ဧရာဝတီမြစ်ဆုံ – မြစ်ညာမြစ်ဝှမ်း ရေအားလျှပ်စစ်စီမံကိန်းဆိုင်ရာ အထောက်အကူပြုရေးနှင့်ပူးပေါင်းဆောင်ရွက်ရေး ကချင်ပြည်နယ်ဒေသခံကော်မတီအဖွဲ့ဝင်များနှင့် ပြည်သူလူထုများ ၁၄ ကြိမ်မြောက်တွေ့ဆုံရှင်းလင်းပွဲပြုလုပ်

၂၆.၄.၂၀၂၆
Written by Linn Eain

ကချင်ပြည်နယ်အတွင်း ဧရာဝတီမြစ်ဆုံ-မြစ်ညာ မြစ်ဝှမ်းရေအားလျှပ်စစ်စီမံကိန်းဆိုင်ရာ အထောက်အကူပြုရေးနှင့် ပူးပေါင်းဆောင်ရွက်‌ရေး ကချင်ပြည်နယ်ဒေသခံကော်မတီအဖွဲ့ဝင်များအနေဖြင့် ၁၄ ကြိမ်မြောက် ဒေသခံပြည်သူများအား တွေ့ဆုံ ရှင်းလင်းဆွေးနွေးပွဲကို ဧပြီ ၂၅ ရက်၊ နေ့လယ် ၂ နာရီက မြစ်ကြီးနားမြို့၊ ပြည်သူ့အားကစားကွင်းအတွင်းရှိ မိုးလုံလေလုံအားကစားခန်းမ၌ ပြုလုပ်ခဲ့ကြောင်း သိရသည်။

အဆိုပါ တွေ့ဆုံရှင်းလင်းဆွေးနွေးပွဲသို့ ကချင်ပြည်နယ်ဝန်ကြီးချုပ် ဦးခက်ထိန်နန်၊ ပြည်နယ်တရားလွှတ်တော် တရားသူကြီးချုပ်၊ ပြည်နယ်ဝန်ကြီးများ၊ ပြည်နယ်အဆင့်ဌာနဆိုင်ရာများ၊ ကချင်ပြည်နယ် ဒေသခံကော်မတီအဖွဲ့ဝင်များနှင့် Working Group အဖွဲ့ဝင်များ၊ ခရိုင်/မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီများ၊ ဘာသာရေးအဖွဲ့အစည်းများမှ ကိုယ်စားလှယ်များ၊ သူနာပြုနှင့် ပညာရေးဒီဂရီကောလိပ်ကျောင်းများမှ သင်တန်းသားသင်တန်းသူများ စုစုပေါင်း ၇၆၀ ကျော် တက်ရောက်ခဲ့ကြောင်း သိရသည်။

ကချင်ပြည်နယ်ဝန်ကြီးချုပ် ဦးခက်ထိန်နန်က ယနေ့တွေ့ဆုံပွဲသည် မိမိတို့ဒေသတွင်း လျှပ်စစ်မီးလိုအပ်ချက်နှင့် ဒေသဖွံ့ဖြိုးရေးအတွက်အရေးပါသည့် တွေ့ဆုံမှုဖြစ်ပြီး တွေ့ဆုံပွဲများမှတစ်ဆင့် လူထု သိလိုသည်များကို အလေးအနက်ထားမှတ်သား၍ တင်ပြဆောင်ရွက်လျက်ရှိကြောင်း အဆိုပါတွေ့ဆုံပွဲတွင် ပြောကြားခဲ့သည်။

ထို့ပြင် နောင်လာမည့် မျိုးဆက်သစ်များလက်ထက်တွင် ပိုမိုကောင်းမွန်သည့် အခွင့်အလမ်းများရရှိနိုင်မည့် စီမံကိန်းဖြစ်သည့်အတွက် မိမိတို့အားလုံးက ညီညီညွတ်ညွတ်ဖြင့် ပူးပေါင်းပါဝင်ဆောင်ရွက်ကြရန် လိုအပ်ကြောင်းလည်း ကချင်ပြည်နယ်ဝန်ကြီးချုပ်က ဆက်လက်ပြောကြားခဲ့သည်။

ထို့နောက် ဧရာဝတီမြစ်ဆုံ – မြစ်ညာမြစ်ဝှမ်း ရေအားလျှပ်စစ်စီမံကိန်းဆိုင်ရာ အထောက်အကူပြုရေးနှင့် ပူးပေါင်းဆောင်ရွက်ရေး ကချင်ပြည်နယ် ဒေသခံကော်မတီအဖွဲ့ဝင်များဖြစ်ကြသည့် ပြည်နယ်သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဒေါက်တာအောင်ဝင်း၊ ဦးတူးရိန်၊ ဦးမုန်ရိန်လ၊ ဦးနော်ထွဲနှင့် ဦးဂျန်ခုန့်(ခ)ဦးနော်ခုန့်တို့က မြစ်ဆုံစီမံကိန်းနှင့်စပ်လျဉ်း၍ ပြည်သူလူထု သိသင့်သိထိုက် သည့်အချက်များ၊ နည်းပညာဆိုင်ရာ အချက်အလက်များ၊ ကမ္ဘာပေါ်ရှိ ရေအားလျှပ်စစ်အသုံးပြုသည့် နိုင်ငံများနှင့်ဖွံ့ဖြိုးတိုးတက်မှုများ၊ အနာဂတ်နည်းပညာ ဖွံ့ဖြိုးတိုးတက်မှုနှင့် စွမ်းအင်လိုအပ်ချက်များ၊ သဘာဝပတ်ဝန်းကျင်ဆိုင်ရာများကို သုံးသပ်ဆွေးနွေးတင်ပြခဲ့ကြောင်း သိရသည်။

ဆက်လက်၍ တက်ရောက်လာကြသည့် ဒေသခံပြည်သူများက စီမံကိန်းနှင့်စပ်လျဉ်း၍ စိုးရိမ်ပူပန်မှုနှင့် နည်းပညာဆိုင်ရာအချက်အလက်များ၊ သိလိုသည်များကို မေးမြန်းဆွေးနွေးကြရာ ဒေသခံကော်မတီအဖွဲ့ဝင်များက ပြန်လည်ရှင်းလင်းဆွေးနွေးခဲ့ကြကြောင်း သိရသည်။