၆.၁၀.၂၀၂၆
Translated by Htwe Ko Tun
ပြင်သစ်နိုင်ငံတွင် ပိုမိုကောင်းမွန်သော ပညာရေးအခြေအနေများအတွက် အထက်တန်းကျောင်းသားများ၏ဆန္ဒပြပွဲများတွင် ရဲတပ်ဖွဲ့နှင့်ပဋိပက္ခများ ဖြစ်ပွားလျက်ရှိရာ အစွမ်းထက်အားကြီးသော အလုပ်သမားသမဂ္ဂများကလည်း ပူးပေါင်းပါဝင်လာသောကြောင့် အောက်တိုဘာ ၆ ရက်တွင် ပါရီမြို့ လမ်းများပေါ်တွင် ဆန္ဒပြပွဲများ၌ ဆန္ဒပြသူ ထောင်ပေါင်းများစွာ စုဝေးကြလိမ့်မည်ဟု မျှော်လင့်ရသည်။
စက်တင်ဘာလကုန်ပိုင်းမှစ၍ ကျောင်းသားများသည် အသက် ၁၅ နှစ်မှ ၁၇ နှစ်အရွယ်များအတွက် အထက်တန်းကျောင်းရာပေါင်းများစွာ၏ ဝင်ပေါက်များကို ပိတ်ဆို့ထားပြီး ဆရာ၊ ဆရာမများ ပျောက်ဆုံးနေခြင်း၊ အချိန်ဇယားများ ပြည့်ကျပ်နေခြင်း၊ ယိုယွင်းနေသော စာသင်ခန်းများနှင့် အပူချိန်မြင့်တက်လာမှုကို မခံနိုင်သော အဆောက်အအုံများအတွက် ညည်းညူဆန္ဒပြနေကြသည်။
ဆန္ဒပြပွဲများစွာသည် ငြိမ်းချမ်းစွာ ဖြစ်ပွားခဲ့သော်လည်း ကျောင်းသားအချို့သည် အမှိုက်ပုံးများကို မီးရှို့ခြင်း၊ ဘတ်စ်ကားရပ်နားရာနေရာများကို မီးရှို့ခြင်း သို့မဟုတ် အဓိကရုဏ်းနှိမ်နင်းရေးရဲများနှင့် ပဋိပက္ခဖြစ်ပွားခဲ့ခြင်းတို့ကြောင့် ရဲတပ်ဖွဲ့ကလည်း တုတ်၊ မျက်ရည်ယိုဗုံးနှင့် အဓိကရုဏ်းထိန်းချုပ်ရေး ကျည်ဆန်များဖြင့် တုံ့ပြန်ခဲ့ကြသည်။
ဆန္ဒပြလှုပ်ရှားမှုစတင်ကတည်းက ကျောင်းသား ၂၁၅ ဦးနှင့် ရဲအရာရှိ ၇၁၅ ဦး ဒဏ်ရာရရှိခဲ့ကြောင်း အစိုးရက ပြောခဲ့ပြီး အောက်တိုဘာလ ၅ ရက် တွင်တနင်္လာနေ့တွင် အဓိကရုဏ်းနှိမ်နင်းရေးရဲများ ပစ်ခတ်ခဲ့သော sting-ball ခေါ် အဓိကရုဏ်းထိန်းချုပ်ရေး လက်ပစ်ဗုံးကို ကောက်ယူမိခြင်းကြောင့် အသက် ၁၅ နှစ်အရွယ် လူငယ်တစ်ဦး လက်တစ်ဖက် ဆုံးရှုံးခဲ့ရကြောင်း သိရသည်။ အလယ်အလတ် ဝါဒီသမ္မတအီမန်နျူရယ် မက်ခရွန်အနေဖြင့် အများဆုံးတာဝန်ထမ်းဆောင်နိုင်သော သမ္မတသက်တမ်း နှစ်ကြိမ်ရှိပြီးနောက် အစားထိုးမည့်သူကို ရွေးချယ်ရန် ၂၀၂၇ ခုနှစ် ရွေးကောက်ပွဲကျင်းပရေးအတွက် လပိုင်းသာ လိုချိန်တွင် မငြိမ်မသက်မှုများ ပေါ်ပေါက်လာခဲ့ခြင်းဖြစ်သည်။
ပညာရေးဝန်ကြီးဌာနနှင့် ကျောင်းသားသမဂ္ဂတစ်ခု၏ အဆိုအရ နိုင်ငံ၏ အထက်တန်းကျောင်း ၃,၇၀၀ မှ ၅၈၉ ကျောင်းနှင့် တက္ကသိုလ် ၃၂ ခုတွင် သင်ကြားရေး အနှောင့်အယှက်ဖြစ်ပြီးနောက် အောက်တိုဘာလ ၆ ရက်တွင် နိုင်ငံတစ်ဝန်း ဆန္ဒပြပွဲများ ပိုမိုဖြစ်ပွားလာဖွယ်ရှိသည်။
အာဏာပိုင်များက ပါရီမြို့တွင် ဆန္ဒပြသူ ၂၀,၀၀၀ မှ ၄၀,၀၀၀ ခန့်အထိ ရှိလာမည်ဟု မျှော်လင့်ထားသည်။
ဝန်ကြီးချုပ် ဆီဘတ်စတီယန် လီကော်နူး၏ရုံးက ငြိမ်းချမ်းသော စုဝေးမှုများ ပြုလုပ်ရန် တောင်းဆိုထားပြီး ဖွဲ့စည်းတည်ဆောက်ပုံနှင့်အညီ တရားဝင်ပြီး ဒီမိုကရေစီဆန်သော အတိုက်အခံပုံစံသို့ ပြန်လည်ရောက်ရှိရန် တောင်းဆိုထားသည်။
CGT အလုပ်သမားသမဂ္ဂ၏ အကြီးအကဲ ဆိုဖီ ဘီနက်က ၎င်း၏အဖွဲ့ဝင်များသည် အထက်တန်းကျောင်းသားများကို ကာကွယ်ရန်ဆန္ဒပြပွဲ၌ ရှိနေမည်ဟု ပြောကြားခဲ့သည်။
အလုပ်သမားသမဂ္ဂများစွာက ရဲများသည် ဆန္ဒပြသူများအပေါ် မမျှတသောအင်အားကို အသုံးပြုခဲ့သည်ဟု စွပ်စွဲခဲ့ကြသည်။
ရဲတပ်ဖွဲ့သည် ၎င်းတို့စတင်ကတည်းက ရက်စက်ကြမ်းကြုတ်မှုစွပ်စွဲချက် ၁၀ ခုကို စုံစမ်းစစ်ဆေးမှုများ စတင်ခဲ့ကြောင်း ပြည်ထဲရေးဝန်ကြီး လောရင့် နူနက်ဇ်က အောက်တိုဘာလ ၅ ရက်နှောင်းပိုင်းတွင် ပြောကြားခဲ့သည်။
ပညာရေးဝန်ကြီးဌာန၏ အဆိုအရ လှုပ်ရှားမှုစတင်ချိန်မှစ၍ ကျောင်း ၂၄ ကျောင်း မီးရှို့ခံရခြင်း သို့မဟုတ် လုယက်ခံရခြင်းတို့ ဖြစ်ပွားခဲ့ကြောင်းလည်းသိရသည်။ ဝန်ကြီးချုပ်ရုံးက ဆရာ၊ ဆရာမ ၈၅ ဦးလည်း ဒဏ်ရာရရှိခဲ့ကြောင်း ပြောကြားခဲ့သည်။ ဝန်ကြီးချုပ်သည် ဆရာ၊ ဆရာမများ ပျောက်ဆုံး နေခြင်းနှင့် ယိုယွင်းနေသော အဆောက်အအုံများကို ပြန်လည်ပြုပြင်ခြင်းဆိုင်ရာ ပြဿနာကို ဖြေရှင်းရန် ကြိုးပမ်းလျက်ရှိသည်။
Ref: CNA
About the Author
