ဇွန်လအတွက် ရည်ညွှန်းဆန်ဈေးနှုန်းများ ထုတ်ပြန်ရာတွင် ရွှေဘိုပေါ်ဆန်းသာ ဈေးနှုန်းမြင့်တက်မှုရှိပြီး အခြားဆန်များ ယခင်လအတိုင်း ဈေးနှုန်းပြောင်းလဲမှုမရှိ

၆. ၆. ၂၀၂၅
Written by Nyein Kyaw

ယခု ဇွန်လအတွက် ရည်ညွှန်းဆန်ဈေးနှုန်းများ ထုတ်ပြန်ရာတွင် ရွှေဘိုပေါ်ဆန်းအမျိုးအစားသာ ဈေးနှုန်းမြင့်တက်မှုရှိပြီး အခြားဆန်အမျိုးအစားများအား ယခင်လဈေးနှုန်းများအတိုင်း သတ်မှတ်ခဲ့ကြောင်း စားသုံးသူရေးရာဦးစီးဌာနမှ ထုတ်ပြန်ထားသည့် ရည်ညွှန်းဆန်းဈေးနှုန်းအရ သိရသည်။

ယခု မေလအတွက် (၁၀၈) ပေါင်/ (၂၄)ပြည် ဆန်တစ်အိတ်ဈေးနှုန်း သတ်မှတ်ချက်အရ ပြည်ပတင်ပို့သည့် ဆန်ကြမ်းအုပ်စုများ (ဧည့်မထ/ ငစိန်) (ဆင်းသုခ၊ သီးထပ်ယဉ်၊ ရတနာတိုး၊ ငစိန် ရာကျော်၊ ကရင်မ၊ ထွန်းပု၊ GW-၁၁ ၊ စောရုပ်၊ ၇၄၇၊ သီးပု၊ ရွှေမန်း စသော ဧည့်မထ/ ငစိန် အုပ်စုဝင် ဆန်ကြမ်းများ)အတွက် ၂၅ မှတ်၊ ၁၅ မှတ်၊ ၁၀- ၅ မှတ် ၅၀ ကီလိုဂရမ် တစ်အိတ် ကျပ် ၆၀,၀၀၀ မှ ကျပ် ၇၂,၀၀၀ အထိသတ်မှတ်ကာ ပြီးခဲ့သည့် ဧပြီနှင့်မေလတို့တွင် သတ်မှတ်ခဲ့သည့် ဈေးနှုန်းများအတိုင်း ပြောင်းလဲမှုမရှိ သတ်မှတ်ခဲ့သည်။

အခြားဆန်အမျိုးအစားများကိုလည်း ယခင်လအတိုင်း သတ်မှတ်ခဲ့ပြီး ပြည်ပတင်ပို့မှုနှင့် ပြည်တွင်းစားသုံးမှုပါရှိသော အရည်အသွေးအသင့်အတင့်ရှိသော ဆန်အမျိုးအစား ဆန်အဟောင်း တစ်အိတ်ကို ကျပ် ၇၈,၀၀၀ နှင့် ဆန်အသစ်တစ်အိတ်ကို ကျပ် ၆၈,၀၀၀ သတ်မှတ်ခဲ့ပြီး မြန်မာပြည်အောက်ပိုင်းမှ ထွက်ရှိသော စားသုံးမှုအရည်သွေးကောင်းမွန်သည့် ပြည်တွင်းစားဆန်အမျိုးအစား ဆန်ဟောင်းတစ်အိတ် ကျပ် ၉၂,၀၀၀ နှင့် အသစ်တစ်အိတ် ကျပ် ၇၅,၀၀၀ သတ်မှတ်ထားသည်။

မြန်မာပြည်အထက်ပိုင်းမှ ထွက်ရှိသော စားသုံးမှုအထူးကောင်းမွန်သည့် ဆန်အမျိုးအစားများကိုမူ တစ်အိတ် ကျပ် ၁၃၃,၀၀၀ နှင့် ဆန်အသစ်အတွက် တစ်အိတ် ကျပ် ၁၂၀,၀၀၀ ဖြင့် မတ်လ၊ ဧပြီလနှင့် မေလ ဈေးနှုန်းများအတိုင်း သတ်မှတ်ထားသည်။

ပြည်တွင်း၌ စားသုံးမှုများသည့် ရွှေဘိုပေါ်ဆန်းဆန်အဟောင်းများကို တစ်အိတ် ကျပ် ၁၅၀,၀၀၀ မှ ကျပ် ၁၅၅,၀၀၀ နှင့် ရွှေပေါ်ဆန်းအသစ်များအတွက် တစ်အိတ် ကျပ် ၁၃၅,၀၀၀ မှ ကျပ် ၁၄၀,၀၀၀ သတ်မှတ်ခဲ့ပြီး ယခင်လများထက် ‌တစ်အိတ်ကို ကျပ် ၅,၀၀၀ ဈေးနှုန်းမြင့်တက်ခဲ့သည်။

အခြားပေါ်ဆန်းဆန်အုပ်စုဝင် (ဧရာဝတီပေါ်ဆန်း၊ ပေါ်ကျွဲ) ဆန်ဟောင်းများကို တစ်အိတ် ကျပ် ၁၀၂,၀၀၀ နှင့် ဆန်အသစ် တစ်အိတ် ကျပ် ၉၀,၀၀၀၊ ပြည်တွင်းစားသုံးမှုများသည့် တောင်ပျံ/ဘေးကြားဆန်အဟောင်း တစ်အိတ် ကျပ် ၁၃၅,၀၀၀ နှင့် ဆန်သစ် တစ်အိတ် ကျပ် ၁၁၇,၀၀၀ မှ ၁၂၂,၀၀၀ ကြားဖြင့် ပြီးခဲ့သည့် မတ်လ၊ ဧပြီလနှင့် မေလများအတိုင်း သတ်မှတ်ထားသည်။

အလားတူ ဈေးအရောင်းစင်တာ (Super Market၊ Mini Market) များတွင် Consumer Packaging ဖြင့် ရောင်းချမှုအတွက် ဆန်ဈေးနှုန်းအားလုံးကိုလည်း နိုဝင်ဘာလအတိုင်း သတ်မှတ်ပေးထားသည်။ ထို့ကြောင့် ဈေးကွက်အတွင်းရောင်းချရာတွင် အထက်ဖော်ပြပါ သင့်တင့်မျှတသော ရည်ညွှန်းဈေးနှုန်းများအပေါ် ၈ ရာခိုင်နှုန်းထက်မပိုသော၊ ဝန်ဆောင်စရိတ် ၃ ရာခိုင်နှုန်းထက်မပိုသော၊ သယ်ယူသိုလှောင်စရိတ် ၄ ရာခိုင်နှုန်းထက်မပိုသော ထုတ်လုပ်သူအကျိုးအမြတ်တို့ဖြင့် တွက်ချက်ရောင်းချရန် သတိပေးထားသည်။