မြန်မာအလုပ်သမားများ၏ စည်းကမ်းမဲ့နေထိုင်မှုပုံစံများကို လူမှုကွန်ရက်တွင် ဝေဖန်ခဲ့ကြပြီးနောက် ပြည်တွင်းရေးတည်ငြိမ်ပြီး ရေရှည်လုပ်ကိုင်နိုင်မည့်လုပ်သားများကိုသာ ခေါ်ယူရန် စင်ကာပူအစိုးရက အေဂျင်စီများကို သတိပေး

၅. ၂. ၂၀၂၅
Written by Nyein Kyaw

မြန်မာအလုပ်သမားများ၏ စည်းကမ်းမဲ့နေထိုင်နေမှုပုံစံများ လူမှုကွန်ရက်ပေါ်တွင် ဝေဖန်ခဲ့ကြပြီးနောက် အလုပ်သမားများအေဂျင်စီများအနေဖြင့် ပြည်တွင်းရေးတည်ငြိမ်ပြီး ရေရှည်လုပ်ကိုင်နိုင်မည့်လုပ်သားများကိုသာ ခေါ်ယူရန် စင်ကာပူနိုင်ငံ လူစွမ်းအားဝန်ကြီးဌာနက ဖေဖော်ဝါရီလ ၄ ရက် (ယမန်နေ့)တွင် သတိပေးထုတ်ပြန်ထားသည်။

အလုပ်သမားအေဂျင်စီများအနေဖြင့် စီးပွားရေးခံနိုင်ရည်ရှိမှုနှင့် လုပ်ငန်းခွင် ဆက်လက်တည်မြဲရေးအတွက် အသိအမှတ် ပြုထားသော နိုင်ငံများမှ အလုပ်သမားများကိုသာ ခေါ်ယူရန်နှင့် မြန်မာအလုပ်သမားများအား ခေါ်ယူမှုပိတ်သွားမည်ဖြစ်ကြောင်း စင်ကာပူရောက်မြန်မာအသိုင်းအဝိုင်းနှင့် စင်ကာပူနိုင်ငံ လူစွမ်းအားဝန်ကြီးဌာနမှ ဖေဖော်ဝါရီလ ၄ ရက် (ယမန်နေ့) တွင် အသိပေးချက် ထုတ်ပြန်ထားမှုအရ သိရသည်။

အဓိကခန့်အပ်မှုကိုင်ဆောင်သူများနှင့် အလုပ်အကိုင်ရှာဖွေရေးအေဂျင်စီမှ ဝန်ထမ်းများသို့ စင်ကာပူအစိုးရ၏ သတိပေး ချက် ၃ ခု၌ သတင်းများတွင် ဖော်ပြထားသည့်အတိုင်း မြန်မာနိုင်ငံသည် အရေးပေါ်အခြေအနေ ကျရောက်နေပြီး စစ်အုပ်ချုပ်ရေး ဥပဒေအောက်တွင်ရှိသည့် မြို့နယ်အရေအတွက် တိုးလာနေကာ ခရီးသွားလာမှု ကန့်သတ်ချက်များလည်း ရှိနေသည်ဟု ဖော်ပြထားသည်။

ထို့အတွက် အလုပ်အကိုင်အေဂျင်စီ (EAs) များသည် အလုပ်သမားစေလွှတ်သည့် နိုင်ငံများရှိ ပြည်တွင်းအခြေအနေများကို ရင်ဘောင်တန်းနိုင်ရန်၊ ဖြစ်ပေါ်လာနိုင်သည့် ခရီးသွားလာရေးအခက်အခဲများနှင့် ငှားရမ်းနေထိုင်မှုဆိုင်ရာများကို အလုပ်ရှင်များအား အသိပေးပြီး တောင်းဆိုလာပါက အလုပ်ရှင်များအား အကူအညီပေးရန် အကြံပြုအပ်ကြောင်း ယေဘုယျအား ဖြင့် အလုပ်သမားအေဂျင်စီ (EA) များသည် လုပ်ငန်းခံနိုင်ရည်ရှိမှုနှင့် ဆက်လက်တည်မြဲရေးအတွက် အသိအမှတ်ပြုထားသောနိုင်ငံများ၏ ကျယ်ပြန့်သောပေါင်းစပ်မှုမှ အလုပ်သမားများကို ခေါ်ယူစေလိုကြောင်း ဖော်ပြထားသည်။

ယင်းကဲ့သို့ ဆောင်ရွက်မှုသည် စင်ကာပူနိုင်ငံသို့ မြန်မာလုပ်သားများ ရောက်ရှိချိန် ကောင်းမွန်စွာနေထိုင်မှုမရှိခြင်း၊ အများပြည်သူနှင့် သက်ဆိုင်သောနေရာများတွင် ဂစ်တာတီး၊ သီချင်းဆို၊ အရက်သောက်၊ အင်္ကျီချွတ် ဆူပူသောင်းကျန်းခြင်း၊ စည်းကမ်းမလိုက်နာခြင်း စသည်တို့ကြောင့် စင်ကာပူနိုင်ငံသားများအပါအဝင် မြန်မာနိုင်ငံသားတို့ကပါ ဝေဖန်ရှုတ်ချလာမှုများကြောင့် ယခုကဲ့သို့ ဆောင်ရွက်ခြင်းဖြစ်ပြီး စင်ကာပူနိုင်ငံသို့ရောက်ရှိပြီးသား မြန်မာအလုပ်သမား တော်တော်များများလည်း မြန်မာနိုင်ငံသို့ ပြန်ပို့ခံရမည့်စာရင်းတွင် ပါဝင်လာမှုရှိကြောင်း စင်ကာပူနိုင်ငံရောက် အင်ဂျင်နီယာမြန်မာလုပ်သားတစ်ဦးက ပြောသည်။

ထိုင်းနိုင်ငံသို့ သွားရောက်အလုပ်လုပ်ကိုင်နေသော မြန်မာအလုပ်သမားများနှင့် တရားမဝင် ဝင်ရောက်လာသည့် မြန်မာနိုင်ငံသားများ၏ စည်းကမ်းမလိုက်နာမှု၊ ဆူပူသောင်းကျန်းမှု၊ ဒုစရိုက်မှုများ စသည်တို့ကြောင့် ပြီးခဲ့သည့် ၂၀၂၄ ခုနှစ်အတွင်း ထိုင်းနိုင်ငံသားများ၏ ဆန္ဒပြမှုကိုခံခဲ့ရသလို လက်ရှိတွင်လည်း စည်းကမ်းမလိုက်နာသူများနှင့် တရားမဝင် ဝင်ရောက်လာသည့် မြန်မာနိုင်ငံသားများကို ထိုင်းရဲတပ်ဖွဲ့က ယခင်ကထက် ပိုမိုဖမ်းဆီးအရေးယူများ ဆောင်ရွက်နေချိန် စင်ကာပူကပါ စည်းကမ်းမဲ့သော မြန်မာလုပ်သားများကို နှစ်လိုမှုမရှိ ပြန်ပို့ရန်နှင့် ဆက်လက်မခေါ်ရန် ဆုံးဖြတ်လာခြင်းလည်းဖြစ်သည်။

ပုံစာ။ စင်ကာပူရောက် မြန်မာများ စည်းကမ်းမဲ့ သောင်းကျန်းနေကြမှု ပုံရိပ်အချို့နှင့် လူ့စွမ်းအားဝန်ကြီးဌာန ကန့်သတ်ချက်။