သက်တံ့
၁၂. ၈. ၂၀၂၆
မြန်မာနိုင်ငံအလံတင် ရေယာဉ်တစ်စီးပေါ်မှ မက်သ်အမ်ဖက်တမင်း (Methamphetamine) မူးယစ်ဆေးဝါး အမြောက်အမြား သိမ်းဆည်းရမိခဲ့သည့် အမှုအား ဆက်လက်စုံစမ်းစစ်ဆေးမှု၏ အစိတ်အပိုင်းအဖြစ် အိန္ဒိယ အမျိုးသားစုံစမ်းစစ်ဆေးရေးအေဂျင်စီ (NIA) သည် ဗုဒ္ဓဟူးနေ့က တမီးလ်နာဒူး (Tamil Nadu) နှင့် မီဇိုရမ် (Mizoram) ပြည်နယ်တို့ရှိ နေရာ ၁၃ ခုတွင် အရေးပါသော ဝင်ရောက်စီးနင်း ရှာဖွေမှုများကို ဆောင်ရွက်ခဲ့သည်။ ယခုစစ်ဆင်ရေးသည် ၂၀၂၄ ခုနှစ် နိုဝင်ဘာလအတွင်း ကပ္ပလီပင်လယ် (Andaman Sea) ၌ မူးယစ်ဆေးဝါး ကီလိုဂရမ် ၆,၀၁၆.၈၇ (၆ တန်ကျော်) သိမ်းဆည်းရမိခဲ့သည့် မြန်မာနိုင်ငံအလံတင် ရေယာဉ်တစ်စီးကို ကြားဖြတ်ဟန့်တားခဲ့သည့် ဖြစ်စဉ်နှင့် ဆက်စပ်နေခြင်းဖြစ်သည်။
◾️ ဟန်ချက်ညီ ပူးပေါင်းဆောင်ရွက်မှုကြောင့် မူးယစ်ဆေးဝါး အမြောက်အမြား ဖမ်းဆီးရမိ
NIA ၏ ယနေ့ နံနက်စောစောပိုင်း ဝင်ရောက်စီးနင်းမှုများတွင် ချန်နိုင်း (Chennai) နှင့် မာဒူရိုင်း (Madurai) အပါအဝင် တမီးလ်နာဒူးပြည်နယ်ရှိ နေရာ ၈ ခုနှင့် မီဇိုရမ်ပြည်နယ်ရှိ နေရာ ၅ ခုကို ပစ်မှတ်ထား ဆောင်ရွက်ခဲ့ခြင်းဖြစ်သည်။ ယခုရှာဖွေမှုများသည် အဆိုပါ မူးယစ်ဆေးဝါး ဖမ်းဆီးရမိမှုကြီးနှင့် ဆက်စပ်နေသော မှောင်ခိုကွန်ရက်ကို ပိုမိုကျယ်ပြန့်စွာ စုံစမ်းစစ်ဆေးသည့် လုပ်ငန်းစဉ်၏ အစိတ်အပိုင်းတစ်ခု ဖြစ်သည်။ ၂၀၂၄ ခုနှစ် နိုဝင်ဘာလ ၂၃ ရက်နေ့က အိန္ဒိယကမ်းခြေစောင့်တပ်ဖွဲ့၏ ရေကြောင်းကင်းလှည့်လေယာဉ်သည် မြန်မာနိုင်ငံမှ လာသည်ဟု သံသယရှိဖွယ် သင်္ဘောတစ်စီးကို စတင်တွေ့ရှိခဲ့ပြီးနောက် ယခုစစ်ဆင်ရေး ပေါ်ပေါက်လာခဲ့ခြင်းဖြစ်သည်။
သတင်းအချက်အလက် ရရှိပြီးနောက် ရေကြောင်းနှင့် လေကြောင်း ပူးပေါင်းစစ်ဆင်ရေးကို စတင်ခဲ့ရာ အဆိုပါ ရေယာဉ်ကို ကြားဖြတ်တားဆီးနိုင်ခဲ့ပြီး သင်္ဘောပေါ်ပါ မြန်မာနိုင်ငံသား ၆ ဦးကို ဖမ်းဆီးရမိခဲ့သည်။ အဆိုပါ သင်္ဘောအား အသေးစိတ် ရှာဖွေရာတွင် ကာလပေါက်ဈေး ရူပီး ဘီလီယံ ၃၆၀ (ကုဋေ ၃,၆၀၀) ခန့် တန်ဖိုးရှိသည့် မက်သ်အမ်ဖက်တမင်း မူးယစ်ဆေးဝါး အရေအတွက် အမြောက်အမြားကို တွေ့ရှိခဲ့ရကြောင်း ကမ်းခြေစောင့်တပ်ဖွဲ့ တာဝန်ရှိသူများက ပြောကြားသည်။
◾️ မူးယစ်မှောင်ခို ကွန်ရက်များကို NIA မှ စုံစမ်းစစ်ဆေးမှု တိုးမြှင့်
ယင်းသို့ သိမ်းဆည်းရမိခဲ့ပြီးနောက် ပစ္စည်းအမြောက်အမြား သယ်ဆောင်လာသည့် မူးယစ်မှောင်ခို လုပ်ငန်းများ၏ နောက်ကွယ်ကို ပိုမိုနက်ရှိုင်းစွာ စုံစမ်းစစ်ဆေးနိုင်ရန် NIA က အမှုအမှတ် RC-16/2025/NIA/DLI ကို ဖွင့်လှစ်ခဲ့သည်။ ယင်းအမှုကို လက်ရှိတွင် ပို့ဘလဲယား (Port Blair) ရှိ NIA အထူးတရားရုံးက စစ်ဆေးလျက်ရှိသည်။ တမီးလ်နာဒူးနှင့် မီဇိုရမ်တို့တွင် လတ်တလော ပြုလုပ်ခဲ့သည့် ရှာဖွေမှုများသည် ထပ်မံလိုအပ်သော သက်သေအထောက်အထားများ စုဆောင်းရန်နှင့် အဆိုပါ မူးယစ်ဆေးဝါး မှောင်ခိုကူးသန်းမှုတွင် ပါဝင်ပတ်သက်နေနိုင်သည့် ပုဂ္ဂိုလ်များနှင့် ကွန်ရက်များကို ဖော်ထုတ်ရန် ရည်ရွယ်ခြင်းဖြစ်သည်။
စုံစမ်းစစ်ဆေးမှုများ ဆက်လက်ဆောင်ရွက်နေစဉ် အာဏာပိုင်များသည် ဒေသတွင်း ပြည်သူ့လုံခြုံရေးကို စိန်ခေါ်ခြိမ်းခြောက်နေသည့် အဆိုပါ အကြီးစား မူးယစ်ဆေးဝါး မှောင်ခိုကူးမှုတွင် တာဝန်ရှိသော ပိုမိုကျယ်ပြန့်သည့် ကွန်ရက်တစ်ခုလုံးကို ဖြိုခွဲနိုင်ရေး ပစ်မှတ်ထား ဆောင်ရွက်လျက်ရှိသည်။
Ref : Mirror Now
About the Author
