မြန်မာနိုင်ငံ မြောက်ပိုင်း ကိုးကန့်လိမ်လည်မှုဂိုဏ်းကို တရုတ်တရားရုံးက ပထမအဆင့် ပြစ်ဒဏ်ကြေညာပြီးနောက် ခေါင်းဆောင်ကို ဆိုင်းငံ့ ၂ နှစ် သေဒဏ်ပေး

MT News
၃၁. ၁. ၂၀၂၆

တရုတ်နိုင်ငံသားများကို ပစ်မှတ်ထားသည့် မြန်မာနိုင်ငံ မြောက်ပိုင်းရှိ ရာဇဝတ်မှုများကျူးလွန်ခြင်းအတွက် ရွှီဖားချီ ရာဇဝတ်မှုကျူးလွန်မှုတွင် ရွှီ (ရွှီလောင်ဖားဟု လူသိများသူ) ကို တရုတ်တရားရုံးက သေဒဏ် ၂ နှစ်ဆိုင်းငံ့ပြစ်ဒဏ်ဖြင့် ဇန်နဝါရီ ၃၀ ရက်၌ ပထမအဆင့် စီရင်ချက်ချမှတ်ခဲ့ကြောင်း သိရသည်။

၂၀၁၉ ခုနှစ်မှစ၍ စုံစမ်းစစ်ဆေးဖော်ထုတ်ချက်များအရ ရွှီခေါင်းဆောင်သော ရာဇဝတ်ဂိုဏ်းသည် မြန်မာနိုင်ငံ မြောက်ပိုင်း ကိုးကန့်ဒေသတွင် ၎င်း၏အရှိန်အဝါကြီးမားမှုကို အသုံးချကာ ဆက်သွယ်ရေးလိမ်လည်သောအုပ်စုများနှင့် ပူးပေါင်းလုပ်ဆောင်ခဲ့ကြခြင်း ဖြစ်သည်။ ထိုအုပ်စုသည် လောင်းကစားရုံအများအပြား တည်ဆောက်ကာ လူပုဂ္ဂိုလ် အမြောက် အမြားကို စုဆောင်းခဲ့ရာ တရုတ်နိုင်ငံသားများကို ပစ်မှတ်ထားသည့် ဆက်သွယ်ရေးနှင့် အွန်လိုင်းလိမ်လည်မှုများကျူးလွန်ခဲ့ကြောင်း၊ ယင်းသို့ဖြင့် တရားမဝင်ရရှိသော ငွေကြေးပမာဏမှာ ယွမ် ၁ ဒသမ ၁ ဘီလျံကျော် (အမေရိကန်ဒေါ်လာ သန်း ၁၅၈ ခန့်) ရှိခဲ့ကြောင်း သိရသည်။

၎င်းတို့သည် ဆက်သွယ်ရေးလိမ်လည်မှုအဖွဲ့များနှင့် ပူးပေါင်းကာ အဖွဲ့အတွင်းရှိ လိုက်နာမှုမရှိသော ကနဦးအဆင့်အဖွဲ့ဝင်များကို ရည်ရွယ်ချက်ရှိရှိ ထိခိုက်နာကျင်အောင် လုပ်ဆောင်ခဲ့ရာ လူတစ်ဦးသေဆုံးပြီး တစ်ဦးမှာ ဒဏ်ရာအနည်းငယ်ရရှိခဲ့ကြောင်း သိရသည်။ ထို့ပြင် ရွှီသည် အခြားပြစ်မှုကျူးလွန်သောအဖွဲ့များနှင့် ချိတ်ဆက်ကာ မှောင်ခိုကူးခြင်းနှင့် မူးယစ်ဆေးဝါးရောင်းဝယ်ဖောက်ကားခြင်းများလည်း ပြုလုပ်ခဲ့သည်။

အဆိုပါ ပြစ်မှုကျူးလွန်သူများ၏ အမှုများတွင် လိမ်လည်မှု၊ ရည်ရွယ်ချက်ရှိရှိ ထိခိုက်နာကျင်စေမှု၊ မှောင်ခိုကူးမှုနှင့် မူးယစ်ဆေးဝါးရောင်းဝယ်ဖောက်ကားမှု ပါအဝင် ပြစ်မှုခြောက်ခုလည်း ပါဝင်ကြောင်း ချုံချင့်မြို့၏ အမှတ် ၅ အလယ်တန်းအဆင့် ပြည်သူ့တရားရုံးက ဆုံးဖြတ်ခဲ့သည်။

အခြား ပြစ်မှုကျူးလွန်သူများဖြစ်သည့် ကျန်းလုန်လုန်၊ လောယွိကျွင်း၊ ရှီခန်းချန်နှင့် လျိုစစ်ပင်းတို့ကိုလည်း ထောင်ဒဏ် တစ်သက်တစ်ကျွန်းပြစ်ဒဏ်မှ ထောင်ဒဏ် ၂၅ နှစ်အထိ ချမှတ်သည့်အပြင် ပိုင်ဆိုင်မှုသိမ်းယူခြင်းနှင့် ငွေဒဏ်များ အပါအဝင် အခြားထပ်တိုးပြစ်ဒဏ်များလည်း ချမှတ်ခဲ့ကြောင်း သိရသည်။

တရုတ်နိုင်ငံသည် ဇန်နဝါရီ ၂၉ ရက်ကလည်း ဆက်သွယ်ရေးလိမ်လည်မှုကွင်းဆက်များ၏ အဓိကပုဂ္ဂိုလ်များ အပါအဝင် မြန်မာနိုင်ငံ မြောက်ပိုင်းရှိ မြီမိသားစု ရာဇဝတ်ဂိုဏ်းအဖွဲ့ဝင် ၁၁ ဦးကိုလည်း သေဒဏ်စီရင်ခဲ့သည်။

အဆိုပါ ၁၁ ဦးကို ရည်ရွယ်ချက်ရှိရှိ လူသတ်မှု၊ ရည်ရွယ်ချက်ရှိရှိ ဒဏ်ရာရရှိစေမှု၊ တရားမဝင်ချုပ်နှောင်ဖမ်းဆီးခြင်း၊ လိမ်လည်ခြင်းနှင့် လောင်းကစားရုံများတည်ထောင်လုပ်ကိုင်ခြင်း စသည့်အမှုများအပါအဝင် ပြစ်မှုများအတွက် ၂၀၂၅ ခုနှစ် စက်တင်ဘာလက ပထမဆုံးအကြိမ် သေဒဏ်ချမှတ်ခဲ့ပြီးနောက် စီရင်ခဲ့ခြင်းဖြစ်သည်။

Ref: Xinhua