‎OWIC လက်ဝယ်ကိုင်ဆောင်ထားသူများ အလုပ်သမား ညွှန်ကြားရေးဦးစီးဌာန၏ ခွင့်ပြုချက်ရယူပြီးမှသာ ပြည်ပသို့ပြန်လည်ထွက်ခွာရန် ထပ်မံအသိပေး

‎◾️ လေဆိပ်များမှ ပေးပို့လာသည့်စာရင်းများအရ မိမိအစီအစဉ်ဖြင့် ခွင့်ပြန် OWIC လက်ဝယ်ရှိပြီးသူများ သတ်မှတ်စည်းကမ်းချက်များ လိုက်နာခြင်းမရှိဘဲ ပြည်ပသို့ထွက်ခွာနေကြောင်း စိစစ်တွေ့ရှိရ

‎
‎၁၃.၁.၂၀၂၆
‎Written by Nyein Kyaw
‎
‎မနက်ဖြန်မှစတင်၍ OWIC လက်ဝယ်ကိုင်ဆောင်ထားသူများ ပြည်ပနိုင်ငံများသို့ ထွက်ခွာမည်ဆိုပါက အလုပ်သမား ညွှန်ကြားရေးဦးစီးဌာန၏ ခွင့်ပြုချက်ရယူပြီးမှသာ ပြည်ပသို့ပြန်လည်ထွက်ခွာရန် လိုအပ်ကြောင်း အလုပ်သမားဝန်ကြီးဌာနမှ ထပ်မံအသိပေးကြေညာထားသည်။
‎
‎ PJ နိုင်ငံကူးလက်မှတ်ဖြင့် ပြည်ပသို့ ထွက်ခွာမည့် မိမိအစီအစဉ်ဖြင့်သွားရောက်သည့် ကျွမ်းကျင်မြန်မာလုပ်သားများအား အသိပေးခြင်းကြေညာချက်ကို (၂၈-၃-၂၀၂၅) ရက်နေ့ထုတ် မြန်မာ့အလင်းသတင်းစာတွင်လည်းကောင်း၊ အေဂျင်စီအစီအစဉ်ဖြင့်ဖြစ်စေ၊ မိမိအစီအစဉ်ဖြင့်ဖြစ်စေ နိုင်ငံအလိုက်စေလွှတ်ရေးလုပ်ငန်းစဉ် SOP များကို (၂၂-၃-၂၀၂၅) ရက်နေ့မှ (၂၈-၃-၂၀၂၅) ရက်နေ့အထိ နိုင်ငံပိုင်သတင်း စာများတွင်လည်းကောင်း၊ ဝန်ကြီးဌာန၏ Facebook Page၊ Safe Migration Facebook Page နှင့် Safe Migration Telegram Channel တို့တွင်လည်းကောင်း အများပြည်သူများ သိရှိလိုက်နာ ဆောင်ရွက်နိုင်ရေး အသိပေးကြေညာချက်တွင် ပြည်ပထွက်ခွာခွင့်နှင့်ပတ်သက်၍ အလုပ်သမား ညွှန်ကြားရေးဦးစီးဌာနသို့ အနည်းဆုံး ရုံးပိတ်ရက် (မပါ) ၅ ရက်ကြိုတင်၍ လျှောက်ထားရမည်ဖြစ်ကြောင်း ဖော်ပြခဲ့ပြီး ဖြစ်သည်။
‎
‎၎င်းကြေညာချက်နှင့်အညီ အလုပ်သမားညွှန်ကြားရေးဦးစီးဌာနအနေဖြင့် အေဂျင်စီအစီအစဉ်ဖြင့်ဖြစ်စေ၊ မိမိ အစီအစဉ်ဖြင့် ကျွမ်းကျင်/ခွင့်ပြန်ဖြင့်ဖြစ်စေ OWIC ပြုလုပ်ခွင့်များနှင့် ပြည်ပထွက်ခွာခွင့်များကို စိစစ်ခွင့်ပြုပေးလျက်ရှိသည်။
‎
‎သို့ရာတွင် အပြည်ပြည်ဆိုင်ရာလေဆိပ်များမှ ပေးပို့လာသည့်စာရင်းများအရ မိမိအစီအစဉ်ဖြင့် ခွင့်ပြန် OWIC လက်ဝယ်ရှိပြီးသူများသည် အပိုဒ် ၁ ပါအချက်များကို လိုက်နာခြင်းမရှိသည့်အပြင် အလုပ်သမားညွှန်ကြားရေးဦးစီးဌာနသို့ တင်ပြခြင်းမရှိဘဲ ပြည်ပသို့ထွက်ခွာနေကြောင်း စိစစ်တွေ့ရှိရသည်။
‎
‎ပြည်ပထွက်ခွာခွင့်များနှင့်ပတ်သက်၍ ဆောင်ရွက်ရမည့်လုပ်ငန်းစဉ်များကို ဝန်ကြီးဌာန၏ Website www.mol.gov.mmi Safe Migration Facebook Page & Safe Migration Telegram Channel တို့တွင် ကြေညာထားရှိပြီးဖြစ်သည်။
‎
‎သို့ဖြစ်ပါ၍ OWIC လက်ဝယ်ကိုင်ဆောင်ထားသူများအနေဖြင့် ပြည်ပနိုင်ငံများသို့ ထွက်ခွာ မည်ဆိုပါက ၁၄-၁-၂၀၂၆ ရက်နေ့မှစတင်၍ သတ်မှတ်စည်းကမ်းများနှင့်အညီ အလုပ်သမား ညွှန်ကြားရေးဦးစီးဌာန၏ခွင့်ပြုချက်ရယူပြီးမှသာ ပြည်ပသို့ပြန်လည်ထွက်ခွာရန် လိုအပ်ကြောင်း ထပ်မံအသိပေးကြေညာထားသည်။
‎