၂၄. ၇. ၂၀၂၅
Translated by Thettant
ရနောင်းပြည်နယ် နယ်စပ်ကင်းလှည့်မှုအတွင်း ထိုင်းစစ်တပ်က ထိုင်းနိုင်ငံသားတစ်ဦးကို ကရာဘူရီမြစ်ကိုဖြတ်ပြီး မြန်မာနိုင်ငံမှ ပင်လယ်စာများဖြစ်သော ဂုံး ၃ တန်ကို ထိုင်းနိုင်ငံသို့ တရားမဝင် မှောင်ခိုကူးခဲ့သည်ဟု စွပ်စွဲချက်ဖြင့် ယနေ့နံနက်ပိုင်းတွင် ဖမ်းဆီးခဲ့သည်။
ခြေလျင်တပ်ရင်း (၂၅) တပ်မဟာမှူး ဗိုလ်မှူးကြီး အဖီချိုင်း ရူယန်ရစ်က ခြေလျင်တပ်ရင်း (၂၅၂၁) တပ်ခွဲမှ ရရှိသည့် ထောက်လှမ်းရေးသတင်းကို အတည်ပြုခဲ့ပြီး အထူးတပ်မဟာ ခြေလျင်တပ်ရင်း (၂၅) နှင့် ပတ်ချန်ရဲစခန်းတို့ ပူးပေါင်းကာ ၎င်းတို့၏ စီရင်ပိုင်ခွင့်အောက်ရှိ တရားမဝင်လုပ်ငန်းများကို တားဆီးရန် ရနောင်းပြည်နယ်၊ ကရာဘူရီခရိုင်ရှိ နယ်စပ်ဒေသတွင် ကင်းလှည့်နေခဲ့သည်။ ထောက်လှမ်းရေးသတင်းများအရ ရနောင်းပြည်နယ်၊ ကရာဘူရီခရိုင်၊ ပတ်ချန်မြို့နယ်ခွဲ၊ မူး (၅) ရှိ ဆိပ်ခံတံတားတွင် ပုံမှန် တရားမဝင် မှောင်ခိုကူးမှုများရှိနေကြောင်း သိရသည်။ မှောင်ခိုသမားများကို ကြားဖြတ်ဖမ်းဆီးရန် စီစဉ်ထားပြီး သန်းခေါင်ကျော်ပြီးနောက် မကြာမီတွင် အရာရှိများက မြန်မာနိုင်ငံဘက်မှ အဖြူရောင်အိတ်များ တင်ဆောင်လာသည့် မသင်္ကာဖွယ်ရာ အမြီးရှည်လှေတစ်စင်းကို တွေ့ရှိခဲ့သည်။
လှေသည် ဆိပ်ခံတံတားသို့ ဆိုက်ကပ်ပြီးနောက် ပစ်ကပ်ထရပ်ကားတစ်စီး ရောက်ရှိလာကာ လူ ၁၀ ဦးကျော်သည် အိတ်များကို ကားပေါ်သို့ စတင်ပြောင်းရွှေ့ခဲ့ကြသည်။ အရာရှိများက အခြေအနေကို စစ်ဆေးရန် ချဉ်းကပ်လာသောအခါ မသင်္ကာဖွယ်ရာ လူများက လှေဖြင့် မြန်မာနိုင်ငံသို့ ပြန်လည်ထွက်ပြေးခဲ့ကြသည်။ သို့သော် ရဲတပ်ဖွဲ့က ရနောင်းပြည်နယ်၊ ကရာဘူရီခရိုင်၊ ပတ်ချန်မြို့နယ်ခွဲနေ အသက် ၃၇ နှစ်အရွယ် စူဝစ် (Suwit) (နာမည်ရင်း ဖော်ပြမထား) ဟု သိရသည့် မသင်္ကာသူတစ်ဦးကို ဖမ်းဆီးနိုင်ခဲ့သည်။
စူဝစ်သည် ဖတ်ထလွန် (Phatthalung) ပြည်နယ်တွင် မှတ်ပုံတင်ထားသည့် မီးခိုးရောင် Ford ပစ်ကပ်ထရပ်ကား၏ ယာဉ်မောင်းဖြစ်ကြောင်း သိရသည်။ စစ်ဆေးကြည့်ရှုရာတွင် အဆိုပါယာဉ်၌ အခွန်ဆောင်ခြင်းမရှိဘဲ မှောင်ခိုသွင်းထားသည့် တရားမဝင် ဂုံးပင်လယ်စာ အိတ် ၂၈ အိတ်၊ အလေးချိန် ခန့်မှန်းခြေ ၃,၀၈၀ ကီလိုဂရမ်ခန့်ကို တွေ့ရှိခဲ့ရသည်။
မသင်္ကာသူနှင့် သက်သေခံပစ္စည်းများကို ထိန်းသိမ်းထားရှိပြီး မှတ်တမ်းတင်ပြီးနောက် တရားဥပဒေလုပ်ငန်းများ ဆောင်ရွက်ရန် ပတ်ချန်ရဲစခန်းသို့ လွှဲပြောင်းပေးခဲ့ကြောင်း သိရသည်။
Ref, The Thaiger
About the Author
