၁၀.၆.၂၀၂၆
Written by Linn Eain
မြန်မာ့ဂန္ထဝင် ရုပ်ရှင်ဖလင်ဟောင်းများ ပျက်စီးဆုံးရှုံးမှုမရှိစေရန် နောက်ဆုံးပေါ်နည်းပညာများအသုံးပြု၍ Digital Restoration အဆင့်သို့ မြှင့်တင်နိုင်ရေး အိန္ဒိယနိုင်ငံမှ Prasad Group နှင့် ပြန်ကြားရေးဝန်ကြီးဌာနတို့ ဆွေးနွေးခဲ့ကြောင်း သိရသည်။
အဆိုပါ တွေ့ဆုံဆွေးနွေးပွဲကို နေပြည်တော်ရှိ ပြန်ကြားရေးဝန်ကြီးဌာနတွင် ဇွန် ၉ ရက်က ပြုလုပ်ခဲ့ပြီး ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ တာဝန်ရှိသူများ၊ Prasad Group မှ Chief Executive Officer Dr.Prasad Rao Pasam နှင့်အဖွဲ့တို့ တက်ရောက်ခဲ့ကြောင်း သိရသည်။
ထိုသို့ ဆွေးနွေးရာတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ရုပ်ရှင်မြှင့်တင်ရေးဌာနခွဲရှိ ဖလင်ပိဋကတ်တိုက်၌ ထိန်းသိမ်းထားရှိသော မြန်မာ့ရုပ်ရှင်ဖလင်များ၊ သတင်းမှတ်တမ်းဖလင်များအား စနစ်တကျထားသိုထိန်းသိမ်းခြင်း၊ ခေတ်မီဒီဂျစ်တယ်စနစ်များဖြင့် ရေရှည်ထိန်းသိမ်းထားသိုမည့် နည်းလမ်းများ၊ မြန်မာ့ဂန္ထဝင် ရုပ်ရှင်ဖလင်ဟောင်းများ ပျက်စီး ဆုံးရှုံးမှုမရှိစေရန် နောက်ဆုံးပေါ်နည်းပညာများအသုံးပြု၍ Digital Restoration အဆင့်သို့ မြှင့်တင်နိုင်ရေးကိစ္စရပ်များ၊ ရေရှည်ပူးပေါင်း ဆောင်ရွက်သွားနိုင်ရေးကိစ္စရပ်များ ဆွေးနွေးခဲ့ကြောင်း သိရသည်။
Prasad Corporation Limited သည် အိန္ဒိယနိုင်ငံ ချန်နိုင်းမြို့တွင် အခြေစိုက်ပြီး ၁၉၅၆ ခုနှစ်တွင် အိန္ဒိယဂန္ထဝင် ရုပ်ရှင်ဒါရိုက်တာ၊ ထုတ်လုပ်သူနှင့် သရုပ်ဆောင် L. V. Prasad က စတင်တည်ထောင်ခဲ့ကြောင်း သိရသည်။
About the Author
