရမိသူသည် ပြည်နယ်အချင်းချင်း သို့မဟုတ် နိုင်ငံတကာမူးယစ်ဆေးဝါးကွန်ရက်ကြီးတစ်ခုနှင့် ဆက်နွှယ်မှုရှိနိုင်သည်ဟု သံသယရှိနေကြသည်။
လက်ရှိတွင် ၎င်းအား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာအက်ဥပဒေ (NDPS Act)၊ လူဝင်မှုကြီးကြပ်ရေးအက်ဥပဒေနှင့် နိုင်ငံခြားသားများဆိုင်ရာအက်ဥပဒေတို့အရ အမှုဖွင့်လှစ်ထားပြီး ဆက်လက်စုံစမ်းစစ်ဆေးမှုများ ပြုလုပ်လျက်ရှိကြောင်း သိရသည်။
Ref : India Today
About the Author
