၂၁.၅.၂၀၂၆
Written by Linn Eain
မြန်မာ၊ ထိုင်း၊ ဥဇဘတ်ကစ္စတန် သုံးနိုင်ငံမှ အမျိုးသမီးလက်ရွေးစင်အသင်းများ ယှဉ်ပြိုင်မည့် “AYA Bank Tri Nations Women’s Football Invitation Cup – 2026 ” အမျိုးသမီးဘောလုံးပြိုင်ပွဲကို ဇွန် ၃ ရက်မှ ၉ ရက်အထိ ကျင်းပမည်ဖြစ်ကြောင်း မြန်မာနိုင်ငံဘောလုံးအဖွဲ့ချုပ်မှ သိရသည်။
အဆိုပါပြိုင်ပွဲသည် မြန်မာ့လက်ရွေးစင် အမျိုးသမီးဘောလုံးအသင်း၏ ၂၀၂၆ ခုနှစ်အတွင်း ပထမဆုံး နိုင်ငံတကာပွဲဖြစ်ပြီး နည်းပြချုပ်အသစ် ဂျပန်လူမျိုးနည်းပြ မစ္စတာ မစ်ဆူအိုကာတို (Mr. Mitsuo Katoh) ၏ ပွဲဦးထွက်ပြိုင်ပွဲလည်းဖြစ်သည်။
ထိုင်း၊ ဥဇဘတ်ကစ္စတန်တို့နှင့် ကစားမည့် ပွဲစဉ်များအပါအဝင် နိုင်ငံတကာပြိုင်ပွဲများအတွက် ပြင်ဆင်မှုတစ်ရပ်အနေဖြင့် မြန်မာ့လက်ရွေးစင် အမျိုးသမီးဘောလုံးအသင်း၏ နည်းပြချုပ်အသစ်အဖြစ် ဂျပန်လူမျိုးနည်းပြ မစ္စတာ မစ်ဆူအိုကာတို ကို (၂) နှစ်သက်တမ်းရှိ စာချုပ်ဖြင့် မြန်မာနိုင်ငံဘောလုံးအဖွဲ့ချုပ်က မေ ၁၈ ရက်တွင် တရားဝင်ခန့်အပ်ခဲ့ကြောင်း သိရသည်။
“AYA Bank Tri Nations Women’s Football Invitation Cup – 2026 ” ၏ ပွဲဦးထွက် ပွဲစဉ်အနေဖြင့် မြန်မာနှင့် ဥဇဘတ်ကစ္စတန်က ဇွန် ၃ ရက်၊ ညနေ ၄ နာရီတွင်လည်းကောင်း၊ ဒုတိယပွဲစဉ်အဖြစ် ထိုင်းနှင့် ဥဇဘတ်ကစ္စတန်က ဇွန် ၆ ရက်၊ ညနေ ၄ နာရီတွင်လည်းကောင်း၊ တတိယပွဲစဉ်အဖြစ် မြန်မာနှင့် ထိုင်းက ဇွန် ၉ ရက်၊ ညနေ ၄ နာရီတွင်လည်းကောင်း ရန်ကုန်မြို့၊ သု၀ဏ္ဏကွင်းတွင် အသီးသီးယှဉ်ပြိုင်ကစားကြမည်ဖြစ်ကြောင်း သိရသည်။
ကြိုတင်လက်မှတ်များ မကြာမီရောင်းချပေးမည်ဖြစ်ပြီး ရုပ်သံမှသာ ကြည့်ရှုနိုင်မည့် ပရိသတ်များအတွက် အခမဲ့ရုပ်သံလိုင်းနှင့် YouTube Channel အား အချိန်မီထုတ်ပြန်မည်ဖြစ်ကြောင်း မြန်မာနိုင်ငံဘောလုံးအဖွဲ့ချုပ်က ကြေညာထားသည်။
မြန်မာ့လက်ရွေးစင် အမျိုးသမီးဘောလုံးအသင်းနှင့် လာရောက်ပူးပေါင်းထားသည့် မေထက်လူအပါအဝင် ကစားသမားများသည် သုဝဏ္ဏလူငယ်လေ့ကျင့်ရေးကွင်း ၅ ၌ လေ့ကျင့်ပြင်ဆင်လျက်ရှိပြီး မြန်မာနိုင်ငံဘောလုံးအဖွဲ့ချုပ် ဥက္ကဋ္ဌ ဦးဇော်ဇော်ကိုယ်တိုင် မေ ၂၀ ရက် ညနေပိုင်းက သွားရောက် ကြည့်ရှုအားပေးခဲ့ကြောင်း သိရသည်။
လက်ရှိ FIFA Women’s Ranking အရ ထိုင်းအသင်းက အဆင့် ၅၀၊ ဥဇဘတ်ကစ္စတန်အသင်းက အဆင့် ၅၃၊ မြန်မာအသင်းက အဆင့် ၅၅ တွင် ရပ်တည်လျက်ရှိကြောင်း သိရသည်။
About the Author
