လက်လုပ်ဗုံးဖြင့် ပစ်ခတ်တိုက်ခိုက်ခံရသည့် မြေပုံညွှန်း
MT News
Written by Naing Thuta
မန္တလေးမြို့ရှိ အိုးအိမ်တိုက်တန်း မြေကွက်လပ်ပေါ်၌ နေအိမ်လိုင်းခန်း ကြီးကြပ်မှုညှိနှိုင်းအစည်းအဝေးပြုလုပ်နေစဉ် လက်လုပ်ဗုံးတစ်လုံးဖြင့် ပစ်ပေါက်သွား၍ ပေါက်ကွဲမှုဖြစ်ပွားခဲ့ရာမှ လူ ၄ ဦးဒဏ်ရာရရှိခဲ့ကြောင်း သိရသည်။
ဖြစ်စဉ်မှာ အောက်တိုဘာ ၂၄ ရက် ည ၈ နာရီခန့်တွင်မန္တလေးတိုင်းဒေသကြီး၊ ပုသိမ်ကြီးမြို့နယ်၊ နန်းဦးလွင်ကျေးရွာ ၂၅ လမ်းဘေးတွင်ရှိသော အိုးအိမ် တိုက်အမှတ်(၆)ရှေ့မြေကွက်လပ်ပေါ်၌ နေအိမ်လိုင်းခန်း ကြီးကြပ်မှုညှိနှိုင်းအစည်းအဝေးကို အမှတ်(၁ ၊၂ ၊ ၃ ၊ ၄၊၅၊ ၆ )တိုက်ခန်းများမှ ကိုယ်စားလှယ် ၂၀ ခန့် အစည်းအဝေးပြုလုပ်နေစဉ် ၂၅ လမ်းမပေါ်၌ အရှေ့မှ အနောက်သို့ အမျိုးသားနှစ်ဦး မောင်းလာသည့် ဆိုင်ကယ်ပေါ်မှ အနောက်တွင်ထိုင်နေသည့်သူက လက်လုပ်ဗုံး(၁)လုံးဖြင့် ပစ်ပေါက်ထွက်ပြေးသွားခဲ့ရာ အစည်းအဝေးပြုလုပ်နေသည့်အနီးတွင် ပေါက်ကွဲမှုဖြစ်ပွားခဲ့ကြောင်း အိုးအိမ်တိုက်တန်းရှိ တာဝန်ရှိသူတစ်ဦးပြောကြားချက်အရ သိရသည်။
“လက်လုပ်ဗုံးနဲ့ပစ်သွားတာတော့ဟုတ်တယ်။ ကျွန်တော်တို့ တိုက်ခန်းအစည်းအဝေးလုပ်နေစဉ် လက်လုပ်မိုင်းနဲ့ လာပစ်သွားတာ။ လူ ၄ ယောက်တော့ ဒဏ်ရာရသွားတယ်။ အမျိုးသား ၂ ဦးနဲ့ အမျိုးသမီး ၂ ဦးတော့ ဒဏ်ရာရသွားပြီး ဆေးကုသမှုခံယူနေကြတယ်။ အခြားပစ္စည်းတွေတော့ ဘာမှမဖြစ်သွားဘူး ။ တော်သေးတယ် လူတွေ မသေသွားတာ။ ၉ နှစ်အရွယ် ကလေးတစ်ဦး၊ ကျောင်း ဆရာမတစ်ဦး ၊ ရုပ်/သံ ဝန်ထမ်းတစ်ဦး၊ စည်ပင်ဝန်ထမ်းတစ်ဦးတော့ ထိသွားကြတာပေါ့။ အခုတော့ ရဲစခန်းမှာ အမှုဖွင့်တိုင်ကြားထားတယ်”ဟု အဆိုပါ တာဝန်ရှိသူက ပြောသည်။
၎င်းပေါက်ကွဲမှုတွင် တိုက်အမှတ်(၂)နေ အသက် ၂၄ နှစ်အရွယ် စည်ပင်ဝန်ထမ်း မောင်သုခပြည့်စုံသည် ယာပေါင် ဗုံးစထိမှန် ဒဏ်ရာ(၁)ချက်၊ ကျောယာဘက် ဗုံးစထိမှန် ဒဏ်ရာ(၁)ချက်(မစိုးရိမ်ရ)၊ တိုက်အမှတ်(၅)နေ အသက် ၄၂ နှစ်အရွယ် ရုပ်/သံဝန်ထမ်း ဦးအောင်ခိုင်သည် ကျောယာဘက်ဗုံးစ ထိမှန်ဒဏ်ရာ(၂)ချက်၊ ယာခြေကျင်းဝတ် ဗုံးစထိမှန်ဒဏ်ရာ(၁)ချက်(မစိုးရိမ်ရ)၊ အသက် ၅၉ နှစ်အရွယ် အလယ်တန်းပြဆရာမ ဒေါ်ခင်ခင်သွယ်သည် ဦးခေါင်းနောက်စေ့ ဗုံးစထိမှန် ဒဏ် ရာ(၁)ချက်(မစိုးရိမ်ရ) နှင့် သက် ၉ နှစ်အရွယ် မအိမ့်သွန်းဆက်သည် ခြေကျင်းဝတ် ဗုံးစထိမှန်ဒဏ်ရာ(၁)ချက်၊ ကျောယာဘက် ဗုံးစထိမှန် ဒဏ်ရာ(၁)ချက်(မစိုးရိမ်ရ)တို့ အသီးသီးဒဏ်ရာရရှိခဲ့သဖြင့် နန်းတော်ရှေ့” လူမှုကူညီရေး အသင်းယာဉ်ဖြင့်မန္တလေးအထွေထွေဆေးရုံကြီးသို့ ပို့ဆောင်ခဲ့ပြီး ဆေးကုသမှုခံယူလျှက်ရှိကြောင်း သိရသည်။
အဆိုပါ လက်လုပ်ဗုံး လာရောက်ပစ်ပေါက်သူများအား အိုးအိမ်တာဝန်ရှိသူတစ်ဦးမှ ပုသိမ်ကြီးမြို့မရဲစခန်းသို့ အောက်တိုဘာလ ၂၅ ရက်နေ့ကတိုင်းချက်ဖွင့်၍ တိုင်းကြားထားကြောင်းနှင့် သက်ဆိုင်ရာအဖွဲ့မှ တရားခံများအား ဖမ်းဆီးရမိရေးအတွက် ဆောင်ရွက်လျှက်ရှိနေကြောင်း သိရပြီး ၎င်းပစ်ခတ်ပေါက်ကွဲမှုမှာ မည်သည့်အဖွဲ့က လုပ်ဆောင်သွားသည်ကို ယနေ့အထိ မသိရှိရသေးကြောင်း သိရသည်။
