တရုတ်ဇနီးမယားအဖြစ်ရောင်းစားခံရပြီးမှ ထွက်ပြေးလာသည့် အမျိုးသမီးတစ်ဦး တရားမဝင် ဝင်ရောက်မှုအတွက် တရုတ်နိုင်ငံတွင် ထောင်ဒဏ်နှစ်လချမှတ်ခံရပြီးနောက် မြန်မာနိုင်ငံသို့ ပြန်လည်လွှဲပြောင်း၊ ၎င်းအား တရုတ်ဇနီးမယားအဖြစ် ရောင်းစားခဲ့သူများကိုလည်း လူကုန်ကူးမှုဥပဒေဖြင့် အလုပ်နှင့် ထောင်ဒဏ် ၁၅ နှစ်ချမှတ်

၃၁.၃.၂၀၂၆
Written by Linn Eain

တရုတ်ဇနီးမယားအဖြစ်ရောင်းစားခံရပြီးမှ နှိပ်စက်မှုများကြောင့် ထွက်ပြေးလာသည့် အမျိုးသမီးတစ်ဦးကို တရားမဝင် ဝင်ရောက်မှုအတွက် တရုတ်နိုင်ငံတွင် ထောင်ဒဏ်နှစ်လချမှတ်ခံရပြီးနောက် မြန်မာနိုင်ငံသို့ ပြန်လည်လွှဲပြောင်းပေးခံရကြောင်း မြန်မာနိုင်ငံရဲတပ်ဖွဲ့မှ သိရသည်။

အဆိုပါ လူကုန်ကူးခံရသည့် အမျိုးသမီးကို တရုတ်ဇနီးမယားအဖြစ် ရောင်းစားခဲ့သူများအား ကျိုင်းတုံခရိုင်တရားရုံးက မတ်လ ၂၆ ရက်တွင် လူကုန်ကူးမှုတားဆီးနှိမ်နှင်ရေးဥပဒေဖြင့် အလုပ်နှင့် ထောင်ဒဏ် ၁၅ နှစ်ချမှတ်ခဲ့ကြောင်းလည်း သိရသည်။

ဖြစ်စဉ်မှာ မန္တလေးတိုင်းဒေသကြီး၊ ပုသိမ်ကြီးမြို့နယ်၊ မကျီးပင်စောက်ကျေးရွာနေ အမျိုးသမီးတစ်ဦးသည် ခင်ပွန်းဖြစ်သူနှင့် စကားများရန်ဖြစ်ပြီး အလုပ်လုပ်ကိုင်ရန် လေယာဉ်ဖြင့် ကျိုင်းတုံမြို့သို့ ရောက်ရှိနေစဉ် ရှမ်းပြည်နယ်၊ ကျိုင်းတုံမြို့၊ ယန်းခမ်းကားကြီးဝင်းနေ အိမူမူအောင် (ခ) သဲသဲက မိုင်းပေါက်မြို့ရှိ ပွဲစားဒေါ်အိနှင့် ချိတ်ဆက်ပေးမည်၊ တရုတ်အငှားမယားလုပ်မည်ဆိုပါက မိုင်းပေါက်မြို့သို့ သွားရောက်ရမည်၊ တင်တောင်းငွေ ယွမ် ၁၅၀၀၀ ရရှိမည်ဖြစ်ကြောင်း ပြောဆိုစည်းရုံးခဲ့သဖြင့် သဘောတူပြီး ၂၀၂၅ ခုနှစ်၊ ဇူလိုင်တွင် အိမူမူအောင် (ခ) သဲသဲက ကျိုင်းတုံမှ မိုင်းပေါက်မြို့သို့ ပို့ဆောင်ခဲ့ရာ ပွဲစား ဒေါ်အိထံသို့ ရောက်ရှိခဲ့ကြောင်း သိရသည်။

ထို့နောက် ဒေါ်အိက တရုတ်ပွဲစားများထံ ၎င်း၏ ဓာတ်ပုံများ ပို့ပေးခဲ့ရာမှ လာရောက်ကြည့်ရှုကြပြီး တရုတ်ပွဲစားများက ဒေါ်အိကို တရုတ်ငွေများပေးနေသည်ကို တွေ့ရှိရကြောင်း၊ မည်မျှပေးသည်ကို မသိရှိကြောင်းနှင့် တရုတ်ပြည်ရှိ တရုတ်အမျိုးသားနှင့် လက်ထပ်ပြီးပါက တင်တောင်းငွေ တရုတ်ယွမ် ၁၅၀၀၀ ရရှိမည်ဟု ဒေါ်အိနှင့် အိမူမူအောင် (ခ) သဲသဲတို့က ပြောဆိုခဲ့ကြကြောင်း သိရသည်။

ယင်းနောက် တရုတ်ပွဲစားများနှင့်အတူ တောလမ်းများမှ သွားရောက်ခဲ့ရာ တရုတ်ပြည်ရှိ အမည်မသိရွာတစ်ရွာသို့ ရောက်ရှိခဲ့ပြီး ထိုရွာရှိ တရုတ်နိုင်ငံသား “ဝ” အမျိုးသား အဲကားဆိုသူနှင့် လက်ထပ်ခဲ့ရကြောင်း၊ တင်တောင်းငွေမရသဖြင့် သားမယားအဖြစ် နေထိုင်ရန်ပြောဆိုမှုကို ငြင်းဆန်ခဲ့ရာ ပွဲစားများထံမှ ဝယ်ယူပြီးဖြစ်၍ ကလေးမွေးပြီးမှသာ ပြန်ခိုင်းမည်ဖြစ်ကြောင်း ပြောဆို၍ သားမယားအဖြစ် နေထိုင်ခဲ့ကြောင်း သိရသည်။

ထိုသို့ သားမယားအဖြစ်နေထိုင်ရန် ငြင်းဆန်သည့်နေ့များတွင် အခန်းတွင်း တံခါးပိတ်ပြီး ခြေဖြင့်ကန်ခြင်း၊ ကြိုးဖြင့် ရိုက်နှက်ခြင်းများပြုလုပ်ခဲ့သဖြင့် အဲကား တောင်ယာသို့သွားစဉ် နေအိမ်မှ ထွက်ပြေးပြီး လျန်စန်းရဲစခန်းသို့ရောက်ရှိခဲ့ကြောင်း၊ တရားမဝင် ဝင်ရောက်မှုအတွက် ထောင်ဒဏ် နှစ်လနှင့် နှစ်ရက်ချမှတ်ခံခဲ့ရပြီးနောက် မြန်မာနိုင်ငံနယ်စပ်သို့ ပြန်လည်လွှဲပြောင်းပေးခဲ့ကြောင်း စိစစ်ပေါ်ပေါက်သဖြင့် အမှတ် (၁၈) လူကုန်ကူးမှုတားဆီး နှိမ်နင်းရေး ရဲတပ်ဖွဲ့စု (ကျိုင်းတုံ) မှ တရားလိုပြုလုပ်တိုင်တန်းခဲ့ကြောင်း သိရသည်။

အဆိုပါဖြစ်စဉ်ကို ကျိုင်းတုံမြို့မရဲစခန်းတွင် (ပ) ၁၆၇/၂၀၂၅၊ လူကုန်ကူးမှုတားဆီးနှိမ်နင်းရေး ဥပဒေပုဒ်မ ၃၅ ဖြင့် အမှုရေးဖွင့် တရားစွဲတင်ခဲ့ပြီး ကျိုင်းတုံခရိုင် တရားရုံးက လူကုန်ကူးမှုကျူးလွန်သူ အိမူမူအောင်(ခ) သဲသဲကို မတ်လ ၂၆ ရက်က လူကုန်ကူးမှု တားဆီးနှိမ်နင်းရေးဥပဒေပုဒ်မ ၃၅ ဖြင့် အလုပ်နှင့် ထောင်ဒဏ် ၁၅ နှစ် ကျခံစေရန် အမိန့်ချမှတ်ခဲ့ကာ တိမ်းရှောင်တရားခံ ဒေါ်အိကို လူကုန်ကူးမှုတားဆီးနှိမ်နင်းရေး ဥပဒေပုဒ်မ ၃၅/ကျင့် ၅၁၂ အရ ကျင့် ၈၇/၈၈ ထုတ်ဆင့်ကာ ၀ရမ်းပြေးအဖြစ် ထုတ်ဆင့်ကြေညာခဲ့ကြောင်း သိရသည်။