လာမည့် ဇူလိုင်လတွင်ကျင်းပမည့် အာဆီယံထိပ်သီးအစည်းအဝေး၏ အလွတ်သဘောဆွေးနွေးပွဲတွင် မြန်မာနိုင်ငံကို ပါဝင်ခွင့်ပြုရန် အာဆီယံ စီစဉ်နေ

သက်တံ့
၉. ၅. ၂၀၂၆

လာမည့် ဇူလိုင်လတွင် ကျင်းပမည့် အာဆီယံနိုင်ငံခြားရေးဝန်ကြီးများ အစည်းအဝေး၏ အလွတ်သဘောဆွေးနွေးပွဲတစ်ခုတွင် မြန်မာနိုင်ငံ၏ ထိပ်တန်းသံတမန်ကို ဗီဒီယိုစနစ်ဖြင့် တက်ရောက်ခွင့်ပြုရန် အာဆီယံက စီစဉ်နေကြောင်း အခြေအနေကို သိရှိသည့် သတင်းရင်းမြစ်များ၏ သောကြာနေ့က ပြောကြားချက်အရ သိရသည်။

၂၀၂၁ ခုနှစ် ဖေဖော်ဝါရီလ အာဏာထိန်းသိမ်းမှုနောက်ပိုင်း ထိုနှစ် အောက်တိုဘာလမှစ၍ အာဆီယံသည် မြန်မာခေါင်းဆောင်များကို အစည်းအဝေးများ တက်ရောက်ခွင့် မပြုခဲ့ပေ။ သို့သော် ပြီးခဲ့သည့်လက တာဝန်ယူခဲ့သည့် ဦးမင်းအောင်လှိုင် ဦးဆောင်သော အစိုးရသစ်နှင့်အညီ အာဆီယံက ထိတွေ့ဆက်ဆံရေးဆိုင်ရာ ပြန်လည်ညှိနှိုင်းမှုများ လုပ်ဆောင်လာခြင်း ဖြစ်သည်။

စီဘူးမြို့တွင် သောကြာနေ့က ကျင်းပသည့် ထိပ်သီးအစည်းအဝေး၌ မြန်မာနိုင်ငံမှလွဲ၍ ကျန်အဖွဲ့ဝင် ၁၁ နိုင်ငံ (အရှေ့တီမောအပါအဝင်) မှ ခေါင်းဆောင်များသည် ရေကြောင်းပူးပေါင်းဆောင်ရွက်ရေးနှင့် အမေရိကန်-အစ္စရေးတို့၏ အီရန်အပေါ် တိုက်ခိုက်မှုကြောင့် ဖြစ်ပေါ်လာသည့် စွမ်းအင် အကျပ်အတည်းအပေါ် ဒေသတွင်း တုံ့ပြန်ဆောင်ရွက်မှုများကို ဆွေးနွေးခဲ့ကြကြောင်း ဖိလစ်ပိုင်သမ္မတ ဖာဒီနန် မားကို့စ် ဂျူနီယာက ပြောကြားသည်။ ရေနံရရှိမှု သေချာစေရေးအတွက် ပူးပေါင်းဆောင်ရွက်ရန် ကိစ္စရပ်များလည်း ပါဝင်သည်။

ထိပ်သီးအစည်းအဝေးမတိုင်မီ ပြုလုပ်သည့် နိုင်ငံခြားရေးဝန်ကြီးများ အစည်းအဝေးတွင် ထိုင်းနိုင်ငံက မြန်မာနိုင်ငံကို ဇူလိုင်လ အစည်းအဝေးတွင် ပါဝင်ခွင့်ပြုရန် အဆိုပြုခဲ့သော်လည်း မြန်မာနိုင်ငံခြားရေးဝန်ကြီးကို ပင်မအစည်းအဝေးသို့ ကိုယ်တိုင်ကိုယ်ကျ တက်ရောက်စေမည့်အပေါ် စင်ကာပူနိုင်ငံက ကန့်ကွက်ခဲ့ကြောင်း သတင်းရင်းမြစ်များက ဆိုသည်။

၂၀၂၁ အာဏာအငြင်းပွားမှုနောက်ပိုင်း အာဆီယံသည် မြန်မာနိုင်ငံနှင့် ဆက်ဆံရေးကို ဆက်လက်ထိန်းသိမ်းထားသော် လည်း၊ မြန်မာ့ပဋိပက္ခအပေါ် စိုးရိမ်ပူပန်မှုများကို အကြိမ်ကြိမ် ဖော်ပြခဲ့သည်။ ထို့အပြင် အကြမ်းဖက်မှုများ ရပ်တန့်ရန်နှင့် သက်ဆိုင်သူအားလုံးနှင့် တွေ့ဆုံရန် အာဆီယံ အထူးသံတမန် စေလွှတ်ခြင်း အပါအဝင် “ဘုံသဘောတူညီချက် ၅ ချက်” ကို အကောင်အထည်ဖော်ရန် စစ်ခေါင်းဆောင်မှုကို တိုက်တွန်းထားသည်။

ယခုနှစ် အာဆီယံ အလှည့်ကျဥက္ကဋ္ဌဖြစ်သလို အာဆီယံ မြန်မာနိုင်ငံဆိုင်ရာ အထူးသံတမန်အဖြစ်လည်း တာဝန်ယူထားသည့် ဖိလစ်ပိုင် နိုင်ငံခြားရေးဝန်ကြီးကမူ မြန်မာ့အရေးကို အဓိကထားမည့် ဇူလိုင်လ ထိပ်သီးအစည်းအဝေး၏ အလွတ်သဘောဆွေးနွေးပွဲတွင် မြန်မာနိုင်ငံခြားရေးဝန်ကြီးက ဗီဒီယိုစနစ်ဖြင့် ပါဝင်လာမည့်အပေါ် ကန့်ကွက်သူ မရှိကြောင်း ပြောကြားခဲ့သည်ဟု သိရသည်။

အာဆီယံတွင် ဘရူနိုင်း၊ ကမ္ဘောဒီးယား၊ အရှေ့တီမော၊ အင်ဒိုနီးရှား၊ လာအို၊ မလေးရှား၊ မြန်မာ၊ ဖိလစ်ပိုင်၊ စင်ကာပူ၊ ထိုင်းနှင့် ဗီယက်နမ်နိုင်ငံတို့ ပါဝင်သည်။

Ref : The Mainichi