သက်တံ့
၁၆. ၁၀. ၂၀၂၆
Tesla ကုမ္ပဏီသည် ဒုံးပျံပုံစံ တွန်းကန်စနစ် (thrusters) များ တပ်ဆင်ထားသည့် ဒီဇိုင်းသစ် Roadster ပြိုင်ကားကို မိတ်ဆက်ပြသခဲ့ပြီး အဆိုပါ လျှပ်စစ်ကားသစ်ကို ၂၀၂၈ ခုနှစ်တွင် စတင်ထုတ်လုပ်မည်ဖြစ်ကြောင်း ပြောကြားခဲ့သည်။
အမှုဆောင်အရာရှိချုပ် (CEO) အီလွန်မတ်စ်ခ် (Elon Musk) ၏ ဒုံးပျံကုမ္ပဏီ SpaceX နှင့် Tesla ပူးပေါင်းထုတ်လုပ်ထားသည့် အဖြူရောင် နှစ်ယောက်စီး ပြိုင်ကားသည် လေစုတ်စနစ် (Suction system) ကို အသုံးပြု၍ ချဉ်းကပ်လမ်းပေါ်တွင် ဇောက်ထိုး မောင်းနှင်ပြခဲ့ပြီး၊ လေထဲတွင် လှည့်ပတ်ပျံဝဲကာ တပ်ဆင်ထားသော တွန်းကန်စနစ်များဖြင့် ပျော့ပျောင်းစွာ ဆင်းသက်ပြခဲ့သည်။
ပွဲစဉ်အတွင်း အဆိုပါကားသည် တွန်းကန်စနစ်ကို အသုံးပြု၍ ကုန်ကားတစ်စီးနှင့် အခြားယာဉ်များကို ကျော်လွန်ကာ လေထဲတွင် လှည့်ပတ်ခုန်ပျံပြခဲ့သည်။
စောင့်ကြည့်သူအချို့က အဆိုပါ ပူးပေါင်းဆောင်ရွက်မှုကို မတ်စ်ခ် ထိန်းချုပ်ထားသည့် ကုမ္ပဏီကြီး နှစ်ခုပေါင်းစည်းရေးအတွက် စိတ်ဝင်စားမှု မြှင့်တင်ရန် ကြိုးပမ်းမှုအဖြစ် ရှုမြင်ကြပြီး မတ်စ်ခ်သည် ထိုကုမ္ပဏီနှစ်ခု၏ ပူးပေါင်းဆောင်ရွက်နိုင်မှုဆိုင်ရာ အလားအလာများကို ယခင်ကတည်းက ဆွေးနွေးပြောဆိုခဲ့ဖူးသည်။
Roadster ပြိုင်ကား ထွက်ရှိမည့်ရက် ရွှေ့ဆိုင်းခဲ့ရသည်မှာ နှစ်ပေါင်းများစွာ ကြာမြင့်ခဲ့ပြီးနောက် ယခု မိတ်ဆက်လိုက်မှုသည် Tesla အတွက် ထိပ်တန်းပြသစရာ ကားတစ်စီး ဖြစ်လာစေခဲ့သည်။ သို့သော်လည်း လက်ရှိတွင် ကုမ္ပဏီသည် အလိုအလျောက် မောင်းနှင်သည့် နည်းပညာနှင့် ရိုဘော့တစ်ပိုင်းသို့ အဓိက အာရုံစိုက်နေချိန် ဖြစ်သလို၊ ရင်းနှီးမြှုပ်နှံသူများအတွက် ပိုမိုအရေးပါသည်ဟု လေ့လာသုံးသပ်သူများ ပြောဆိုကြသည့် တတိယသုံးလပတ် ဘဏ္ဍာရေး အစီရင်ခံစာ မထွက်ရှိမီ ရက်ပိုင်းအလိုတွင် ယခုလို မိတ်ဆက်ခဲ့ခြင်းလည်း ဖြစ်သည်။
“ဒါဟာ အစဉ်အလာအရ မော်တော်ကား ထုတ်လုပ်သူတွေကို အရှက်ရစေတာကလွဲလို့ စီးပွားရေးအရ အသုံးဝင်မှု မရှိတဲ့ အင်ဂျင်နီယာပိုင်းဆိုင်ရာ ကြွားဝါမှုတစ်ခုပါပဲ” ဟု Tesla ရင်းနှီးမြှုပ်နှံသူ Deepwater Asset Management ၏ မန်နေဂျင်းပါတနာ Gene Munster က လူမှုကွန်ရက် X ပေါ်တွင် ဝေဖန် ရေးသားခဲ့သလို “Roadster မိတ်ဆက်ပွဲဟာ အီလွန်အနေနဲ့ Tesla နဲ့ SpaceX ကို ဘာကြောင့် ပေါင်းစည်းချင်နေသလဲဆိုတာကို အထင်အရှား ပြသလိုက်တဲ့ နောက်ဆုံးဥပမာတစ်ခုပါပဲ” ဟု Munster က ဆိုသည်။
မတ်စ်ခ်ကမူ အဆိုပါကားသည် Tesla ၏ ဘဏ္ဍာရေးအပေါ် အရေးပါမှုကို လျှော့ချပြောဆိုခဲ့ပြီး ၂၀၂၃ ခုနှစ်က ပြောကြားမှုတစ်ခုတွင် “ဘဏ္ဍာရေးအရ ကြီးကြီးမားမား အပြောင်းအလဲ မဖြစ်စေနိုင်တဲ့ သေးငယ်တဲ့ ကိစ္စတစ်ခု” ဟု ဖော်ပြခဲ့သည်။ သို့သော်လည်း အဆိုပါကားသည် ကုမ္ပဏီအတွက် ပုံရိပ်ပိုင်းဆိုင်ရာ အဓိက အမှတ်အသားအဖြစ် တည်ရှိနေဆဲဖြစ်သည်။
“Tesla မှာ မော်တော်ကား ထုတ်လုပ်သူတစ်ဦးရဲ့ အကောင်းဆုံး အင်ဂျင်နီယာနဲ့ နည်းပညာကို ပြသဖို့ ဒီဇိုင်းထုတ်ထားတဲ့ ထိပ်တန်း အဆင့်မြင့်ပြိုင်ကား (Halo car) မရှိသေးပါဘူး။ Roadster ဟာ Tesla ၏ ထိပ်တန်း Halo car အသစ် ဖြစ်လာမှာပါ” ဟု Morningstar မှ လေ့လာသုံးသပ်သူ Seth Goldstein က လွန်ခဲ့သည့်လက မှတ်ချက်ပြုခဲ့သည်။
Tesla သည် လွန်ခဲ့သည့် ဆယ်စုနှစ်တစ်ခုနီးပါးက အဆိုပါယာဉ်အတွက် အခြေခံဈေးနှုန်းကို ဒေါ်လာ ၂၀၀,၀၀၀ ဟု သတ်မှတ်ခဲ့သော်လည်း မတ်စ်ခ်နှင့် အခြားအရာရှိများသည် ယခုမိတ်ဆက်ပွဲတွင် ပစ်မှတ်ထားသည့် ဈေးနှုန်းများကို အတိအကျ ထုတ်ဖော်ပြောဆိုခြင်း မရှိခဲ့ပေ။
Roadster ဝယ်ယူလိုသူများအတွက် Tesla ၏ ကြိုတင်မှာယူမှု (Reservation) စာမျက်နှာတွင် စရံငွေ ဒေါ်လာ ၅၀,၀၀၀ ပေးသွင်းရမည့် “Performance” မော်ဒယ်နှင့် အရှိန်မြှင့်တွန်းကန်စနစ် ပါဝင်ပြီး စရံငွေ ဒေါ်လာ ၂၅၀,၀၀၀ ပေးသွင်းရမည့် “Thrust” မော်ဒယ်တို့ကို ဖော်ပြထားသည်။
“Rocket” ဟု အမည်ပေးထားသည့် အမျိုးအစားကိုမူ Tesla က “ဖိတ်ကြားခံရသူများသာ” ဝယ်ယူနိုင်မည်ဟု ပြောကြားထားပြီး “အပြည့်အဝ ပျံသန်းမောင်းနှင်နိုင်သော စနစ်” ပါဝင်သည့် တစ်ယောက်စီး မော်ဒယ်အဖြစ် ဖော်ပြထားသည်။
တက္ကဆပ်ပြည်နယ်၊ McGregor ရှိ SpaceX စမ်းသပ်ကွင်းတွင် ပြုလုပ်ခဲ့သည့် မိတ်ဆက်ပွဲ၌ မတ်စ်ခ်၏ ကလပ်စစ် ထုတ်ကုန်မိတ်ဆက်ပွဲများအတိုင်း ဆွဲဆောင်မှုရှိသော ဂီတ၊ မီးခိုးများ၊ စက်ပစ္စည်းသံများနှင့် ပစ်လွှတ်မှု ရေတွက်သံများ စသည့် အစိတ်အပိုင်းများ အပြည့်အဝ ပါဝင်ခဲ့သည်။
“ဒါဟာ ရုပ်ရှင်တွေမှာတောင် မမြင်ဖူးသေးတဲ့ အရာတစ်ခုကို ဖန်တီးဖို့ Tesla နဲ့ SpaceX အင်ဂျင်နီယာတွေ အနီးကပ် ပူးပေါင်းဆောင်ရွက်ခဲ့ကြတဲ့ အံ့မခန်း လုပ်ဆောင်ချက်တွေရဲ့ အထွတ်အထိပ်ပါပဲ” ဟု Tesla လိုဂိုပါသည့် ငွေရောင် အနောက်တိုင်းစတိုင် ခါးပတ်ခေါင်းကို ဝတ်ဆင်ထားသည့် မတ်စ်ခ်က ဝမ်းမြောက်ဝမ်းသာ အားပေးနေကြသည့် ပရိသတ်များနှင့် ရင်းနှီးမြှုပ်နှံသူများကို ပြောကြားခဲ့သည်။
Roadster ကားသည် တစ်နာရီလျှင် ၀ မိုင်မှ ၆၀ မိုင် (၉၇ ကီလိုမီတာ) အရှိန်ကို ၁ စက္ကန့်ထက်နည်းသော အချိန်အတွင်း မြှင့်တင်နိုင်ပြီး အမြင့်ဆုံးအရှိန် တစ်နာရီလျှင် မိုင် ၂၃၀ (၃၇၀ ကီလိုမီတာ) အထိ မောင်းနှင်နိုင်ကြောင်း Tesla ယာဉ်အင်ဂျင်နီယာချုပ် Lars Moravy က ပြောကြားခဲ့သည်။
“ဒါထက် အများကြီး ပိုမြန်မှာ သေချာပါတယ်” ဟု စိတ်လှုပ်ရှားနေသော မတ်စ်ခ်က ပြောသည်။ “အသံထက် မြန်နှုန်းရဲ့ ထက်ဝက်နီးပါးအထိ ရောက်အောင် မောင်းနှင်နိုင်မယ်လို့ ထင်ပါတယ်” ဟုလည်း ဆက်လက်ပြောခဲ့သည်။
Roadster သည် တစ်ကြိမ် အားသွင်းရုံဖြင့် မိုင် ၃၀၀ (၄၈၀ ကီလိုမီတာ) အထက် မောင်းနှင်နိုင်သည်။ ထိုသည်မှာ Tesla က ဒုတိယမျိုးဆက် Roadster ၏ ပထမဆုံး ရှေ့ပြေးပုံစံကို မိတ်ဆက်ခဲ့ပြီး ၂၀၂၀ ပြည့်နှစ်တွင် စတင်ပို့ဆောင်ပေးမည်ဟု မတ်စ်ခ် ပေးခဲ့သည့် ၂၀၁၇ ခုနှစ် ကတိကဝတ်၏ ထက်ဝက်ထက် နည်းပါးနေသည်။
၂၀၀၈ ခုနှစ်တွင် ထွက်ရှိခဲ့ပြီး ၂၀၁၂ ခုနှစ်အထိ ရောင်းချခဲ့သည့် မူလ Roadster ကားသည် Lotus Elise အောက်ခံစနစ် (Chassis) ကို အသုံးပြုထားသည့် Tesla ၏ ပထမဆုံး လျှပ်စစ်ကားဖြစ်ခဲ့ပြီး လျှပ်စစ်ကားတစ်စီး၏ အလားအလာအပေါ် ကမ္ဘာ့အမြင်ကို ပြောင်းလဲပစ်ရန် ကူညီပေးခဲ့သည်။
ထိုအချိန်မှစ၍ ကုမ္ပဏီသည် Model Y နှင့် Model X SUV များအပြင် Model S နှင့် Model 3 ဆီဒန်ကားများကြောင့် လူသိများလာခဲ့သည်။
ဒုတိယမျိုးဆက် Roadster ကို မိတ်ဆက်လိုက်ခြင်းသည် လူကိုယ်တိုင် မောင်းနှင်ရသည့် ကားများ ထုတ်လုပ်ခြင်းမှသည် ဉာဏ်ရည်တု (AI) အခြေပြု အလိုအလျောက် မောင်းနှင်သည့် နည်းပညာနှင့် ရိုဘော့တစ်ပိုင်းသို့ Tesla က သိသိသာသာ အပြောင်းအလဲ ပြုလုပ်နေချိန်တွင် ထွက်ပေါ်လာခြင်း ဖြစ်သည်။
ယခုနှစ်တွင် Tesla သည် Optimus လူတူရိုဘော့များ ထုတ်လုပ်ရန် နေရာလွတ်ရရှိရေးအတွက် Model S နှင့် X ယာဉ်များ ရောင်းချမှုကို ရပ်ဆိုင်းခဲ့သည်။ ထို့အပြင် စတီယာရင်၊ လီဗာနှင့် မှန်များကဲ့သို့ လက်ဖြင့် ထိန်းချုပ်သည့် စနစ်များ မပါဝင်သည့် နှစ်ယောက်စီး Robotaxi ဖြစ်သော Cybercab ကိုလည်း မိတ်ဆက်ခဲ့သည်။
Tesla သည် ၎င်း၏ တတိယသုံးလပတ် ဘဏ္ဍာရေးရလဒ်များကို အောက်တိုဘာ ၂၁ ရက်တွင် ထုတ်ပြန်ရန် စီစဉ်ထားသည်။
ဓာတ်ဆီဈေးနှုန်း မြင့်မားမှုကြောင့် တတိယသုံးလပတ်တွင် ကားတင်ပို့မှု တိုးတက်ခဲ့သော်လည်း လွန်ခဲ့သည့် နှစ်နှစ်အတွင်း Tesla ၏ သက်တမ်းရင့် လျှပ်စစ်ကားများ ရောင်းချရမှုမှာ ကျဆင်းခဲ့သည်။
“အမြတ်ရာခိုင်နှုန်းနဲ့ ငွေသားစီးဆင်းမှု ကိန်းဂဏန်းတွေဟာ မိတ်ဆက်ပွဲမှာ သူတို့ မြင်တွေ့ခဲ့ရတာတွေထက် ရင်းနှီးမြှုပ်နှံသူတွေအတွက် အများကြီး ပိုမို လေးနက်မှုရှိပါတယ်” ဟု ကုန်သွယ်ရေးပလက်ဖောင်း eToro ၏ အာရှ-ပစိဖိတ်ဆိုင်ရာ အဓိကလေ့လာသုံးသပ်သူ Josh Gilbert က ပြောကြားခဲ့သည်။
Ref: RTE
About the Author
