ဟိုတယ်ဆောက်လုပ်ရေးလုပ်ငန်းခွင်ကို ထိုင်းအာဏာပိုင်များ စစ်ဆေးဖမ်းဆီးမှုအတွင်း ထွက်ပြေးရန် အသည်းအသန် ကြိုးပမ်းခဲ့သည့် မြန်မာနှင့် တရုတ် တရားမဝင်လုပ်သားရှစ်ဦး ဖမ်းဆီးရမိ

သက်တံ့
၆. ၃. ၂၀၂၆

ထိုင်းနိုင်ငံ၊ ချွန်ဘူရီခရိုင် အာဏာပိုင်များသည် ပတ္တရားမြို့၊ ဂျွန်တီယမ်ကမ်းခြေအနီးရှိ ဟိုတယ်ဆောက်လုပ်ရေးခွင်တစ်ခုကို ဝင်ရောက်စီးနင်းခဲ့ရာ တံတိုင်းများပေါ်တက်၍ ထွက်ပြေးရန်နှင့် အဆောက်အအုံအတွင်း ပုန်းအောင်းရန် ကြိုးပမ်းခဲ့ကြသည့် တရားမဝင် နိုင်ငံခြားသားအလုပ်သမား ၈ ဦးကို ဖမ်းဆီးရမိခဲ့သည်။

အဆိုပါ စစ်ဆေးမှုကို မတ်လ ၄ ရက်နေ့တွင် ချွန်ဘူရီခရိုင် အလုပ်အကိုင်ခန့်ထားရေးရုံးမှ တာဝန်ရှိသူများ၊ ပြည်တွင်းလုံခြုံရေး စစ်ဆင်ရေးဌာနချုပ် (ISOC) နှင့် ချွန်ဘူရီ လူဝင်မှုကြီးကြပ်ရေးရုံးတို့ ပူးပေါင်း၍ ဂျွန်တီယမ် လမ်းသွယ် ၁၃ (Soi Jomtien 13) ရှိ ၈ ထပ်အမြင့်ရှိ ဟိုတယ်စီမံကိန်း ဆောက်လုပ်ရေးခွင်၌ ပြုလုပ်ခဲ့ခြင်း ဖြစ်သည်။

အဆိုပါစီမံကိန်းသည် ထိုင်ဝမ်ရင်းနှီးမြှုပ်နှံသူများ၏ ကျောထောက်နောက်ခံပြုမှုဖြင့် လုပ်ဆောင်နေပြီး အလုပ်လုပ်ကိုင်ခွင့် (Work Permit) မရှိသော တရုတ်နှင့် မြန်မာနိုင်ငံသား အများအပြားကို အလုပ်ခန့်ထားကြောင်း အွန်လိုင်းတွင် သတင်းများ ထွက်ပေါ်လာပြီးနောက် အာဏာပိုင်များက သွားရောက်စစ်ဆေးခဲ့ခြင်း ဖြစ်သည်။

အရာရှိများ စစ်ဆေးရန် ရောက်ရှိလာချိန်တွင် အလုပ်သမားအချို့မှာ ထိတ်လန့်တကြားဖြစ်ကာ ၅ မီတာခန့် မြင့်သော တံတိုင်းကို ကျော်တက်၍ အနီးနားရှိ မြက်ရိုင်းတောများအတွင်းသို့ ထွက်ပြေးရန် ကြိုးပမ်းခဲ့ကြသည်။ အရာရှိများကလည်း အဆောက်အအုံတစ်ခုလုံးကို ပိတ်ဆို့ရှာဖွေခဲ့ကြသည်။

အလုပ်သမားအချို့မှာ အဖမ်းမခံရစေရန် ကျဉ်းမြောင်းသော နေရာများ၊ အမိုးပေါ်နှင့် ပုဆိုး/အဝတ်များ ပတ်ထားသည့် ထမင်းစားစားပွဲများ အောက်တွင်ပင် ပုန်းအောင်းခဲ့ကြသော်လည်း အာဏာပိုင်များက အားလုံးကို ရှာဖွေတွေ့ရှိခဲ့သည်။

စစ်ဆေးမှုအတွင်း စုစုပေါင်း တရားမဝင် အလုပ်သမား ၈ ဦး (တရုတ်အမျိုးသား ၄ ဦးနှင့် မြန်မာနိုင်ငံသား အမျိုးသား ၂ ဦး၊ အမျိုးသမီး ၂ ဦး) ကို ဖမ်းဆီးရမိခဲ့သည်။ ထို့အပြင် လုပ်ငန်းခွင်ရှိ အခြားသော ရွှေ့ပြောင်းအလုပ်သမား ၄၅ ဦး (အမျိုးသား ၃၈ ဦး၊ အမျိုးသမီး ၇ ဦး) ကိုလည်း စစ်ဆေးခဲ့ရာ ၎င်းတို့တွင် တရားဝင် အလုပ်လုပ်ကိုင်ခွင့်လက်မှတ်များ ရှိနေသဖြင့် ဆက်လက်အလုပ်လုပ်ကိုင်ခွင့် ပြုခဲ့သည်။

ဖမ်းဆီးရမိသည့် တရားမဝင်အလုပ်သမား ၈ ဦးလုံးကို ထိန်းသိမ်းထားပြီး ဥပဒေအရ အရေးယူနိုင်ရန်အတွက် ပတ္တရားမြို့မ ရဲစခန်းသို့ လွှဲပြောင်းပေးအပ်ခဲ့သည်။

ယင်းစစ်ဆင်ရေးအတွင်း၌ပင် အာဏာပိုင်များသည် Chaiyaphruek 2 လမ်းတစ်လျှောက်ရှိ ဖျော်ရည်ဆိုင် (Smoothie Shop) တစ်ခုကိုလည်း စစ်ဆေးခဲ့သည်။ ထိုဆိုင်တွင် လာအိုအမျိုးသမီးတစ်ဦးသည် ၎င်းအား ခွင့်ပြုထားသည့် အလုပ်အမျိုးအစား ပြင်ပတွင် လုပ်ကိုင်နေသည်ကို တွေ့ရှိခဲ့ရပြီး ယင်းမှာ ထိုင်းနိုင်ငံ၏ နိုင်ငံခြားသားအလုပ်သမား စည်းမျဉ်းများကို ချိုးဖောက်ခြင်း ဖြစ်သည်။

အဆိုပါ လာအိုအမျိုးသမီးကိုလည်း ဖမ်းဆီးကာ ထိုင်းနိုင်ငံ၏ နိုင်ငံခြားသား အလုပ်သမား စီမံခန့်ခွဲမှုဆိုင်ရာ အရေးပေါ်အမိန့် (၂၀၁၇) အရ အမှုဖွင့်ရန် နောင်ပရူး (Nongprue) ရဲစခန်းသို့ ပို့ဆောင်ခဲ့သည်။

ချွန်ဘူရီခရိုင် အလုပ်အကိုင်ခန့်ထားရေးရုံးမှ အရာရှိများက ဥပဒေအရ အရေးယူရန်အတွက် ယခုနေရာနှစ်ခုလုံးနှင့် ဆက်စပ်နေသော အလုပ်ရှင်များကို လိုက်လံစုံစမ်းနေကြောင်း ပြောကြားခဲ့သည်။ ထို့အပြင် ချွန်ဘူရီခရိုင်အတွင်း တရားမဝင် နိုင်ငံခြားသား အလုပ်သမားများကို စစ်ဆေးခြင်းနှင့် နှိမ်နင်းခြင်းများကို တရားဥပဒေစိုးမိုးရေးအတွက် တင်းတင်းကျပ်ကျပ်နှင့် ပုံမှန်ဆက်လက် လုပ်ဆောင်သွားမည်ဖြစ်ကြောင်း အာဏာပိုင်များက ထပ်လောင်းအတည်ပြုခဲ့သည်။

Ref : Pattaya Mail