၁၇.၅.၂၀၂၄
Written By Thandar
DJ Film Production က ရိုက်ကူးထုတ်လုပ်မယ့် ထိတ်လန့်ခြောက်ခြားဖွယ် သရဲဟာသဇာတ်လမ်းပုံစံ “Guest House – ဧည့်ဂေဟာ” ရုပ်ရှင်ဇာတ်ကားကြီး ကန်တော့ပွဲပေးအခမ်းအနားကို ယနေ့ မေလ ၁၇ ရက် နံနက်ပိုင်းက ရန်ကုန်မြို့ ကျိုက္ကဆံဘုရားမှာ ကျင်းပခဲ့ပါတယ်။
“ဒီဇာတ်ကားလေးက တကယ့်ကို ထိတ်လန့်ခြောက်ခြားစရာ သရဲဟာသကားဖြစ်သလို ဒရာမာလေးလည်းပါပါတယ်။ တကယ့်သင်္ချိုင်းတွေမှာ သွားရောက်ရိုက်ကူးမှာ။ ကြောက်နေရင်းနဲ့ ရယ်ရမယ့် ဇာတ်လေးပါ။ နေ့လယ်ပိုင်းကြည့်ရင်တောင် ကျောချမ်းရမယ့် ဇာတ်ကားပါ။ ညပိုင်းတွေမှာပဲ ရိုက်ကူးသွားမှာပါ။ ဂျိုကာ၊ အလင်းရောင်၊ ဦးခင်လှိုင်တို့ရဲ့ ပရိသတ်မြင်နေကြလည်း မဟုတ်ဘူး။ စိတ်ထဲမှာ မထင်မှတ်ထားတဲ့ အမြင်ဆန်းစေမယ့်ဇာတ်ပါ “လို့ ဒါရိုက်တာ ဇော်လင်းထက် (Rawness) က ပြောပါတယ်။
အဆိုပါ ဇာတ်ကားကို ဇာတ်လမ်း ၊ ဇာတ်ညွှန်းအပြင် ဒါရိုက်တာ ဇော်လင်းထက်(Rawness) က သရုပ်ဆောင်တွေဖြစ်တဲ့ အလင်းရောင် ၊ ခင်လှိုင် ၊ ဂျိုကာ ၊ ဇွဲ ၊ ဆုထက် ၊ စွမ်းထက်အောင် ၊ ဆူး ၊ ညီလွင် နဲ့စတဲ့ အနုပညာရှင်များစွာနဲ့ ရိုက်ကူးမှာပါ။
“Guest House – ဧည့်ဂေဟာ” ရုပ်ရှင်ဇာတ်ကားကြီးကို ပင်းတယမြို့နယ်ရှိ သင်္ချိုင်းမှာ မေလ ၂၀ ရက်နေ့ ရိုက်ကူးမှာ ဖြစ်တယ်လို့ သိရပါတယ်။
