၈.၈.၂၀၂၅
Written By Zun
ငွေလိမ်သည့်ဂိုဏ်းအဖွဲ့က မြန်မာသုံးဦးကို ဘတ် ၄၆ သန်းနှင့် အတူ ထိုင်းနိုင်ငံ အနောက်ပိုင်း တက်ခ်ပြည်နယ်၊ မဲဆောက်တွင် ဖမ်းမိခဲ့ကြောင်း ဒေသတွင်းသတင်းများအရ သိရသည်။
ဗဟိုစုံစမ်းစစ်ဆေးရေးဗျူရို (CIB) က အဆိုပါ ဘတ်ငွေ ၄၆ သန်းနှင့် အတူ ဦးရှိုင်း၊ မသီတာနှင့် လောက်ဝေ ဆိုသူတို့ ကို ဖမ်းဆီးခဲ့ခြင်း ဖြစ်ကြောင်း၊ အဆိုပါ ငွေလိမ်ဂိုဏ်းအဖွဲ့သားများက Facebook စာမျက်နှာများကတစ်ဆင့် ထိုင်းနိုင်ငံအတွင်းမှ ဒေသခံများအား စတော့ရှယ်ယာအရောင်းအဝယ် အကြံဉာဏ်ပေးဟန်ဆောင်၍ ငွေကြေးလိမ်လည်မှု ကျူးလွန်နေကြကြောင်း သတင်းပေးတိုင်ကြားချက်ကြောင့် ဖမ်းမိခဲ့ခြင်း ဖြစ်ကြောင်း သိရသည်။
စတော့အရောင်းအဝယ် စိတ်ဝင်စားသူများ ရှိသည့် Line group များတွင် ဝင်ခိုင်းပြီးနောက် အမြတ်အစွန်း များစွာရရှိရန် ရင်းနှီးမြှုပ်နှံခိုင်းရာတွင် ၃ လခန့်စောင့်ကြည့်ခိုင်းပြီးမှ ရင်းနှီးမြှုပ်နှံရန်နှင့် စိတ်ဝင်စားမှသာ ရင်းနှီးကြရန် ပြောဆိုစည်းရုံးကြောင်းလည်း သိရသည်။
ယင်းနောက် စိတ်ဝင်စားလာကြသူများအား သီးသန့် VIP group များဝင်ခိုင်းပြီး Ulela Max အမည်ရှိ လိမ်လည်ရန် လုပ်ဆောင်ထားသော Application ကို Download ဆွဲခိုင်းကာ ယင်း Application က တစ်ဆင့် ငွေလွှဲခိုင်းကြောင်းလည်း သိရသည်။
ဘတ်ငွေ ထောင်ဂဏန်း၊ သောင်းဂဏန်း ငွေကြေးစတင်သွင်းပြီးနောက် အမြတ်အစွန်းကို ပုံမှန်ထုတ်နိုင်ခဲ့သော်လည်း သန်းဂဏန်းထိ တိုး၍ ရင်းနှီးချိန်တွင် အမြတ်ငွေထုတ်မရတော့ဘဲ အလိမ်ခံလိုက်ကြရကြောင်း သိရသည်။
ထိုင်းရဲတပ်ဖွဲ့က စုံစမ်းမှုကို ဆက်လက်လုပ်ဆောင်ရာတွင် လိမ်လည်ရရှိငွေများကို လွှဲပြောင်းမှုကိုလည်း ရှုပ်ထွေးစေရန် စီစဉ်ထားပြီး ထိုင်းနိုင်ငံမှတစ်ဆင့် ကမ္ဘောဒီးယားနိုင်ငံထိ ပို့ဆောင် ခဝါချကြကြောင်း၊ ယင်းနောက် အဆိုပါ ငွေကြေးများကို မဲဆောက်ရှိ ယခုမြန်မာဖမ်းဆီးရမိသူများထံ ငွေလွှဲ App များက ပို့ဆောင်ကြောင်း သိရသည်။
၎င်းဖမ်းဆီးခံရသူများက ဘတ်ငွေများကို ထုတ်ယူကာ မြန်မာဘက်ကို ခိုးသွင်းတင်ပို့ကြရကြောင်း၊ ပို့ဆောင်ရသည့် ငွေသားပမာဏမှာ နေ့စဉ် ဘတ်ငွေ သန်း ၂၀ မှ ၃၀ အထိရှိပြီး နယ်စပ်တံတားနေရာကတစ်ဆင့် ပို့ဆောင်ခြင်း ဖြစ်ကြောင်း၊ ယခု ဖမ်းဆီးခံရသူ သုံဦးမှာ ငွေကြေးပို့ဆောင်ရန်သာ တာဝန်ယူထားသူများ ဖြစ်ပြီး အဓိကလိမ်လည်သူများ မဟုတ်ကြသောကြောင့် ထိုင်းရဲတပ်ဖွဲ့က နောက်ကွယ်တွင် ပါဝင်သူများကို ဖော်ထုတ်သွားမည် ဖြစ်ကြောင်း ဒေသတွင်း သတင်းများက ဖော်ပြကြသည်။
About the Author
