စုံ ရက်၊ မ ရက်ခွဲခြား၍ မော်တော်ယာဉ်မောင်းနှင်သည့်စနစ်နှင့် ပတ်သက်၍ ဌာနဆိုင်ရာပူးပေါင်းအဖွဲ့များက ရန်ကုန်မြို့တွင် အသိပညာပေးခြင်းများဆောင်ရွက်

၁၁.၃.၂၀၂၆
Written by Nay Yaung Lin

စုံ ရက်၊ မ ရက်ခွဲခြား၍ မော်တော်ယာဉ်မောင်းနှင်သည့်စနစ်နှင့် ပတ်သက်၍ ဌာနဆိုင်ရာပူးပေါင်းအဖွဲ့များက မတ် ၁၁ ရက်၊ ညနေပိုင်းက ရန်ကုန်မြို့တွင် အသိပညာပေးလုပ်ငန်းများ ဆောင်ရွက်ခဲ့ကြသည်။

ထိုသို့ အသိပညာပေးခြင်းကာလမှာ မတ် ၇ ရက်မှ မတ် ၁၃ ရက်ထိ တစ်ပတ်သတ်မှတ်ထားပြီး မတ် ၁၄ ရက်မှစတင်ကာ သက်ဆိုင်ရာစည်းမျဉ်းဥပဒေများနှင့်
အရေးယူမည်ဖြစ်ကြောင်း ကနဦး သိရသည်။

အဆိုပါ အသိပညာပေးဆောင်ရွက်သည့် ဌာနဆိုင်ရာပူးပေါင်းအဖွဲ့တွင် မြို့နယ် ထွေ/အုပ်၊ ရဲ၊ ယာဉ်ထိန်းရဲနှင့် အခြားဌာနဆိုင်ရာများပါဝင်ကြောင်း သိရသည်။

စက်သုံးဆီခြိုးခြံချွေတာရေးနှင့် ဖူလုံမှုရှိစေရေးအတွက် ပုဂ္ဂလိကပိုင်ယာဉ်များ စုံ ရက်၊ မ ရက်ဖြင့်သာ တစ်ရက်ခြားမောင်းနှင်ရမည့် စနစ်ကို မတ် ၇ ရက်တွင် စတင်ခဲ့ပြီး စည်းကမ်းသတ်မှတ်ချက်များမှာ လစဉ် “စုံ” ရက်များတွင် စုံနံပါတ်အက္ခရာပါသောယာဉ်များ (ဥပမာ- 2A/—- 4A/—စသည်ဖြင့်)၊ “မ” ရက်များတွင် မနံပါတ်အက္ခရာပါသော ယာဉ်များ (ဥပမာ- 1A/—-3A/—- စသည်ဖြင့်) စသည့် ပုဂ္ဂလိကပိုင်ယာဉ်များသာ မောင်းနှင်အသုံးပြုရန်ဖြစ်သည်။

သို့သော် နေ့စဉ်အများပြည်သူသယ်ယူပို့ဆောင်ရေး မော်တော်ယာဉ်များ၊ အငှားယာဉ်များ (Taxi)၊ စက်သုံးဆီသယ်ယူပို့ဆောင်သည့်ယာဉ်များ၊ ဆောက်လုပ်ရေးလုပ်ငန်းသုံးယာဉ်များ၊ ကုန်စည်ပို့ဆောင်ရေးယာဉ်များ၊ လူနာတင်ယာဉ်/နိဗ္ဗာန်ယာဉ်များနှင့် စည်ပင်အမှိုက်သိမ်းယာဉ်များ အသုံးပြုနိုင်ကြောင်း အသိပေးထားသည်။

ဆက်လက်၍ မတ် ၄ ရက်တွင် ဖြည့်စွက်ထုတ်ပြန်ချက်အနေဖြင့် စက်ရုံ၊ အလုပ်ရုံ၊ အလုပ်ဌာနများအတွက် ဝန်ထမ်းကြိုပို့ယာဉ်များ၊ ကုန်စည်ဖြန့်ဖြူးရေးတွင်အသုံးပြုသည့်ယာဉ်များ၊ စက်ရုံ၊ အလုပ်ရုံ၊ အလုပ်ဌာနများအတွက်ရုံးလုပ်ငန်းအသုံးပြုသည့်ယာဉ်များ၊ ကျောင်းကြို/ပို့ယာဉ်များကိုလည်း နေ့စဉ်အသုံးပြုနိုင်ကြောင်း ထုတ်ပြန်ထားသည်။

အဆိုပါ နေ့စဉ်အသုံးပြုသည့် မော်တော်ယာဉ်များအနေဖြင့် အကြောင်းကိစ္စများအတွက် သုံးစွဲသည်မှာ မှန်ကန်ကြောင်း ယာဉ်ပေါ်တွင် စီးနင်းလိုက်ပါသူများတွင် လည်းကောင်း၊ ယာဉ်များတွင်လည်းကောင်း သက်ဆိုင်ရာ အလုပ်ဌာနများ၏ ခိုင်လုံသည့်အထောက်အထား သို့မဟုတ် ထောက်ခံချက်များ ပါရှိရမည်ဖြစ်ကြောင်း သိရသည်။

ထို့ပြင် ‎စုံ၊မ အက္ခရာခွဲခြားပြီး ယာဉ်အသွားလာခွင့်ပြုထားသော်လည်း တက္ကသိုလ်ဝင်စာမေးပွဲဖြေဆိုနေသည့်ကာလအတွင်း စာမေးပွဲတာဝန်ခံယာဉ်များနှင့် ကျောင်းသား ကြို/ပို့ယာဉ်များ “စာမေးပွဲတာဝန်” (သို့) “ Car Pass” ကတ်ပြားများ ကားရှေ့မှန်တွင်ကပ်ပြီး ပုံမှန်အတိုင်း သွားလာခွင့်ပြုထားသည်။