၂၀.၁၁.၂၀၂၅
Written by Thiri
ပြီးခဲ့တဲ့ နိုဝင်ဘာ ၁၈ ရက်နေ့ ညက ပဲခူးတိုင်း၊ အုတ်တွင်းမြို့နယ်မှာ တာဝန်သိပြည်သူတစ်ဦးရဲ့ ဖုန်းသတင်းပေးမှုအရ သံဃာအတုအယောင်တစ်ပါးကို သင်္ကန်းချွတ် လူဝတ်လဲခဲ့ရကြောင်း မြို့နယ် ဝိသောဓနီအဖွဲ့မှ အရှင်တေဇသီရိက မိန့်ပါတယ်။
ဖြစ်စဉ်က နိုဝင်ဘာ ၁၈ ရက်၊ ည ၉ နာရီကျော်ခန့်အချိန် အုတ်တွင်းမြို့နယ်၊ ဟင်းငုတ်ပင် Toll Gate မှာ သင်္ကန်းဝတ်တစ်ပါးက ရိုင်းစိုင်းစွာ ပြောနေဆိုနေကြောင်း သတင်းအရ သွားရောက်ရာ တောင်ငူဘက်လားရာသို့ လမ်းလျှောက်သွားကြောင်း မျက်မြင်တွေ့သူတွေက ပြောဆိုလို့ မြို့နယ် ဝိသောဓနီအဖွဲ့(သာ/ထိန်း)က နောက်ကနေ လိုက်လံရှာဖွေခဲ့တယ်လို့ သိရပါတယ်။
အဲ့ဒီလိုရှာဖွေရာ ခပေါင်း ကျောင်းရှစ်ဆယ် နှစ်ဆန်းကွက်သစ်နားအရောက် သင်္ကန်းဖရိုဖရဲရုံလျက် လမ်းလျှောက်နေတဲ့ အဆိုပါသံဃာကို တွေ့ရတာကြောင့် ရပ်တန့်စစ်ဆေးမေးမြန်းရာ မသင်္ကာစရာ အခြအနေမို့ ကျောင်းတိုက်ဆီခေါ်
ဆောင်လာပြီး စစ်ဆေးခဲ့ကြောင်း၊ အဲဒီလိုစစ်ဆေးရာ သပိတ်အသစ်၊ လူစီးဖိနပ်၊ မယ်ဆိုင်ကနေ ထိုင်းဘက်ကို ကူးထားတဲ့ နိုင်ငံဖြတ်ကျော်ကတ်တွေ တွေ့ရှိရပြီး သာသနာနဲ့ ပတ်သက်တဲ့ အထောက်အထားတွေအဖြစ် မုံရွာမြို့မှ အထင်ကရ တိုက်ခွဲတစ်ခုအမည်နဲ့ အတုအပလုပ် ဆောင်ထားတဲ့ ရက်ချုပ်ကို သိမ်းဆည်းရမိထားတယ်လို့ သိရပါတယ်။
“ဘုန်းဘုန်းတို့ကတော့ သံဃဝိနည်းနဲ့အညီပဲ စစ်တာပေါ့။ အဲဒီမှာ မေတ္တာသုတ်ကို တလွဲတွေရွတ်၊ သံဃဒိသေသ ကမ္မ(သံဃဒိသိသ် အာပါတ်) ဘယ်နှစ်ပါးမှန်းမသိ၊ ဒေသနာကြားတာလည်း မရ၊ ပြောတော့ (၇)ဝါ (သံဃ မှတ်ပုံတင်မရှိ) ရဟန်းရက်ချုပ်မှာက ရေးထားတာ ၁၃၈၅ တပို့တွဲလ။ သူက လူထွက်လိုက်၊ ပြန်ဝတ်လိုက် လုပ်နေတာကိုး။ သူအရင်ကဝတ်ခဲ့တဲ့ စဝတ်တဲ့ ခုနှစ်နဲ့ပဲ တွက်နေတယ်။ ထွက်တာတွေ ထည့်မတွက်ဘူး။ သံဃာမှာ အဲ့လိုတွက်လို့မရဘူး။ သာသနာနဲ့စပ်လျင်းတာ တွေဘာမှ မေးမရဘူး။ ထုံးစံအတိုင်း လူဝတ်လဲ ရဲတပ်ဖွဲ့ လက်ထဲအပ်ပေးလိုက်တယ်” လို့ ဆိုပါတယ်။
ပဲခူးတိုင်း၊ အုတ်တွင်းမြို့နယ်ထဲမှာ ကျောင်းထိုင် ၃ ပါးအဝင် သံဃဝိနည်းနဲ့ မညီတဲ့ ရဟန်းဝတ်တချို့ကို အုတ်တွင်းမြို့နယ်သာထိန်းအဖွဲ့က လူဝတ်လဲ ရဲလက်အပ်အရေးယူမှုပေါင်း ၂၅ မှုရှိပြီလို့ အုတ်တွင်းမြို့နယ်၊ မြို့နယ် သံဃဝန်ဆောင်၊ မြို့နယ် ဝိသောဓနီအဖွဲ့(သာ/ထိန်း)ထံကနေ သိရပါတယ်။
အုတ်တွင်းမြို့နယ်၊ မြို့နယ် သံဃဝန်ဆောင်၊ မြို့နယ် ဝိသောဓနီအဖွဲ့(သာ/ထိန်း)မှ ဆရာတော် ဘဒ္ဒန္တ တေဇသီရိ(ရင်ခုန်သံ ရှင်ရေးကူညီမှုအသင်း၊အုတ်တွင်းမြို့) က “ဦးဇင်းလည်း ဒီလိုလိုက်လုပ်နေတာ သာသနာမျက်နှာကြောင့်ပါ။ အများစုက အမုန်းမခံလိုတော့ ငြိမ်နေကြတာပဲ။ တကယ့်တကယ်က မြို့နယ်ထဲ အလှူခံဝင်လာပြီဆိုရင် ရပ်ကျေးသံဃနာယက က ထွက်ပြီး စစ်ပေးသင့်တယ်။ အဲ့ဒါဆို ဦးဇင်းတို့ သာထိန်းတွေ ဝင်ပါစရာ မလိုဘူးလေ။ လူမုန်းတာထက် သံဃာအချင်းချင်း မုန်းကြတယ်။ မတတ်နိုင်ဘူး။ ဒီလို သာသနာကို ခုတုံးလုပ်တာကကြတော့ ဗုဒ္ဓဘာသာ ကိုးကွယ်သူ ဒါယကာ ဒါယိကာမတွေရဲ့ သဒ္ဓါတရားလည်း ရိုက်ချိုးရာကျတယ်” လို့ မိန့်ကြားပါတယ်။
About the Author
