MT News
၁၅. ၁၂. ၂၀၂၃
လာမဲ့ ၂၀၂၄ မတ်လ ၁၁ ရက်ကနေ စတင်ပြီး ခြောက်ဘာသာစလုံးကို ပိတ်ရက်မရှိဆက်တိုက်ဖြေဆိုရမယ့် ၂၀၂၄ ခုနှစ် တက္ကသိုလ်ဝင်စာမေးပွဲ အချိန်စာရင်းတွေကို မြန်မာနိုင်ငံစာစစ်ဦးစီးဌာနက ဒီနေ့ ထုတ်ပြန်လာပါတယ်။
စာစစ်ဦးစီးဌာနရဲ့ ထုတ်ပြန်ချက်အရ ၂၀၂၄ ခုနှစ် မတ်လ ၁၁ ရက် မနက် ၉ နာရီကနေ ၁၂ နာရီအထိ မြန်မာစာ၊ မတ်လ ၁၂ ရက် မနက် ၉ နာရီကနေ ၁၂ နာရီအထိ အင်္ဂလိပ်စာ၊ မတ်လ ၁၃ ရက် မနက် ၉ နာရီကနေ ၁၂ နာရီအထိ သင်္ချာ၊ မတ်လ ၁၄ ရက် မနက် ၉ နာရီကနေ ၁၂ နာရီအထိကို ဓာတုဗေဒ/ပထဝီဝင်၊ မတ်လ ၁၅ ရက် မနက် ၉ နာရီကနေ ၁၂ နာရီအထိ ရူပဗေဒ/သမိုင်း၊ မတ်လ ၁၆ ရက် မနက် ၉ နာရီကနေ ၁၂ နာရီအထိ ဇီဝဗေဒ/ဘောဂဗေဒတို့ကို ခြောက်ဘာသာလုံး နားရက်မရှိဆက်တိုက်ဖြေဆိုရမှာပါ။
အဲဒီနောက်မှာတော့ မတ်လ ၁၇ ရက် တစ်ရက်ပိတ်ပြီး မတ်လ ၁၈ ရက် မနက် ၉ နာရီကနေ ၁၂ နာရီအထိ လူမှုရေးသိပ္ပံနဲ့ မတ်လ ၁၉ ရက် မနက် ၉ နာရီကနေ ၁၂ နာရီအထိ စိတ်ကြိုက်မြန်မာစာတို့ကို ဖြေဆိုရမှာဖြစ်ပါတယ်။
လက်ရှိမှာတော့ လူမှုကွန်ရက်က Department of Myanmar Examinations – မြန်မာနိုင်ငံစာစစ်ဦးစီးဌာနရဲ့ Page အောက်မှာ ကလေးတွေကို ပိတ်ရက်မရှိဖြေဆိုခိုင်းတာမဖြစ်သင့်ကြောင်း၊ ပညာရေးစနစ်သစ်စလို့ စာများနေတဲ့နှစ်မျိုး ပိတ်ရက်များတဲ့နှစ်မျိုးမှာ နားရက်မရှိဖြေဆိုခိုင်းတာမဖြစ်သင့်ကြောင်း ဝိုင်းဝန်းဝေဖန်နေကြပါတယ်။
