သက်တံ့
၆. ၈. ၂၀၂၆
ထိုင်းနိုင်ငံ၊ ကန်ချနာဘူရီခရိုင်တွင် မြန်မာရွှေ့ပြောင်းလုပ်သား ၄၃ ဦးကို ပြည့်ကျပ်စွာ တင်ဆောင်ထားသည့် ဗန်ကားတစ်စီးကို မနေ့က ဩဂုတ် ၅ ရက်တွင် စစ်ဆေးတွေ့ရှိခဲ့ပြီးနောက် ရဲတပ်ဖွဲ့က လိုက်လံဖမ်းဆီးစဉ် လမ်းလယ်ကျွန်းကို တိုက်မိရပ်တန့်သွားသဖြင့် မြန်မာနိုင်ငံသားများအပြင် ထိုင်းနိုင်ငံသားယာဉ်မောင်းကိုပါ ဖမ်းဆီးအရေးယူခဲ့သည်။
နယ်စပ်ဖြတ်ကျော် မှောင်ခိုဂိုဏ်းတစ်ခုသည် ကန်ချနာဘူရီခရိုင်မှတစ်ဆင့် တရားမဝင် ရွှေ့ပြောင်းလုပ်သားများကို သယ်ဆောင်နေကြောင်း သတင်းရရှိသဖြင့် ရဲတပ်ဖွဲ့နှင့် လုံခြုံရေးအဖွဲ့အစည်းများ ပူးပေါင်း၍ ဩဂုတ် ၅ ရက် နံနက် ၅ နာရီခန့်တွင် စစ်ဆင်ရေးကို စတင်ခဲ့ခြင်းဖြစ်သည်။
အရာရှိများသည် မောင်းခရိုင် (Mueang district) ရှိ ကန်ချနာဘူရီခရိုင်မှ အီရာဝမ်ရေတံခွန် (Erawan Waterfall) သို့ သွားသည့်လမ်းအတိုင်း မောင်းနှင်လာသော အဖြူရောင် ဗန်ကားတစ်စီးကို တွေ့ရှိခဲ့ပြီး ကားရပ်ရန် အချက်ပြခဲ့သည်။ သို့သော် ယာဉ်မောင်းသည် ရပ်တန့်ခြင်းမရှိဘဲ ဘိုဖလွိုင်းခရိုင် (Bo Phloi district) ဘက်သို့ အရှိန်မြှင့် မောင်းနှင်ထွက်ပြေးခဲ့ရာမှ ထိန်းချုပ်မှုလွတ်ကာ လမ်းလယ်ကျွန်းအား တိုက်မိရပ်တန့်သွားခဲ့သည်။
ယာဉ်မောင်းသည် ခြေလျင်ထွက်ပြေးရန် ကြိုးစားခဲ့သော်လည်း ရဲတပ်ဖွဲ့၏ ဖမ်းဆီးခြင်းကို ခံခဲ့ရသည်။ ၎င်းသည် ဘန်ကောက်မြို့မှ အသက် ၃၄ နှစ်အရွယ် ဝိုရာဖန် (Woraphan) ဖြစ်ကြောင်း သိရသည်။
ဗန်ကားကို ရှာဖွေစစ်ဆေးရာတွင် နိုင်ငံကူးလက်မှတ် သို့မဟုတ် ခရီးသွားလာခွင့် စာရွက်စာတမ်း တစ်စုံတစ်ရာ ပြသနိုင်ခြင်းမရှိသည့် မြန်မာနိုင်ငံသား ၄၃ ဦးကို တွေ့ရှိခဲ့သည်။ စကားပြန်မှတစ်ဆင့် စစ်ဆေးမေးမြန်းချက်အရ အဆိုပါ ရွှေ့ပြောင်းလုပ်သားများသည် မြန်မာနိုင်ငံ ဘုရားသုံးဆူဘက်မှ စံခလာဘူရီ (Sangkhla Buri) သို့ မှောင်ခိုတောလမ်းကြောင်းအတိုင်း ထိုင်းနိုင်ငံအတွင်းသို့ ဝင်ရောက်ခဲ့ကြပြီး ထိုမှတစ်ဆင့် ကန်ချနာဘူရီ၏ ထောင်ဖာဖူးမ် (Thong Pha Phum) နှင့် မောင်းခရိုင်များသို့ ဖြတ်သန်းလာခဲ့ကြခြင်းဖြစ်သည်ဟု ရဲတပ်ဖွဲ့ထံ ထွက်ဆိုခဲ့သည်။
၎င်းတို့သည် ထိုင်းနိုင်ငံနှင့် မလေးရှားနိုင်ငံတို့တွင် အလုပ်အကိုင် ရှာဖွေရန် ရည်ရွယ်ထားပြီး ခရီးစဉ်အတွက် တစ်ဦးလျှင် ဘတ် ၉၆,၀၀၀ မှ ၁၀၀,၀၀၀ အထိ ပေးချေခဲ့ရကြောင်းလည်း ဝန်ခံခဲ့သည်။
Thairath သတင်းဌာန၏ ဖော်ပြချက်အရ ဝိုရာဖန်သည် ၎င်းတို့အား စံခလာဘူရီ၊ ပရမ်းဖလဲ ကျေးရွာအုပ်စုရှိ သံပုရာခြံတစ်ခုအတွင်းမှ လာရောက်ကြိုဆောင်ခဲ့ပြီး ဆောင်ခလာခရိုင် (Songkhla)၊ ဟတ်ယိုင်မြို့သို့ ပို့ဆောင်ရန် မောင်းနှင်လာစဉ် ဖမ်းဆီးခံခဲ့ရခြင်းဖြစ်ကြောင်း အဆိုပါအဖွဲ့က ထွက်ဆိုခဲ့သည်ဟု ဆိုသည်။
ယာဉ်မောင်း ဝိုရာဖန်က ၎င်းအား ဖုန်းဖြင့် ဆက်သွယ်လာသည့် စပိုင်းယား (Spire) အမည်ရှိ အမျိုးသားတစ်ဦးက ရွှေ့ပြောင်းလုပ်သားများကို သွားရောက်ခေါ်ဆောင်၍ ဟတ်ယိုင်သို့ ပို့ဆောင်ရန် ငှားရမ်းခဲ့ခြင်းဖြစ်ကြောင်း ရဲတပ်ဖွဲ့အား ထွက်ဆိုခဲ့သည်။ ခရီးစဉ်ပြီးဆုံးပါက တစ်ဦးလျှင် ဘတ် ၂,၅၀၀ နှုန်း ရရှိမည်ဟု ကတိပြုထားကြောင်းလည်း ၎င်းက ဆိုသည်။
ရဲတပ်ဖွဲ့က ဝိုရာဖန်အား တရားမဝင် ရွှေ့ပြောင်းလုပ်သားများ ဖမ်းဆီးခံရခြင်းမှ ကင်းလွတ်စေရန် ယာဉ်စီးနင်းမှုနှင့် ခိုလှုံရာပေးမှုတို့ဖြင့် တရားစွဲဆိုထားသည်။ မြန်မာနိုင်ငံသား ၄၃ ဦးကိုမူ ထိုင်းနိုင်ငံအတွင်းသို့ တရားမဝင် ဝင်ရောက်မှု၊ နေထိုင်မှုတို့ဖြင့် တရားစွဲဆိုထားပြီး ဥပဒေအရ အရေးယူဆောင်ရွက်နိုင်ရန် ဘိုဖလွိုင်းရဲစခန်းမှ စုံစမ်းစစ်ဆေးရေးအရာရှိများထံ လွှဲပြောင်းပေးခဲ့သည်။
အလားတူ သတင်းတစ်ခုတွင် ထိုင်းနိုင်ငံ၌ တရားမဝင် ရွှေ့ပြောင်းလုပ်သားများ လှိုင်းလုံးကြီးများကဲ့သို့ ဝင်ရောက်လာမှုကို အရှိန်အဟုန်မြှင့် နှိမ်နင်းသည့်အနေဖြင့် ရနောင်းမြို့မှ မြန်မာရွှေ့ပြောင်းလုပ်သား ၂၀၀ အား ပြန်လည်ပြည်နှင်ဒဏ်ပေးခဲ့သည်။ အမျိုးသား ၁၉၈ ဦးနှင့် အမျိုးသမီး ၂ ဦး ပါဝင်သည့် အဆိုပါအဖွဲ့သည် ဥပဒေကြောင်းအရ အရေးယူဆောင်ရွက်မှုများ ပြုလုပ်ပြီးနောက် အစိုးရ၏ နေရပ်ပြန်ပို့ရေး အစီအစဉ်တွင် သဘောတူပါဝင်ခဲ့ကြသဖြင့် ပြည်နှင်ဒဏ်ပေးခဲ့ခြင်းဖြစ်သည်။
Ref : Thaiger
About the Author
