တောင်ဒဂုံတွင် ပန်ကာအပူလွန်ကဲရာမှ မီးကူးစက်လောင်ကျွမ်း၍ နေအိမ် ၃ လုံး မီးလောင်ဆုံးရှုံး

◾တိုက်ကြီးတွင်လည်း ထမင်းပေါင်းအိုးအပူလွန်ရာမှ မီးလောင်၍ နေအိမ် ၃ လုံး ဆုံးရှုံးခဲ့ရ

၂၉. ၂. ၂၀၂၄
Written by KL

ဒဂုံမြို့သစ်(တောင်ပိုင်း)မြို့နယ်၊ အမှတ် (၁၈/D)၊ ကျွန်းရွှေမြိုင်လမ်းတွင် ဖေဖော်ဝါရီ ၂၉ရက် နံနက်ပိုင်းက ပန်ကာမော်တာ အပူလွန်ကဲရာမှ မီးကူးစက်လောင်ကျွမ်းခဲ့ရာ လူနေအိမ် ၃ လုံး မီးလောင်ကျွမ်းခဲ့ကြောင်း သိရသည်။

ဖြစ်စဥ်မှာ သွပ်မိုး၊ ပျဥ်ကာ၊ ပျဥ်ခင်း နေအိမ်တစ်လုံးတွင် ပန်ကာဖွင့်ထားရာမှ မော်တာအပူလွန်ကဲပြီး အနီးရှိ ဆိုဖာပေါ်သို့ မီးပွားကျ၍ မီးကူးစက်ရာမှ စတင်လောင်ကျွမ်းခဲ့ကြောင်း စစ်ဆေးသူများ၏ အတည်ပြုချက်အရ သိရသည်။

မီးလောင်မှုမှာ ၂၅ မိနစ်ခန့်ကြာမြင့်ခဲ့ပြီး သွပ်မိုး၊ ပျဥ်ကာ၊ ပျဥ်ခင်း နေအိမ် ၃ လုံးနှင့် အတွင်းပစ္စည်းများ မီးလောင်ဆုံးရှုံးခဲ့သဖြင့် အသက် ၆၁ နှစ်အရွယ် အမျိုးသားကြီးကို ပုဒ်မ ၂၈၅ ဖြင့် ဒဂုံမြို့သစ် (တောင်ပိုင်း)မြို့မရဲစခန်းက အမှုဖွင့်ထားကြောင်း သိရသည်။

အဆိုပါ လူနေအိမ် ၃ လုံး မီးလောင်မှုကို မီးငြှိမ်းသတ်ယာဥ် ၁၁ စီး၊ ရေသယ်ယာဥ် ၃ စီး၊ မီးသတ်တပ်ဖွဲ့ဝင် ၁၁၀ ကျော်ဖြင့် ငြှိမ်းသတ်ခဲ့ကြောင်း သိရသည်။

အလားတူ ရန်ကုန် တိုင်းဒေသကြီး၊ တိုက်ကြီးမြို့နယ်၊ မင်္ဂလာရပ်ကွက်၊ မင်္ဂလာ(၃)လမ်းတွင် ဖေဖော်ဝါရီ ၂၈ ရက် နံနက် ၁၀ နာရီ ၁၅ မိနစ်ခန့်က အလျား ၁၂ ပေ၊ အနံ ၁၈ ပေရှိ သွပ်မိုး၊ ထရံကာ၊ ပျဥ်ခင်းနေအိမ်တွင် ထမင်းပေါင်းအိုး တည်ထားရာမှာ ခလုတ်ပျက်စီးကာ အပူလွန်ကဲရာမှ အောက်ရှိ စားပွဲခုံနှင့် အဝတ်ပုံများပေါ်သို့ မီးကူးစက်လောင်ကျွမ်းခဲ့ကြောင်း စစ်ဆေးသူများထံမှ သိရသည်။

ထို မီးလောင်မှုကြောင့် အလျား ၁၂ ပေ၊ အနံ ၁၈ ပေ ရှိသော သွပ်မိုး၊ ထရံကာပျဥ်ခင်းနေအိမ် ၁ လုံး၊ သွပ်မိုး၊ ပျဥ်ကာပျဥ်ခင်းနေအိမ် ၁ လုံးနှင့် အလျား ၁၈ ပေ၊ အနံ ၂၄ ပေရှိ သွပ်မိုး၊ ထရံကာ၊ ပျဥ်ခင်း ၁ ထပ်နေအိမ် ၁ လုံးနှင့် အတွင်းပစ္စည်းတို့ မီးလောင်ဆုံးရှုံးခဲ့၍ အသက် ၄၇ နှစ်အရွယ် အမျိုးသမီးကြီးကို တိုက်ကြီးမြို့မရဲစခန်းက ပုဒ်မ ၂၈၅ ဖြင့် အမှုဖွင့်ထားကြောင်းလည်း သိရသည်။

ပုံစာ။ တောင်ဒဂုံနှင့်တိုက်ကြီးတွင် နေအိမ်များမီးလောင်မှုမြင်ကွင်း။